زاڭ جوباسى قابىلدانعان جاعدايدا، قارجى پيراميداسىن جارنامالاعانى ءۇشىن ءبىر مىڭنان 3 مىڭعا دەيىن ايلىق ەسەپتىك كورسەتكىش كولەمىندە (9،1 ميلليون تەڭگەگە دەيىن) ايىپپۇل سالىنادى جانە ءۇش جىلدان بەس جىلعا دەيىن سوتتالۋى مۇمكىن. قارجى پيراميداسىن قۇرىپ، وعان باسشىلىق ەتكەندەر 12 جىلعا دەيىن باس بوستاندىعىنان ايىرىلادى.
15 ماۋسىمدا زاڭ جوباسىن ءماجىلىس ماقۇلداعان.
قارجى پيراميداسىن جارنامالاعانى ءۇشىن قىلمىستىق جاۋاپقا تارتۋ ماسەلەسى بەلگىلى ۆاينەرلەردىڭ ۇستىنەن قىلمىستىق ءىس قوزعالعاننان كەيىن كۇرت كوبەيگەن. تەرگەۋ نۇسقاسى بويىنشا، ۆاينەرلەر Mudarabah Capital قارجى پيراميداسىن جارنامالاۋعا قاتىسقان جانە ودان تابىس تاپقان.
ءساۋىر ايىندا قارجى پيراميداسىنان زارداپ شەگۋشى رەتىندە تانىلعان الماتى تۇرعىنى باعيلا دوسمايىلوۆا تەرگەۋ بارىسىنا قاناعاتتانباي نۇر-سۇلتان قالاسىندا، ىشكى ىستەر مينيسترلىگىنىڭ الدىندا ءوز-وزىن جاعىپ جىبەرگەن. بۇرىن ول الماتى پوليسياسى دەپارتامەنتى باسشىسىنىڭ ورىنباسارى رۋستام ابدراحمانوۆ «قىلمىستىق ءىستى جاۋىپ تاستاۋعا اسىعىپ وتىر» دەپ مالىمدەپ، Mudarabah Capital كومپانياسىن جارنامالاعان ۆاينەرلەر مەيىرجان تورەبايەۆ پەن مەيىرحانا شەرنيازوۆتى جاۋاپقا تارتۋدى تالاپ ەتكەن.
الماتى پوليسياسىنىڭ مالىمەتىنە قاراعاندا، تورەبايەۆ پەن شەرنيازوۆ قىلمىستىق ءىس بويىنشا كۇدىكتى دەپ تانىلعان. ءقازىر ولار قاماۋدا وتىر.
قازاقستان قارجى مونيتورينگى اگەنتتىگىنىڭ مالىمەتىنشە، بۇگىنگە دەيىن قازاقستاندا 17 مىڭنان استام ادام قارجى پيراميدالارىنا 27 ميلليارد تەڭگە سالعان.
