– Tildi tiisti biigine shyǵarý úshin bizge naqty sharýa, sala-sala boiynsha nátije beretin turaqty jobalar qajettigin Prezidentke aittym.
Memleket basshysy «Qazaq tili» qoǵamy aiasynda daiyndalǵan osy baǵyttaǵy usynystarmen tanysyp, qoldaý bildirdi, óz oilaryn aitty.
Jalpy tildik ahýal, tildiń damýyna qatysty kóp máseleler sóz boldy. Prezident til janashyry qyrynan tanyldy. Balalardyń tili qazaqsha shyqpai, shyqsa da durys shyqpai jatqandyǵyn, qazaqqa tán tól dybystaý júiesi, til tazalyǵy buzylyp jatqandyǵyn mysal keltire otyryp alǵa tartty.
Latyn álipbiine kóshý kezinde muny da eskerý qajettigin aityp, latynǵa kóshýge qatysty pikirimdi surady. Keibir dybysqa tańba tańdaýǵa qatysty óz oiyn aitty. Qalam alyp, latyn áriptermen biraz sóz jazyp kórsetti. Qysqasy, Prezident til máselesine tereń boilaǵan, qazaq tiliniń órken jaiyp, keń qoldanys tabýyna shyn yqylasty til janashyry.
Memleket basshysy myna baǵyttarda naqty da, nátijeli jumys qajet dep tapsyrdy:
Birinshiden, «Qazaq tili» qoǵamyn tildi damytý muratyna tiimdi qyzmet etetin, qarjylai qaýqarly, uiymdastyrýshylyq áleýeti zor, iri de irgeli qoǵamdyq uiymǵa ainaldyrý qajet.
Ol úshin memleket, biznes, qoǵam jáne jeke til janashyrlary kúsh biriktirip, jańasha jumys isteýimiz kerek. Sonyń bir tetigi – “QAZAQ TILI” endaýment qory.
Ekinshiden, balanyń tilin qazaqsha shyǵarýǵa qajet quraldardan bastap, ár adamnyń qazaq tili aiasynda tulǵa jáne maman bolyp qalyptasýyna, erkin damýyna qajet mazmun qory kerek.
Atap aitsaq, álemniń animatsiia jaýharlary, qazaq tilindegi kinoprokat, klassikalyq jáne tanymdyq kino qory jasalyp, udaiy jańartylýy tiis. Baspa isi baǵytynda balalar ádebieti, iskerlik ádebiet, ǵylymi-tanymdyq ádebiet, akademiialyq oqýlyqtar baǵyttary boiynsha aýqymdy jáne turaqty jumys qajet.
Úshinshiden, bilim berý júiesindegi qazaq tili men ádebietin oqytý ádistemesi jáne quraldaryn jetildirý kerek. Qazaq mektebiniń túlegi qazaqsha erkin sóz saptap, saýatty da, kórkem jazýdy meńgerip shyǵýy tiis.
Orys tildi mekteptiń túlegi qazaqsha erkin sóilesip, oiyn jetkizýge shamasy jetýi shart. Ol úshin mektep aiasynda «Oqý saýaty» jáne «Jazý mádenieti» jobalaryn iske asyramyz. Diktant, mazmundama, shyǵarma jazý, sóilem taldaý boiynsha ulttyq baiqaýlar men jarystar ótkizemiz.
Tórtinshiden, qazirgi IT tehnologiialardy qazaq tiliniń qyzmetine qoia bilýimiz qajet. Bul baǵytta ǵalamdyq alpaýyttardyń keń qoldanystaǵy platformalaryn qazaqshalaý jáne óz mamandarymyzdyń qazaqsha mátin taný, dybys taný, qazaqsha sóileý men jazýǵa, jalpy qazaqsha jumys isteýge kómektesetin júielerin damytýǵa jaǵdai jasaý mindeti tur.
Ana tilimizdi damytýǵa arnaiy ýaqyt, erekshe kóńil bólip, zor yqylas tanytqan Prezident Qasym-Jomart Kemelulyna barsha til janashyrlary atynan rizashylyq bildiremin!
