«پانامالىق قۇجاتتارعا» سايكەس، 2012 جىلى قىرعىزدىڭ التىن كەن ورىندارىن ساتۋ اۋكسيونىنا قاتىسقان Redgold Estates Azerbaijan Ltd كومپانياسىن ءازىربايجان پرەزيدەنتى يلحام الييەۆتىڭ وتباسى باسقارادى.
11 التىن جانە ءبىر كومىر كەن ورنى قويىلعان اۋكسيونعا ءار ەلدەن 35-تەن اسا كومپانيا قاتىسقان. ساۋدا 2012 جىلدىڭ تامىز ايىندا قوعامدىق تەلەراديوكورپوراسيانىڭ تىكەلەي ەفيرىندە ءوتۋى ءتيىس ەدى.
Redgold Estates Azerbaijan Ltd قىرعىزستاننىڭ ءار وڭىرىندە ورنالاسقان قورعان-توبە، بالىقتى، قارا-كەچە، تۇيىق، چاكماك-سۋۋ كەنىشتەرىن ساتىپ الۋعا ىنتا بىلدىرگەن. الايدا اۋكسيوندى تىكەلەي ەفير تاراتىپ وتىرعان تەلەارنانىڭ ستۋدياسىنا باسىپ كىرگەن جەرگىلىكتى ۇلتشىل قوزعالىس وكىلدەرىنىڭ ارەكەتى توقتاتىپ تاستادى. ولار بارلىق ينۆەستوردى عيماراتتان قۋىپ شىعىپ، ۇلتتىق بايلىقتى ساتۋعا جول بەرمەيتىندەرىن مالىمدەدى.
«پانامالىق قۇجاتتار» — وفشورلىق كومپانيالاردى تىركەۋ جانە ولاردىڭ جۇمىسىن جۇرگىزۋ بويىنشا قىزمەت كورسەتەتىن پانامالىق Mossack Fonseca زاڭگەرلىك كومپانياسىنا تيەسىلى اسا كولەمدى قۇجاتتاردىڭ جيىنتىعى. كوپتەگەن الەمدىك ساياساتكەرلەر مەن تانىمال تۇلعالاردىڭ وفشورلىق ەسەپشوتتارى تۋرالى دەرەكتەردى شەتەلدىك جۋرناليستەرگە وسى كومپانياداعى قۇپيا دەرەككوز بەرگەن. بۇل قۇجاتتار بويىنشا، لەيلا جانە ارزۋ الييەۆتەر ءازىربايجانداعى التىن كەنىشتەرىنەن تۇسەتىن تابىستىڭ 70 پايىزىن يەمدەنەدى دەپ كوسەتىلگەن.
