ول ادەبيەتكە قۇشتار. شەكسىز عاشىق. ونىڭ جانارىنداعى قۇشتارلىق قانتوگىس مايدانداعى بالاڭ اسكەردىڭ اي تۋعانىنا الاڭداپ اسپانعا شالقايعان ەستاندى ءحالىن ەسكە ءتۇسىرۋشى ەدى. ويتكەنى، ول مايدانداعى تارتىپتەن شارۋاسى جوق، الەمگە نە ءۇشىن كەلىپ، نەگە كەتىپ بارا جاتقانىن شىن ۇققىسى كەلگەن جان بولاتىن. وسىنداي مۇڭلى ءحال ەريح ماريا رەماركتىڭ «باتىس مايداندا ەش وزگەرىس جوق» دەپ اتالاتىن رومانىندا ەڭسەڭدى باسىپ، ءباز قالپىڭدى، ادامدىق نەگىزىڭدى ەسكە تۇسىرە بەرۋشى ەدى عوي. ناق سول ءحالدى ونىڭ جانارىنان كورەتىن ەدىم. قانتوگىس مايداندا جەڭىلۋ مەن جەڭىستىڭ ايىرماسىن كورمەيتىن مۇڭلى جانار. ەرىكسىز جەرگە توپ ەتكەن پەندەنىڭ ەركىن تارتىپ الۋشى قوعام مەن مايداننىڭ نوقتاسىنان بوساپ شىعا الماعاندار كوزدەرىڭ قىزباي-اق قويسىن!
ونى كوپتەن تانيتىن ەدىم. ءبىراق، توسىننان ونى رەسپۋبليكالىق بەلدى ادەبي جۋرنالدىڭ رەداكسياسىنان كورىپ قالدىم. رەداكسيا بولمەلەرى اۋىسىپ، كوشىپ قونعان ءسات پە، ول بوس بولمەنىڭ ورتاسىنان ورنالاسقان ۇستەل ۇستىندە شالقاسىنان ءتۇسىپ ۇيىقتاپ جاتتى. تال تۇستە. اق قاعازدارىنىڭ ۇستىنە جاتا كەتىپتى. مەن كىرىپ كەلگەندە، دىبىستان ويانىپ كەتتى مە، اتىپ تۇردى. ءجۇزى سولعىن، ۇيقىسى شالا شىعار، قاباعى ىسىك. ءبىراق، ادەتتەگىدەي كۇلىمسىرەپ امانداستى. شىعارماشىلىق ساندالىستاعى ادامنىڭ رەڭكىن العاش تانىدىم. ىشكى جانتالاس پەن سىرتقى سۇرەڭسىزدىك ەڭسەسىن باسقانداي ەكەن. ءبىراق، ول جەڭىلگەنىن مويىندامايتىن اسكەرلەرشە قانمايداندا تىك تۇرا بەرگىسى كەلدى. ءۇنسىز عاشىقتىعىن ەشكىمگە ۇقتىرا الماعان بالاڭ اسكەرلەرشە...
[caption id="attachment_23705" align="alignright" width="579"]
ارداق نۇرعازى ۇلى[/caption]
«شەتەل ادەبيەتى» گازەتىنىڭ ءار سانىن اسىعا توسامىن. قازاق تىلىندە وقىرمانعا وڭاي جەتەتىن ولجانىڭ كولەڭكەسىنەن ۇيقىسىز تۇندەردىڭ، تاۋسىلا تەسىلىپ ءار سويلەمدى ارلەگەن، ءار ءماتىننىڭ استارىن اشقان ماڭداي تەردىڭ ءيىسىن انىق سەزەمىن. گازەت قاعازى دا ەسكىلەۋ، ۇساقتاپ جازىلعان ءار بەتتىڭ كولەمى كىتاپقا سالسا بەس التى بەت، التى بەتتىك بەتتە ءبىر اپتاعا لايىق مازمۇن بار. سول ۋاقىتتاردى ساعىناسىڭ. سول ۋاقىتتا سول ءۇنسىز ءماجنۇننىڭ التى بەتتىك گازەتىنەن لىپىپ ۇشقان ىڭكارلىك، اياۋلى ماحابباتتى سەزىنگەنىڭ ءۇشىن الدەنەگە جاۋاپكەرشىلىگىڭ ۇلعايا تۇسەدى. شىن ءسۇيۋدىڭ باعاسىن، مازمۇنىن، ايقاسىن ۇعاسىڭ. ايعايشىلاردىڭ سۇلباسىن كورىپ تاڭ قالاسىڭ. عاشىقتىق ۇنسىزدىك ەكەن.
