10 قاراشادا شامامەن ساعات 17:30-دا پەتروپاۆل قالاسىنداعى «102» ارناسىنا جۇمىسشى كەنتٸنٸڭ تۇرعىنىنان 13 جاستاعى ۇلىنىڭ جوعالىپ كەتكەنٸ تۋرالى حابارلاما تٷستٸ. بالا تاڭەرتەڭ ٷيدەن شىعىپ, قايتىپ ورالماعان. ٶزٸمەن بٸرگە ۇيالى تەلەفونى بولماعان, دەپ حابارلايدى dalanews.kz.
جاسٶسپٸرٸمدٸ ٸزدەۋگە پاترۋلدەۋدە بولعان پوليتسييانىڭ كەشەندٸ كٷشتەرٸ باعىتتالدى. بارلىق قىزمەتتەر, ونىڭ ٸشٸندە جەدەل ەرەكەت ەتۋ ارنايى وتريادىنىڭ جاۋىنگەرلەرٸ جۇمىلدىرىلدى. جۇمىسشى كەنتٸ مەن ونىڭ تٶڭٸرەگٸندەگٸ اۋماقتاردى تەكسەرۋ ٷشٸن ٷش درون كٶتەرٸلدٸ. ورتالىق جەدەل باسقارۋ پۋنكتٸنٸڭ ينسپەكتورلارى بەينەباقىلاۋ كامەرالارىنىڭ جازبالارىن قاداعالادى.
ولارمەن بٸرگە پەتروپاۆل ق. پب ەكٸنشٸ پوليتسييا بٶلٸمٸنٸڭ جەدەل ۋەكٸلٸ تٶرەبەك كالەلوۆ جۇمىس ٸستەدٸ. ول كامەرا جازبالارىنان بالانى انىقتاپ, ونىڭ جۇمىسشى كەنتٸنٸڭ شەتٸندەگٸ زايتسەۆ كٶشەسٸنە دەيٸنگٸ جٷرگەن جولىن باقىلاپ وتىردى.
شامامەن ساعات 18:30 جاسٶسپٸرٸم بٸر ٷيدٸڭ جانىندا ورناتىلعان دەكوراتيۆتٸ پەشكە تىعىلىپ وتىرعان. كەيٸن بالا, پوليتسييا قىزمەتكەرلەرٸنە پەشتە جىلىنىپ, ۇيىقتاپ قالعانىن تٷسٸندٸردٸ. قۇقىق قورعاۋ ورگاندارى ونى تاۋىپ, امان-ەسەن ٷيٸنە الىپ كەلدٸ. اتا-اناسى پوليتسييا قىزمەتكەرلەرٸنە شىن جٷرەكتەن العىس ايتتى.
بالا بۇعان دەيٸن ٷيدەن ٶز ەركٸمەن كەتپەگەن. جاسٶسپٸرٸمنٸڭ ٸس-ەرەكەتٸنە سەبەپ بولعان جاعدايلاردى كەمەلەتكە تولماعاندار ٸسٸ جٶنٸندەگٸ ماماندار انىقتاپ جاتىر. قازٸرگٸ ۋاقىتتا پوليتسييا قىزمەتكەرلەرٸ اتا-انامەن جەنە بالامەن تٷسٸندٸرمە جۇمىستارىن جٷرگٸزدٸ.
