Prezident otbasynyń ofshorlyq firmasy qyrǵyzdyń altyn kenishterin satyp almaq bolǵan
«Panamalyq qujattarǵa» sáikes, 2012 jyly qyrǵyzdyń altyn ken oryndaryn satý aýktsionyna qatysqan Redgold Estates Azerbaijan Ltd kompaniiasyn Ázirbaijan prezidenti Ilham Álievtiń otbasy basqarady.
11 altyn jáne bir kómir ken orny qoiylǵan aýktsionǵa ár elden 35-ten asa kompaniia qatysqan. Saýda 2012 jyldyń tamyz aiynda Qoǵamdyq teleradiokorporatsiianyń tikelei efirinde ótýi tiis edi.
Redgold Estates Azerbaijan Ltd Qyrǵyzstannyń ár óńirinde ornalasqan Qorǵan-Tóbe, Balyqty, Qara-Keche, Tuiyq, Chakmak-Sýý kenishterin satyp alýǵa ynta bildirgen. Alaida aýktsiondy tikelei efir taratyp otyrǵan telearnanyń stýdiiasyna basyp kirgen jergilikti ultshyl qozǵalys ókilderiniń áreketi toqtatyp tastady. Olar barlyq investordy ǵimarattan qýyp shyǵyp, ulttyq bailyqty satýǵa jol bermeitinderin málimdedi.
«Panamalyq qujattar» — ofshorlyq kompaniialardy tirkeý jáne olardyń jumysyn júrgizý boiynsha qyzmet kórsetetin panamalyq Mossack Fonseca zańgerlik kompaniiasyna tiesili asa kólemdi qujattardyń jiyntyǵy. Kóptegen álemdik saiasatkerler men tanymal tulǵalardyń ofshorlyq esepshottary týraly derekterdi sheteldik jýrnalisterge osy kompaniiadaǵy qupiia derekkóz bergen. Bul qujattar boiynsha, Leila jáne Arzý Álievter Ázirbaijandaǵy altyn kenishterinen túsetin tabystyń 70 paiyzyn iemdenedi dep kósetilgen.