ونىڭ اقىن بولۋىنا تولىق مۇمكىندىگى بار. ول قازاق توپىراعىنا الەمدىك ىزدەنىستىڭ ۋنيفورماسىن ەككىسى كەلەدى. ادامزات بولمىسىنىڭ ۇمىت بولعان، قايتالانعان، جادىلانعان جەرىنەن ەمەس، ءىزباسارى، اتۇستارى، جالعاسى، ات باسىن بۇرماي وتۋگە بولمايتىن تۇنەمەلى، باتا قايىرىپ باسىنا تۇنەيتىن قاراشاڭىراعى بولعىسى كەلەدى. بولۋعا مۇمكىندىگى زور. ول ۋاقىتتىڭ باعى. ونىڭ ماعان سىرباز پروزاسى ۇنايدى. ول سالماقتى ماركەستىڭ ءوزىن قازاق قىلۋعا بار. «ولگەن ادام» اڭگىمەسىندەگى ۇستامدىلىق، كەيىپكەرلەردىڭ ەكىنشى، ءۇشىنشى جاقتان سويلەسۋى، كوزىڭ اتىزداي بولاتىن سيۋجەتتى سابىرلى بايانداۋىندا، مىنەز سومداۋىندا ايرىقشا جاڭالىق بار. ءوز باسىم، وسى شىعارماسىن وزگەلەرىنەن جۇلدىزىن جوعارى قويامىن. جاس كەزىندە جازىلسا دا، باپپەن، اسىققا ۇمتىلعان عاشىقتاي ىنتىزارمەن جازىلعان. ونىڭ ۇستىنە، ارۋاق كورگىش ەدگار پو، ارۋاقساتقىش گوگول، ۇرەيسۇيگىش كافكا، قانىسۋىق كاميۋ، قىلمىسكەر دوستويەۆسكيي، ارۋاقتى كەلەكە ەتكەن تۆەن، جۇيكەسى جۇقا كينگ، سوزگە ساراڭ ماركەستىڭ كولەڭكەسى دە جوق. بۇل ءوزى. ناق ارداقتى ارداق ەتەتىن ءتول ستيل. ءتول داۋىس. قازاقى اڭقىما - سابىرلى اڭگىمە.
ول ءوز توپ ەتكەن ۋاقىت پەن بەلدەۋدىڭ تامىرىن باسۋشى. ادامنىڭ رۋحاني ءوسۋىنىڭ شەكسىز شەگىنە ساپارلاپ قايتقىسى بار. سوندىقتان، كەيدە كەرى، كەيدە العا قاراي، كەيدە وڭ مەن سولعا قاراي دا شەكتەۋلىلىكتىڭ قابىن بۇزىپ جارعىسى بار. ەركىندىكتى قاي تۇرعىدا، قاي مۇرساتتا تۇسىنە الاتىنىن ۇنەمى سىناۋشى. ۇنەمى ىزدەۋشى. سارالاۋشى، ساراپتاۋشى. تاريحتىڭ باسقان ىزىنەن بۇگىنگىنى تەكسەرۋشى. ول كۇمان كەلتىرۋشى. اققا دا، قاراعا دا. ول ساندالۋشى. ول اداسقاق. ءار پەندەگە وسى كەپتىڭ ءبارىن جاماۋعا بولار ەدى. ءبىراق، ونىڭ قادامىن اڭدىعاندار نە ايتىپ تۇرعانىمدى تۇسىنەر دەپ ويلايمىن. سودان دا ول، ءوزى ەرىكسىز كەلگەن ورتاعا (ومىرگە، قوعامعا) – مايدانعا وزگەنىڭ بۇدان سۇراماي، تۇسىندىرمەي قويعان تالاپتارىنا مۇرنىن شۇيىرە قارايدى. كەلۋ دە، كەتۋ دە ەرىكسىز ەكەن، نەگە الدەكىم مۇنىڭ سىرتىنان قانداي ويىن وينايتىنىن سۇراماي اق شەشىپ قويادى؟ ويىنعا تازا كىرىسكەندەر ويناي بەرسىن. مايداننىڭ جالعان اتتانىنا شاۋىپ، ۋاقىتىنان بۇرىن مەرت بولا بەرسىن. ادام بوپ كەلگەسىن، الاڭداپ اسپان مەن ارىڭا قاراماساڭ، بەكەرشىلىك.
