– ءتىلدى ءتيىستى بيىگىنە شىعارۋ ءۇشىن بىزگە ناقتى شارۋا، سالا-سالا بويىنشا ناتيجە بەرەتىن تۇراقتى جوبالار قاجەتتىگىن پرەزيدەنتكە ايتتىم.
مەملەكەت باسشىسى «قازاق ءتىلى» قوعامى اياسىندا دايىندالعان وسى باعىتتاعى ۇسىنىستارمەن تانىسىپ، قولداۋ ءبىلدىردى، ءوز ويلارىن ايتتى.
جالپى تىلدىك احۋال، ءتىلدىڭ دامۋىنا قاتىستى كوپ ماسەلەلەر ءسوز بولدى. پرەزيدەنت ءتىل جاناشىرى قىرىنان تانىلدى. بالالاردىڭ ءتىلى قازاقشا شىقپاي، شىقسا دا دۇرىس شىقپاي جاتقاندىعىن، قازاققا ءتان ءتول دىبىستاۋ جۇيەسى، ءتىل تازالىعى بۇزىلىپ جاتقاندىعىن مىسال كەلتىرە وتىرىپ العا تارتتى.
لاتىن الىپبيىنە كوشۋ كەزىندە مۇنى دا ەسكەرۋ قاجەتتىگىن ايتىپ، لاتىنعا كوشۋگە قاتىستى پىكىرىمدى سۇرادى. كەيبىر دىبىسقا تاڭبا تاڭداۋعا قاتىستى ءوز ويىن ايتتى. قالام الىپ، لاتىن ارىپتەرمەن ءبىراز ءسوز جازىپ كورسەتتى. قىسقاسى، پرەزيدەنت ءتىل ماسەلەسىنە تەرەڭ بويلاعان، قازاق ءتىلىنىڭ وركەن جايىپ، كەڭ قولدانىس تابۋىنا شىن ىقىلاستى ءتىل جاناشىرى.
مەملەكەت باسشىسى مىنا باعىتتاردا ناقتى دا، ناتيجەلى جۇمىس قاجەت دەپ تاپسىردى:
بىرىنشىدەن، «قازاق ءتىلى» قوعامىن ءتىلدى دامىتۋ مۇراتىنا ءتيىمدى قىزمەت ەتەتىن، قارجىلاي قاۋقارلى، ۇيىمداستىرۋشىلىق الەۋەتى زور، ءىرى دە ىرگەلى قوعامدىق ۇيىمعا اينالدىرۋ قاجەت.
ول ءۇشىن مەملەكەت، بيزنەس، قوعام جانە جەكە ءتىل جاناشىرلارى كۇش بىرىكتىرىپ، جاڭاشا جۇمىس ىستەۋىمىز كەرەك. سونىڭ ءبىر تەتىگى – “QAZAQ TILI” ەنداۋمەنت قورى.
ەكىنشىدەن، بالانىڭ ءتىلىن قازاقشا شىعارۋعا قاجەت قۇرالداردان باستاپ، ءار ادامنىڭ قازاق ءتىلى اياسىندا تۇلعا جانە مامان بولىپ قالىپتاسۋىنا، ەركىن دامۋىنا قاجەت مازمۇن قورى كەرەك.
اتاپ ايتساق، الەمنىڭ انيماسيا جاۋھارلارى، قازاق تىلىندەگى كينوپروكات، كلاسسيكالىق جانە تانىمدىق كينو قورى جاسالىپ، ۇدايى جاڭارتىلۋى ءتيىس. باسپا ءىسى باعىتىندا بالالار ادەبيەتى، ىسكەرلىك ادەبيەت، عىلىمي-تانىمدىق ادەبيەت، اكادەميالىق وقۋلىقتار باعىتتارى بويىنشا اۋقىمدى جانە تۇراقتى جۇمىس قاجەت.
ۇشىنشىدەن، ءبىلىم بەرۋ جۇيەسىندەگى قازاق ءتىلى مەن ادەبيەتىن وقىتۋ ادىستەمەسى جانە قۇرالدارىن جەتىلدىرۋ كەرەك. قازاق مەكتەبىنىڭ تۇلەگى قازاقشا ەركىن ءسوز ساپتاپ، ساۋاتتى دا، كوركەم جازۋدى مەڭگەرىپ شىعۋى ءتيىس.
ورىس ءتىلدى مەكتەپتىڭ تۇلەگى قازاقشا ەركىن سويلەسىپ، ويىن جەتكىزۋگە شاماسى جەتۋى شارت. ول ءۇشىن مەكتەپ اياسىندا «وقۋ ساۋاتى» جانە «جازۋ مادەنيەتى» جوبالارىن ىسكە اسىرامىز. ديكتانت، مازمۇنداما، شىعارما جازۋ، سويلەم تالداۋ بويىنشا ۇلتتىق بايقاۋلار مەن جارىستار وتكىزەمىز.
تورتىنشىدەن، قازىرگى IT تەحنولوگيالاردى قازاق ءتىلىنىڭ قىزمەتىنە قويا ءبىلۋىمىز قاجەت. بۇل باعىتتا عالامدىق الپاۋىتتاردىڭ كەڭ قولدانىستاعى پلاتفورمالارىن قازاقشالاۋ جانە ءوز ماماندارىمىزدىڭ قازاقشا ءماتىن تانۋ، دىبىس تانۋ، قازاقشا سويلەۋ مەن جازۋعا، جالپى قازاقشا جۇمىس ىستەۋگە كومەكتەسەتىن جۇيەلەرىن دامىتۋعا جاعداي جاساۋ مىندەتى تۇر.
انا ءتىلىمىزدى دامىتۋعا ارنايى ۋاقىت، ەرەكشە كوڭىل ءبولىپ، زور ىقىلاس تانىتقان پرەزيدەنت قاسىم-جومارت كەمەلۇلىنا بارشا ءتىل جاناشىرلارى اتىنان ريزاشىلىق بىلدىرەمىن!
