Táýelsizdik saraıynda Qazaqstan Respýblıkasynyń Prezıdenti Qasym-Jomart Toqaevty saltanatty ulyqtaý rásimi ótti
Memlekettik Tý men Prezıdent Baıraǵy, sondaı-aq Qazaqstan Respýblıkasynyń Konstıtýsıasy Táýelsizdik saraıynyń Úlken zalyna ákelingen soń Qazaqstan Respýblıkasynyń Prezıdenti kelip, minberge kóterildi.
Konstıtýsıanyń 42-babyna sáıkes, Qasym-Jomart Toqaev halyqqa ant berdi:
– Qazaqstan halqyna adal qyzmet etýge, Qazaqstan Respýblıkasynyń Konstıtýsıasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin! – dedi Qasym-Jomart Toqaev.
Saılanǵan Qazaqstan Prezıdentiniń qyzmetke kirisý qurmetine oraı Memlekettik ánuran oınalyp, 21 ret zeńbirekterden oq atyldy. Al «Aqorda» rezıdensıasynyń ústinde Qazaqstan Respýblıkasynyń Memlekettik Týy kóterildi.
Ortalyq saılaý komısıasynyń tóraǵasy Nurlan Ábdirov Qasym-Jomart Toqaevqa Qazaqstan Respýblıkasy Prezıdentiniń kýáligin tapsyrdy.
Memleket basshysy saltanatty ulyqtaý rásiminde sóılegen sózinde ózine zor senim artqan barsha otandasyna alǵys aıtty.
– Halyqtyń senimi – eń qundy nárse. Saılaý nátıjesin halqymyzdyń saıası baǵdaryma – baǵasy, aldaǵy josparyma – batasy dep qabyldaımyn. Halqynyń qoldaýyna ıe bolyp, el tizginin ustaý – er azamat úshin eń bıik mártebe ári orasan zor jaýapkershilik. Aldaǵy 7 jyldy búgingi býynnyń jáne keleshek urpaqtyń aldyndaǵy boryshymdy óteýge berilgen biregeı múmkindik dep bilemin. Qazaqta «amanat» degen asyl uǵym bar. Halqymnyń senimi – maǵan amanat. Osy amanatqa adal bolý – men úshin qasıetti paryz. El úmitin aqtap, Qazaqstandy órkendegen, baqýatty memleketke aınaldyrý úshin qolymnan kelgenniń bárin jasaımyn, – dedi Qasym-Jomart Toqaev.
Prezıdent aldaǵy qyzmetiniń birqatar negizgi baǵytyn atap ótti. Memleket basshysynyń aıtýynsha, shynaıy zań ústemdigin qamtamasyz etpeı, ádiletti ári naryqtyq ekonomıkany qurý, jeke menshikti qorǵaý, básekelestikti damytý, sybaılas jemqorlyqty joıý múmkin emes. Elimiz damý jolynda, negizinen, óz kúshine senedi. Sonymen qatar shetelden tikeleı ınvestısıa tarta otyryp, túrli saladaǵy halyqaralyq yntymaqtastyqty belsendi túrde damytady.
Qasym-Jomart Toqaev Qazaqstan óz ulttyq múddesin qorǵaýǵa baǵyttalǵan teńgerimdi jáne konstrýktıvti syrtqy saıasatyn júzege asyra beretinin jetkizdi. Saıası jańǵyrý úderisi josparly túrde jalǵasady.
Ulyqtaý rásimine Qazaqstannyń Tuńǵysh Prezıdenti Nursultan Nazarbaev, Qazaqstan Respýblıkasynyń Parlamenti depýtattary, Úkimet músheleri, Joǵarǵy sot sýdıalary, Konstıtýsıalyq Keńestiń músheleri, Prezıdent Ákimshiligi men Premer-Mınıstr Keńsesiniń ókilderi, ortalyq memlekettik basqarý organdarynyń basshylary, Ortalyq saılaý komısıasy men Qazaqstan Halqy Assambleıasynyń músheleri, dinı konfesıa ókilderi, oblystar men Astana, Almaty jáne Shymkent qalalarynyń ákimderi, Qazaqstandaǵy dıplomatıalyq ókildikterdiń basshylary, prezıdenttikke úmitker bolǵandar, saıası partıalardyń basshylyǵy, Respýblıkalyq jáne aımaqtyq qoǵamdyq shtabtardyń músheleri, qoǵamdyq uıymdardyń jáne buqaralyq aqparat quraldarynyń ókilderi, isker toptar ókilderi, kórnekti ǵalymdar, mádenıet jáne óner qaıratkerleri, jastar uıymdarynyń jetekshileri qatysty.
