تاۋەلسىزدىك سارايىندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتى سالتاناتتى ۇلىقتاۋ ءراسىمى ءوتتى
مەملەكەتتىك تۋ مەن پرەزيدەنت بايراعى، سونداي-اق قازاقستان رەسپۋبليكاسىنىڭ كونستيتۋسياسى تاۋەلسىزدىك سارايىنىڭ ۇلكەن زالىنا اكەلىنگەن سوڭ قازاقستان رەسپۋبليكاسىنىڭ پرەزيدەنتى كەلىپ، مىنبەرگە كوتەرىلدى.
كونستيتۋسيانىڭ 42-بابىنا سايكەس، قاسىم-جومارت توقايەۆ حالىققا انت بەردى:
– قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ كونستيتۋسياسى مەن زاڭدارىن قاتاڭ ساقتاۋعا، ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە، قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن! – دەدى قاسىم-جومارت توقايەۆ.
سايلانعان قازاقستان پرەزيدەنتىنىڭ قىزمەتكە كىرىسۋ قۇرمەتىنە وراي مەملەكەتتىك ءانۇران وينالىپ، 21 رەت زەڭبىرەكتەردەن وق اتىلدى. ال «اقوردا» رەزيدەنسياسىنىڭ ۇستىندە قازاقستان رەسپۋبليكاسىنىڭ مەملەكەتتىك تۋى كوتەرىلدى.
ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ قاسىم-جومارت توقايەۆقا قازاقستان رەسپۋبليكاسى پرەزيدەنتىنىڭ كۋالىگىن تاپسىردى.
مەملەكەت باسشىسى سالتاناتتى ۇلىقتاۋ راسىمىندە سويلەگەن سوزىندە وزىنە زور سەنىم ارتقان بارشا وتانداسىنا العىس ايتتى.
– حالىقتىڭ سەنىمى – ەڭ قۇندى نارسە. سايلاۋ ناتيجەسىن حالقىمىزدىڭ ساياسي باعدارىما – باعاسى، الداعى جوسپارىما – باتاسى دەپ قابىلدايمىن. حالقىنىڭ قولداۋىنا يە بولىپ، ەل تىزگىنىن ۇستاۋ – ەر ازامات ءۇشىن ەڭ بيىك مارتەبە ءارى وراسان زور جاۋاپكەرشىلىك. الداعى 7 جىلدى بۇگىنگى بۋىننىڭ جانە كەلەشەك ۇرپاقتىڭ الدىنداعى بورىشىمدى وتەۋگە بەرىلگەن بىرەگەي مۇمكىندىك دەپ بىلەمىن. قازاقتا «امانات» دەگەن اسىل ۇعىم بار. حالقىمنىڭ سەنىمى – ماعان امانات. وسى اماناتقا ادال بولۋ – مەن ءۇشىن قاسيەتتى پارىز. ەل ءۇمىتىن اقتاپ، قازاقستاندى وركەندەگەن، باقۋاتتى مەملەكەتكە اينالدىرۋ ءۇشىن قولىمنان كەلگەننىڭ ءبارىن جاسايمىن، – دەدى قاسىم-جومارت توقايەۆ.
پرەزيدەنت الداعى قىزمەتىنىڭ ءبىرقاتار نەگىزگى باعىتىن اتاپ ءوتتى. مەملەكەت باسشىسىنىڭ ايتۋىنشا، شىنايى زاڭ ۇستەمدىگىن قامتاماسىز ەتپەي، ادىلەتتى ءارى نارىقتىق ەكونوميكانى قۇرۋ، جەكە مەنشىكتى قورعاۋ، باسەكەلەستىكتى دامىتۋ، سىبايلاس جەمقورلىقتى جويۋ مۇمكىن ەمەس. ەلىمىز دامۋ جولىندا، نەگىزىنەن، ءوز كۇشىنە سەنەدى. سونىمەن قاتار شەتەلدەن تىكەلەي ينۆەستيسيا تارتا وتىرىپ، ءتۇرلى سالاداعى حالىقارالىق ىنتىماقتاستىقتى بەلسەندى تۇردە دامىتادى.
قاسىم-جومارت توقايەۆ قازاقستان ءوز ۇلتتىق مۇددەسىن قورعاۋعا باعىتتالعان تەڭگەرىمدى جانە كونسترۋكتيۆتى سىرتقى ساياساتىن جۇزەگە اسىرا بەرەتىنىن جەتكىزدى. ساياسي جاڭعىرۋ ۇدەرىسى جوسپارلى تۇردە جالعاسادى.
ۇلىقتاۋ راسىمىنە قازاقستاننىڭ تۇڭعىش پرەزيدەنتى نۇرسۇلتان نازاربايەۆ، قازاقستان رەسپۋبليكاسىنىڭ پارلامەنتى دەپۋتاتتارى، ۇكىمەت مۇشەلەرى، جوعارعى سوت سۋديالارى، كونستيتۋسيالىق كەڭەستىڭ مۇشەلەرى، پرەزيدەنت اكىمشىلىگى مەن پرەمەر-مينيستر كەڭسەسىنىڭ وكىلدەرى، ورتالىق مەملەكەتتىك باسقارۋ ورگاندارىنىڭ باسشىلارى، ورتالىق سايلاۋ كوميسسياسى مەن قازاقستان حالقى اسسامبلەياسىنىڭ مۇشەلەرى، ءدىني كونفەسسيا وكىلدەرى، وبلىستار مەن استانا، الماتى جانە شىمكەنت قالالارىنىڭ اكىمدەرى، قازاقستانداعى ديپلوماتيالىق وكىلدىكتەردىڭ باسشىلارى، پرەزيدەنتتىككە ۇمىتكەر بولعاندار، ساياسي پارتيالاردىڭ باسشىلىعى، رەسپۋبليكالىق جانە ايماقتىق قوعامدىق شتابتاردىڭ مۇشەلەرى، قوعامدىق ۇيىمداردىڭ جانە بۇقارالىق اقپارات قۇرالدارىنىڭ وكىلدەرى، ىسكەر توپتار وكىلدەرى، كورنەكتى عالىمدار، مادەنيەت جانە ونەر قايراتكەرلەرى، جاستار ۇيىمدارىنىڭ جەتەكشىلەرى قاتىستى.
