قاراعاندى وبلىستىق پوليسيا دەپارتامەنتىنىڭ قىزمەتكەرلەرى قاراعاندى قالاسىنىڭ اۋداندارىنىڭ بىرىندە ورنالاسقان ەسىرتكى زەرتحاناسىن جويۋ بويىنشا ارنايى وپەراسيا وتكىزدى، دەپ حابارلايدى Dalanews.kz.
وپەراسيا بارىسىندا ساياجاي اۋماعىنان ەسىرتكى جاساۋعا پايدالانىلاتىن اق ۇنتاق ءتارىزدى زات سالىنعان التى اعاش بوشكە تابىلدى. كەيىنىرەك بۇل بوشكەلەر BMW X5 كولىگىنە تيەلگەنى انىقتالدى. كولىكتى 39 جاستاعى قاراعاندى تۇرعىنى باسقارعان. بوشكەلەر جەكە ۇيگە جەتكىزىلۋى ءتيىس بولعان ساتتە كولىك توقتاتىلدى.
ۇيگە جۇرگىزىلگەن ءتىنتۋ بارىسىندا مىنا زاتتار تاركىلەندى:
• ەسىرتكى جاساۋعا قاجەتتى پرەكۋرسورلارى بار 6 بوشكە؛
• كەپتىرۋ كەزەڭىندەگى پسيحوتروپتىق زات بولۋى مۇمكىن سۇيىقتىق قۇيىلعان 35 شىنى پاللەت؛
• بەلگىسىز سۇيىقتىق سالىنعان 33 كانيستر؛
• ۇنتاق ءتارىزدى زات تولتىرىلعان 4 قاپ؛
• 5 گازتۇتقىش؛
• سالماعى 3 كەلىگە جۋىق دايىن الفا-PVP ەسىرتكىسى سالىنعان 3 ۆاكۋۋمدى پاكەت؛
• ەسىرتكى وندىرۋگە ارنالعان جابدىقتار (ارالاستىرعىشتار، ۆاكۋۋماتور، جەلدەتكىش جۇيەسى)؛
• تارازى، ۇيالى تەلەفوندار، جۇيەلىك بلوك جانە باسقا دا قۇرال-جابدىقتار.
"جۇرگىزىلگەن ارنايى وپەراسيانىڭ ناتيجەسىندە 500 مىڭ دوزاعا جۋىق سينتەتيكالىق ەسىرتكىنىڭ قارا نارىققا شىعارىلۋىنا جول بەرىلمەدى. قىلمىستىق ىسكە قاتىسى بار كۇدىكتى ۋاقىتشا ۇستاۋ يزولياتورىنا قامالدى"، – دەلىنگەن پوليسيا حابارلاماسىندا.
تاركىلەنگەن زاتتار بويىنشا ساراپتاما تاعايىندالىپ، قوسىمشا تەرگەۋ امالدارى جۇرگىزىلىپ جاتىر.
