Áleýmettik jelide 89 jastaǵy qariia kisiniń araǵa 20 jyl salyp týǵan jerine baryp, baýyrlarymen qaita qaýyshqan sáti kópshiliktiń júregin eljiretti. Tolqynysqa toly beinejazbany qariianyń nemeresi Maral jeke paraqshasynda jariialaǵan, dep habarlaidy dalanews.kz.
Beinekadrlarda qart ananyń Qytai shekarasynan ótip, týǵan-týystarymen qaýyshqan sáti kórsetilgen. Kóz jasyna erik bergen ájeniń qýanyshy jeli qoldanýshylaryna erekshe áser qaldyrdy.
"Jyldar boiy ájemniń ańsaǵan armany oryndalyp, saǵynyshy basylmai jatyr", – dep jazdy Maral.
Nemeresiniń aitýynsha, ájesi 1959 jyly 22 jasynda týǵan aǵasymen birge Otanyna oralǵan. Alaida qujat máselesine bailanysty ata-anasy men alty baýyry shekaradan óte almai, Qytaida qalyp qoiǵan.
"Keiin araǵa uzaq jyldar salyp, 1989 jyly atam arnaiy viza rásimdep, ájemdi týǵan-týystaryna aparyp kelgen. Al 2006 jyly ájem týǵandaryn izdep taǵy bir márte Qytaiǵa baryp qaitqan. Soǵan qaramastan, ájeniń saǵynyshy basylǵan emes", - deidi nemeresi.
Maraldyń sózinshe, sol kezeńdegi qatań zań talaptary baýyrlardyń uzaq jyldar boiy bir-birimen bailanys ornata almaýyna sebep bolǵan.
Beinejazba jelide keńinen tarap, kópshilik ózderiniń de taǵdyrlas oqiǵalaryn bólise bastady. Keibiri jaqyndarymen qaita qaýyshqanyn jazsa, endi biri ómir boiy saǵynyshpen ómir súrip kele jatqanyn aitqan.
Qosylǵan sáttegi apaly-sińililerdiń qushaǵy men kóz jasy kórermenderdi beijai qaldyrmady. Kópshilik qariianyń ómir jolyna tánti bolyp, aq tilekterin jaýdyryp jatyr.
Tlegenova Arýna