ول شىعارماشىلىق ادامى، ىزدەنىس ادامى. ول – اقىن. ۇلتتىق كوركەم ادەبيەتتىڭ كوكجيەگىن كەڭەيتۋشى. ول جۇمىسسىز سارساڭ بولعان كۇندەرىندە دە ۇمىتسىزدىكتىڭ قۇدىعىنا قۇلاعان جوق. ونىڭ ادەبيەتتى ءسۇيۋى - ۇلتىن ولەردەي سۇيەتىنىنىڭ كورسەتكىشى.
***
ارداق ءۇشىن پروزا مەن پوەزيا ءبىرى باۋ، ءبىرى تاۋ ەمەس. پروزاسىندا شۇبالاڭقى سويلەم جوق. ەسەسىندە، پوەزياسى ۇيقاستى ەسكەرمەيدى. قازاق توپىراعىنا ەركىن بۋىنسىز اق ولەڭنىڭ جاڭبىرىن توككەن العاشقى اقىن دا – ارداق. جۇمەكەن اقىن مەن ونىڭ ءىزباسارلارىندا، ارداقتىڭ اعىل تەگىل شۇبالعان شۋماقتارىنداي ۇيقاسسىزدىق، ءبىرسارىنسىزدىق جوق. ارداق ناق وسى جۇمەكەن مەكتەبىن جالعاستىرۋشى، الايدا، قايتالاۋشى ەمەس. جۇمەكەن مەكتەبىندەگى تەرەڭدىك پەن ءپالساپالىق، اقپا اق ولەڭ ءتۇرى كەيىنگى بۋىننىڭ تامىرىندا ءوز قويناۋىن تاپتى. ت.تاڭجارىق، ر.دابەي، ى.وجاي سياقتى اقىنداردىڭ شىعارماشىلىعى ناقتى مىسال. الايدا، ارداقتى وسى اقىنداردىڭ سابىنا قوسا المايسىز.
ارداق تازا پوستمودەرنيزم توپىراعىندا تۋعان تۇلعا. پوستمودەرنيزم داستۇرشىلدىكتەن بەزىپ تىنعان مادەنيەت ەمەس. سالت-سانانىڭ، تەكتىك تاريحتىڭ جادىن بۇگىنگى تانىممەن ءتىرىلتۋ. قازاقتىقتان قالعان بولمىسپەن باتىسشا ساندەنۋ. ءبىراق، ارداقتىڭ پوەزياسىن ءالى دە اۋىل ارالىق ەۆوليۋسيادان شىعا الماعان، ونىڭ ۇستىنە كەڭەستىك قالىپقا تۇسكەن تۇيسىكتى ەركىندىكككە جىبەرە الماعان سانامىز قابىلداي الماي-اق قويدى. ونى مويىندايمىز. ارداق تاعى ءبىر عاسىر كەيىن تۋاتىن دارىن ەدى. باعى دا بالكىم، ءبىر عاسىر كەيىن جانار.
پوستمودەرنيستىك باعىتتاعى ادەبيەتتەردىڭ مازمۇنىنا نازار سالساڭىز، كىل ءنوپىرلى ۇرەيدىڭ، قورقىنىشتىڭ، ميفتىك، بولماسا ميستيكالىق سارىننىڭ گراداسيالىق ۇلعايعان تەمپىن اڭعاراسىز. د.امانتايدىڭ "گۇلدەر مەن كىتاپتارىنداعى"، ا.كەمەلبايەۆانىڭ "قوڭىرقازى" مەن "مايياسى"، ءدال وسى كەزەڭدەگى ا.التايدىڭ، د.رامازاننىڭ، ت.احمەتجاننىڭ شىعارماشىلىعىندا "و دۇنيە مەن تىلسىم كۇشتەردەن" شوشىناتىن، ۇنەمى قورقىپ جۇرەتىن كەيىپكەرلەرى تۋدى. ال، ناقتى پوستمودەرنيزمنىڭ ءوز بيىگى - م.وماروۆانىڭ، ل.قونىستىڭ، م.مالىكتىڭ، ق.مۇباراكتىڭ، م.فازىلدىڭ، م.قوسىننىڭ، م.قولعاناتتىڭ شىعارماشىلىعىنان قانىق كورىندى. پوستمودەرنيزمنىڭ ءبىر اشىقتاۋى وسى – ساناداعى ۇركەكتىك. نەگە جەتى اتا-بابامىز ءبىلىپ، تانىپ، ەسكەرتىپ، دىندەگى ۇلكەن كىتاپتاردا جازىلعان باياندار ءبىزدىڭ سانامىزدا سونشالىقتى ۇلكەن ۇرەي تۇعىزدى؟ ۇركەك، قورقاق، سەنبەيتىن، كۇمانشىل بوپ العانىمىز وتىرىك پە؟ نەگە ادەبيەت بۇگىنگى سانانىڭ سيپاتىن ادىپتەۋدەن قاشۋى كەرەك؟ اتا ءدىن، داستۇرىنەن شابىلعان ۇرپاق ارينە، شايتاننىڭ شىلعاۋىندا قالدى. قۇدايعا تاۋبە ەتۋدەن گورى، سابىر ەتۋدەن گورى، شاراپقا مىناجات-مەدەتتى قانداي مادەنيەت دەپ اتاساق بولادى؟
ءححى عاسىر باسىندا باتىستىڭ كينو، ادەبيەت، ونەر الەمىنە "نەو" دەگەن تۇسىنىك ەندى. جاڭا دەگەن. نەو سانا. ءبىر سوزبەن، ءبىزدىڭ مادەنيەت اڭداۋسىز، بەيسانالى ويدىڭ جەتەگىندە كەتتى. سانالى جاسالعان ادەبيەتتىڭ كومپوزيسياسى، فابۋلاسى بولسا، نەو ادەبيەتتىڭ مازمۇنىندا - ءتىپتى مازمۇن بولماۋى مۇمكىن. ارداق ناق پوستمودەرنيزمنىڭ توپىراعىنان وسكەن جەمىس. ارداقتىڭ شىعارماشىلىعىنىڭ ارداقتى بولۋى –قازاقي ويلاۋ كەڭىستىگىنىڭ وزگەشەلىگىندە. ارداق باتىس مادەنيەتىنىڭ فورماسىندا قازاق ءتىلىنىڭ بايتاق كەڭىستىگىن سىيدىرىپ-اق جىبەرەدى. قازاقتىڭ تانىم، ءدىلىن، ويلاۋ ءداستۇرىن فورماعا نوقتالاماۋدىڭ جاڭاشا ءادىسىن كورسەتكەن دە – ارداق. فورما ءۇشىن تىلدەن مۇكىستىك جىبەرۋ نەمەسە ءتىل ءۇشىن فورماسىزدىققا ۇرىنۋدان جازۋشى اسا ساقتىقپەن قارايدى. ارداق وسى ەكى تەندەنسيانى بۇزىپ الماي، تەڭدىكتە ۇستاۋعا تىرىساتىنداي. مۇنى پوەزياسىنان دا، پروزاسىنان دا بايقاۋعا بولادى. راس، ارداق شىعارماشىلىعى ەموسيا مەن سەزىمگە ساراڭ. كۇيىنگەن، لاۋلاعان اۆتورلىق پوزيسيادان گورى سىرتقى كورەرمەندىك ستاتۋسىن ءقادىر تۇتادى.
پوستمودەرنيستىك ادەبيەتتىڭ ءبىر ءتۇسىن - قورقىنىش، ۇرەيلى كۇي دەگەندە، ارداققا دا قاتىستى ايتتىق. "جوعالعان تاس"، "اق بالاپان"، "ولگەن ادام"، "جىلقى" اڭگىمەلەرىندەگى ديالوگتار ءبىر وقىعاندا قاراپايىم عانا قابىلدانادى، الايدا اۆتوردى شىعارماداعى تىلدىك قۇبىلىستار، وقيعانىڭ بەرىلۋ سيپاتى مۇلدە قىزىقتىرمايتىن سەكىلدى. تۇتاس مازمۇندى وقىپ بىتكەسىن عانا اۆتوردىڭ جاسىرعان پولوتنو ارتىنداعى سۋرەتىن شالاسىز.
قانە، قانشالىق تەرەڭگە شوگە الاسىڭ؟!
مۇجىلگەن، مالتا تاستا دا بار قاسىرەت،
تۇڭعيىقتا ماڭگى قالعاندىعى ءۇشىن ەمەس.
دومبىرانىڭ ەكى ىشەگى ەشقاشان تىلدەسپەيدى،
ولاردى شاناقتا ساۋساقتار قوسادى.
مۇحيتتىڭ تەرەڭىنەن جەتكەن ءۇن
قوس ىشەكتىڭ كوكىرەگىندە كۇمبىرلەيدى.
