قارجىگەر-مامان ايدارحان قۇسايىنوۆ الداعى ەكى جىل حالىق پەن بيزنەسكە قيىن تيەتىنىن بولجايدى. بۇل تۋرالى ول الەۋمەتتىك جەلىدەگى "ينفلياسيا تۋرالى بولجامداردان تۋعان وي" اتتى جازباسىندا ايتادى، دەپ حابارلايدى Dalanews.kz.
"ۇلتتىق بانك ءوز بولجامىندا 2025 جىلعى ينفلياسيا كولەمىن 10-12%-عا جانە 2026 جىلداعىسىن 9-11%-عا دەيىن ارتتىردى. ءبىراق بۇل ارادا بولاشاق تۋرالى ءسوز جوق، ياعني ءقازىر ورىن الىپ وتىرعان شىندىققا قاتىستى بولجامدار. سايكەسىنشە، 2026 جىلعا ارنالعان بولجامعا ءقازىر قابىلداۋى قاراستىرىلىپ جاتقان، دەمەك ءالى ەسەپكە الىنباعان قوسىمشا قۇن سالىعى ءوسىمىنىڭ 2-4%-ىن تاعى قوسۋ كەرەك بولادى. مۇنداي جاعدايدا 2025 جىلعى ينفلياسيا بويىنشا بولجام 10-12% جانە 2026 جىلعا 11-14% بولىپ قالادى، ال 2027 جىلى بۇل كورسەتكىش 8-9%-دان تومەندەيدى دەپ ويلايمىن. ياعني، بازالىق مولشەرلەمە شامامەن الداعى ەكى جىلدا 16-18% بولىپ قالادى. مۇنداي ينفلياسيا كەزىندە حالىقتىڭ تابىسىنا نە بولاتىنىن جانە بيزنەس نەسيەنى قايدان الاتىنىن، ءتىپتى كوز الدىما ەلەستەتە المايمىن. ال ءبىزدىڭ پروبلەمالىق بيۋدجەتكە يە ەكەنىمىزدى ەسكەرسەك، مەملەكەت سۋبسيديالار مەن ينۆەستيسيالاردى قايدان الادى؟ ەكونوميكالىق ءوسىم قالاي بولادى؟.. ول جاعى دا بەيمالىم. ەسەسىنە ءجىو نومينالدى تۇردە "ۇشاتىن" بولادى"، دەپ جازدى ايدارحان قۇسايىنوۆ Telegram-داعى ارناسىندا.
بۇل جازبانى، اسىرەسە كاسىپكەرلەر قاۋىمى اۋىر قابىلداپ جاتىر.
ايتا كەتسەك، 7 ناۋرىزدا ۇلتتىق بانك بازالىق مولشەرلەمەنى بىردەن 125 بازيستىك پۋنكتكە ءبىر-اق كوتەردى. مۇندايدى ءبىر دە ءبىر قارجىلىق ساراپاتاما ورتالىعى بولجاي المادى. بولجامداردا 100 بازيستىك پۋنكت تۋرالى ءسوز بولعان، ال كوبىسى بازالىق مولشەرلەمەنى 50 بازيستىك پۋنكتكە كوتەرۋ ورىندى دەپ تاپقان.
