7 سەۋٸر كٷنٸ ساراتوۆ اربيتراجىنىڭ نيكولاي سۋۆوروۆتىڭ "رەسەيدٸ توناعانى ٷشٸن" پۋتيندٸ وتستاۆكاعا كەتٸرۋ جٶنٸندەگٸ ٶتٸنٸشٸن قابىل الىپ, تٸپتەن الدىن الا سوت وتىرىسىنىڭ مەرزٸمٸن دە تاعايىنداعانى بەلگٸلٸ بولعان ەدٸ.
الايدا ساراتوۆ وبلىستىق اربيتراج سوتى بالاكوۆو قالاسىنىڭ تۇرعىنى نيكولاي سۋۆوروۆتىڭ پرەزيدەنت ۆلاديمير پۋتيندٸ قىزمەتٸنەن كەتٸرۋ جٶنٸندەگٸ شاعىمىن ٶندٸرٸسكە الۋدان باس تارتقان. بۇل جٶنٸندە سوتتىڭ انىقتاماسىندا جازىلعان.
سوت انىقتاماسىندا مەملەكەت باسشىسىندا قۇل سۇعىلماۋشىلىق يمۋنيتەتٸ بار ەكەنٸن, ونى قىزمەتٸنەن كەتٸرۋ سوتتىڭ قۇزىرىنا كٸرمەيتٸنٸ جازىلعان. ەل كونستيتۋتسيياسىنىڭ 4-تاراۋىندا پرەزيدەنتكە تيٸستٸ ٶكٸلەتتٸك بەرٸلگەن, ونىڭ قىزمەتٸنە سوت, اربيتراجدى سوت ارالاسا المايدى دەلٸنگەن.
الدىن بەيسەنبٸ كٷنٸ ساراتوۆ وبلىستىق اربيتراج سوتى سۋۆوروۆتىڭ پۋتينگە قاتىستى ارىزىن قابىلداپ, الدىن الا وتىرىستى 28 سەۋٸرگە بەلگٸلەگەن ەدٸ. بالاكوۆو تۇرعىنى پۋتيندٸ "حالىق جاۋى رەتٸندە, وليگارحتاردىڭ دوسى رەتٸندە رەسەيدٸ توناعانى ٷشٸن, شەنەۋنٸكتەردٸ, بانكير, ميللياردەر-توناۋشىلاردى بايىتقانى ٷشٸن" بيلٸكتەن كەتٸرۋدٸ تالاپ ەتٸپ ارىز جازعان.
