"نادەجدا ساۆچەنكو ۋكراينا سيمۆولىنا اينالدى", – دەپ مەلٸمدەدٸ ۋكراينا پرەزيدەنتٸ پەتر پوروشەنكو سەرسەنبٸ كٷنٸ كيەۆ رەزيدەنتسيياسىندا ۋكراينالىق ەسكەري قىزمەتكەردٸڭ بوساتىلىپ, ەلٸنە قايتارىلعاننان كەيٸنگٸ سٶيلەگەن سٶزٸندە.
پوروشەنكو باتىس ەلدەرٸنە ساۆچەنكونى بوساتۋعا كٶمەكتەسكەنٸ ٷشٸن العىسىن جەتكٸزٸپ, ۋكراينا "نادەجدانى قايتارىپ العان سەكٸلدٸ, دونباسس پەن قىرىمدى دا قايتارادى" دەپ مەلٸمدەدٸ.
پوروشەنكومەن بٸرگە كٶپشٸلٸك الدىنا شىققان نادەجدا ساۆچەنكو ازاماتتاردى رەسەيدەن قورىقپاي, تٸزە بٷكپەي, قۇقىقتارى ٷشٸن كٷرەسۋگە شاقىردى.
ساۆچەنكو كيەۆكە سەرسەنبٸ كٷنٸ رەسەي پرەزيدەنتٸ ۆلاديمير پۋتين وعان راقىمشىلىق جارييالاعاننان كەيٸن, ۋكراينا پرەزيدەنتٸنٸڭ ۇشاعىمەن كەلدٸ. پۋتيننٸڭ ٶزٸ ايتقانداي, رەسەيلٸك ەكٸ جۋرناليست يگور كورنەليۋك پەن انتون ۆولوشيننٸڭ ٶلٸمٸ ٷشٸن ايىپتالعان ساۆچەنكوعا كەشٸرٸم جاساۋدى قازا تاپقانداردىڭ اتا-انالارى سۇراعان.
دەل سول كٷنٸ ۋكراينا پرەزيدەنتٸ رەسەي ازاماتتارى ەۆگەنيي ەروفەەۆ پەن الەكساندر الەكساندروۆقا راقىمشىلىق جارييالادى. ۋكراينا سوتى ولاردى تەرروريزمگە قاتىسى بار دەپ سوتتاعان. ەكەۋٸ دە مەسكەۋگە ورالدى. پۋتيننٸڭ باسپاسٶز حاتشىسى پەسكوۆتىڭ سٶزٸنشە, ولاردىڭ پرەزيدەنتپەن كەزدەسۋٸ كٷن تەرتٸبٸندە قاراستىرىلماعان.