ارداق شىعارمالارىنان كەيىن ءسىز شىتىرمان سيۋجەتتىڭ اسەرىن ەمەس، كوز الدىڭىزدا ۇزاق تا باياۋ قالىقتاعان سۋرەتتى عانا ەلەستەتە الاسىز. شىعارماشىلىعىنان كينو، سۋرەت ونەرىنىڭ كريتەرييلەرىنەن جاماپ-جاسقالعان جاسامپازدىعىن اڭعارۋعا بولادى. تاركوۆسكييدىڭ كورەرمەنىن فينالعا دايىندايتىن تاپجىلماس كارتينالارىنداي ارداق تا وقىرمانىنا ءوزىن ءتۇسىندىرىپ بەرەتىن سۋرەتتەردى لاقتىرا بەرەدى، وزەكتەگى ويىن بەرىپ تىنۋعا اسىقپايدى. ارداقتى تۇگەل وقىپ بولعاسىن تۇسىنەسىڭ.
***
تۇگەل وقىپ بولعاسىن دا تۇسىنبەيسىڭ. ويتكەنى، ساناڭىزدا قيقا-جيقا كەسىندىلەر، باتتاسقان بوياۋلار، جەلكەسى قيىلىپ قالا بەرەتىن وي اعىسى، ءبىر بارماعىن بۇگىپ قالعان يدەيا... سىزگە تۋىندىگەردىڭ جازباسىن قابىلداتپاي تاستايدى. كۇمان كەلتىرە باستايسىز. ءبىراق، ءتاستۇيىن ديالوگ، شىعىنسىز باياندالۋ ءتاسىلى، ءىش بەرمەيتىن تۇتاس تىركەستەر اۆتوردىڭ جازۋعا ماشىقتانعانىن اڭعارتادى. بەينە ءبىر بارماعى جاڭا جازىلىپ قالامساپ ۇستاعان ءبۇلدىرشىننىڭ ءوز ساناسىندا ادىپتەپ سالعان سۋرەتىن سىزگە بىلە تۇرا "بۇل نە؟" دەپ قويعان سۇراعىنداي.
ءسىز تىكبۇرىشتى، ءۇشبۇرىشتى، قۇلاعى دا بار، دوڭگەلەي بىتكەن دەنەسى بار، ءبىراق ءپىشىنى ەشبىر زاتقا انىق ۇقسامايتىن سۋرەتكە ۇزاق قادالاسىز. "يت پا؟ جوق. تانكى ما؟ جوق. ماشينا ما؟ جوق. ءۇي ما؟ جوق. بالا-اۋ، وندا نە؟ مىسىق!" مىنە، جاۋاپ. ارداق، ءوز ساناسىنداعى سۋرەتتى وبرازبەن ويناتىپ سوزگە قۇيعاندا ءسىز شىعارمانىڭ تەرەڭىن بىردەن ۇعا قويمايسىز. ولەڭى دە، قارا ءسوزى دە سول. "ولگەن ادام"، "راس پا، اجە"، "اعىرابي" سەكىلدى اڭگىمەلەرىن، بالكىم، ءۇش قايتارا وقۋ كەرەك شىعار، سوندا دا "مىناۋ شىعار، اناۋ شىعار" دەپ ساناڭىزدا ۇزاق تالداۋعا تۇسەسىز. شىنى كەرەك، باس قاتىرۋعا تىرىسپايسىز دا. بولماشىنى ءسوز ەتىپ، نە ايتقىسى كەلدى دەپ كىتاپتى جابا سالاسىز. جابا سالاسىز عوي، ءبىراق... زەردەلەپ كورسەك شە؟
"راس پا، اجە" اڭگىمەسى سونداي اڭگىمە. اڭگىمەدەگى بار مىسال – بوس تۇرعان تور. اجەسى ۇنەمى جازدىكۇنى بوس تۇرعان توردى اۋلاعا شىعارىپ قويىپ، كۇن كوزىنە جىلىنىپ وتىراتىن. بالا مۇنى سول قالپىنشا ەستە ساقتاپ قالىپتى. بوس توردى نەگە ۇستايدى، سونشاما نەگە باپتايدى دەگەن العاشقى ساۋال وسى جەردە تۋىندايدى. جولداس دوسىنىڭ بوس توردى ۇستاۋ - اقىرى تورعا قۇس قوندىرۋمەن بىتەتىن حيكاياسىن ەستىگەندە – اجەسىنىڭ نيەتىن