«مەن قوعامدا ءجيى تالقىلاناتىن تاعى ءبىر ماسەلەگە توقتالعىم كەلەدى. قازاقستان – كونستيتۋسيا بويىنشا زايىرلى مەملەكەت. بۇل قاعيدا بارلىق جەردە، سونىڭ ىشىندە ءبىلىم بەرۋ مەكەمەلەرىندە قاتاڭ ساقتالۋعا ءتيىس. مەكتەپ – ەڭ الدىمەن، ءبىلىم ورداسى. بالالار مەكتەپكە ءبىلىم الۋ ءۇشىن بارادى. ال ءدىني ۇستانىم – ءار ازاماتتىڭ جەكە ماسەلەسى، ءوز تاڭداۋى. ەلىمىزدە ءدىن بوستاندىعىنا زاڭمەن كەپىلدىك بەرىلگەن. بالالارىمىز ەسەيىپ، دۇنيەتانىمى تولىق قالىپتاسقان سوڭ ءوز تاڭداۋىن جاساعانى دۇرىس دەپ سانايمىن”، – دەدى توقايەۆ.
مەملەكەت باسشىسى ەڭ باستىسى، كوزقاراسى ايقىن، ساناسى سەرگەك ءارى داستۇرگە بەرىك ۇرپاق تاربيەلەۋ كەرەكتىگىنە نازار اۋدارادى.
“جالپى، زايىرلى دەگەن ءسوزدىڭ مازمۇنى تەرەڭ، وتە اۋقىمدى. حالقىمىزعا قاتىستى ايتاتىن بولساق، بۇل – سالاۋاتتى ءومىر سالتىن ۇستانۋ، پراگماتيكالىق كوزقاراستا بولۋ جانە ءداستۇرلى دىنىمىزگە، ۇلتتىق سانانى ارقاۋ ەتكەن سالتىمىزعا شىنايى قۇرمەت دەگەن ءسوز»، – دەيدى ول.
ايتا كەتەيىك، جاڭا وقۋ جىلى باستالعالى قوعامدا مەكتەپكە حيدجاب كيۋ ماسەلەسىنە قاتىستى داۋ-داماي باسىلماي تۇر. بۇدان بۇرىن وقۋ-اعارتۋ ءمينيسترى عاني بەيسەمبايەۆ جەكەلەگەن ازاماتتاردىڭ مەكتەپتەردە حيدجاب كيۋگە رۇقسات بەرۋ تۋرالى تالابىنا قاتىستى پىكىر بىلدىرگەن.