اڭداعانداي بولامىز. كەيىن، اۆتوردىڭ ءتۇس كورىپ "راس پا، اجە" دەگەنى ءتىپتى، نەنى راستاۋى مۇمكىن دەگەن تاعى ساۋال تۋىنداتادى. اۆتور اجەسىنىڭ ۇيىنە بارعاندا تور جوق بوپ شىعادى. اڭگىمە بارىسىندا اجەسىنىڭ تورى مەن دوسىنىڭ تور تۋرالى حيكاياسىنىڭ لينيالىق بىرلىگى تۇتاسپاي جاتادى. اۆتور بىزگە ءبىر ابزاس سويلەمدى كورسەتپەي قويعانداي كۇي كەشەمىز. ال، راسىندا، اجەسىنىڭ بوس توردى باپتاپ ۇستاۋى، كۇن كوزىنە شىعارىپ قويۋى – الدەبىر ۇزاق سارىلعان ءۇمىتتىڭ، ساعىنىشتىڭ بەينەسى بولۋى مۇمكىن، ال دوسىنىڭ تور تۋرالى حيكاياسى اجەسىنىڭ بۇل قىلىعىن اشىپ بەرەدى. نيەتىڭە قاراي، ءقايسىبىر زاتتى ۇيرەنشىكتى عادەتتەي كوز الدىڭا ەلەستەتىپ ىستەي بەرسەڭ، كۇندەردىڭ كۇنىندە ول رەالعا اينالادى. ءقايسىبىر باستامانىڭ تىرەگى – اۋەلگى بەيسانالى ارەكەتتەن، نەمەسە ىزگى تىلەكتىڭ اڭداۋسىز ارەكەتىمەن جۇزەگە اسىپ جاتادى. جازامىن دەپ كۇندە اق قاعاز بەن قالامساپتى ۇستاپ قاراساڭ، وقيمىن دەپ كۇندە ءبىر كىتاپقا نازار سالار بولساڭ، كۇندەردىڭ كۇنىندە ول كىتاپتى وقيسىڭ، ول قاعازعا سوزدەر جازىلادى. دوستوۆەسكييدىڭ "يديوتىندا" قوناققا بارعان كنياز مىشكين قۇمىرانى "سىندىرىپ الماڭىز" دەگەن ەسكەرتپەسىن كوز الدىنا ەلەستەتە بەرىپ، اقىرى قۇمىرانى سىندىرىپ تىناتىنى ەسىڭىزدى مە؟ ال، اۆتور، "راس پا، اجە" دەۋى – "شىن با، مەن تىرىسسام، تالپىنسام بولعانى تىلەگىمنىڭ ورىندالۋى عاجاپ ەمەس قوي" دەگەن اڭداۋسىز وي ايتادى. وقىرمان، بۇل شىعارمانىڭ كىلتىن پسيحواناليتيكالىق تالداۋعا سالساق قانا قۇپياسىن اشا الامىز. شىعارمانىڭ كوركەمدىك قۇپياسى دا سول – اۆتور اجەسىنىڭ بوس تورىنا بالا كەزدەن كوزى تۇسكەن، كەۋدەسىنە كوشىرىپ العان. اۆتور بويىندا دا وسى بوس توردىڭ نىشانى جاتىر. بۇل ءوز كەۋدەسىن بوستىق كەرنەگەن زامان ادامىنىڭ زارى ەمەي نەمەنە؟
***
ارداق نۇرعازى تارباعاتاي تاۋىنىڭ تۋماسى. الماتىداي دۇردەي قالادا پوستمودەرنيستىك باعىتتاعى ادەبي تارتىس-تالاستاردىڭ ورتاسىندا ساۋاتتى پىكىر ايتا الاتىن، ورنىقتى ۇستانىمى، جەكە كوزقاراسى بار جازۋشى. تارباعاتايدان ءبىر ۋىس توپىراق الماتىعا ورنىعىپ، قۇنارىن جايىپ، جەرگىلىكتى قارا توپىراققا قانشالىقتى جۇعىستى، جۇعىمدى ءھام قۇنارىنان قانشالىقتى قاۋلاعان قاراعاي باس كوتەرەرىن ءبىر عازيز ۋاقىتتىڭ ءوزى شەشەدى. ءبىز تەك، قالامگەردىڭ تابيعاتىنا، بولمىسىنا شولۋ جاسادىق.
ساعادات ورداشيەۆا،
اقتوبە قالاسى
