پەتروپاۆلدا حالىقارالىق دەڭگەيدەگى جارىستاردى وتكىزۋگە مۇمكىندىك بەرەتىن مۇز ارەناسى قۇرىلىسى ءجۇرىپ جاتىر،- دەپ حابارلايدى Dalanews.kz
سقو اكىمى عاۋەز نۇرمۇحامبەتوۆ قالانى ارالاۋ كەزىندە قيزاتوۆ كوشەسىندە ورنالاسقان الاڭعا باردى. بۇل جەردە حالىقارالىق ستاندارتتارعا ساي 400 مەترلىك كونكيمەن جۇگىرۋ جولى، ەكى حوككەي كورتى مەن كەرلينگ الاڭدارى بار كوپفۋنكسيونالدى مۇز ارەناسى سالىنادى. جانىندا 50 مەترلىك وليمپيادالىق ءجۇزۋ باسسەينى، جەكپە-جەك پەن كوركەم گيمناستيكا زالدارى، ۆولەيبول، باسكەتبول جانە فيتنەس زالدارى بار امبەباپ سپورت ارەناسى بوي كوتەرەدى. بۇل نىسانداردا حالىقارالىق دەڭگەيدەگى جارىستاردى وتكىزۋگە مۇمكىندىك بولادى.
— وڭىردە حالىقارالىق ستاندارتتارعا ساي سپورت جانە الەۋمەتتىك نىساندار سالۋ باعىتىندا اۋقىمدى جۇمىستار جۇرگىزىلىپ جاتىر. بىلتىر پايدالانۋعا بەرىلگەن ۇستەل تەننيسى ورتالىعى زاماناۋي تالاپتارعا تولىق ساي كەلەدى. سونىمەن قاتار، «قاراساي» ستاديونى ۋەفا ستاندارتتارىنا سايكەس قايتا جاڭعىرتىلعان، — دەدى نىساننىڭ قۇرىلىس بارىسىن كورگەن سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ.
سونىمەن قاتار، ءوڭىر باسشىسى بەرەكە شاعىن اۋدانىنداعى جاڭا وقۋ جىلىندا ەسىگىن اشاتىن جاڭا جايلى مەكتەپتىڭ قۇرىلىسىن تەكسەردى. «جاس وركەن» شاعىن اۋدانىندا بالاباقشا قۇرىلىسى قارقىندى ءجۇرىپ جاتىر. سونداي-اق، عاۋەز نۇرمۇحامبەتوۆ جۇمىسشى كەنتىندەگى جول وتكەلى مەن بەرەكەدەگى مالايا كوشەسىندەگى جول قۇرىلىسىنىڭ بارىسىن باقىلادى. بارلىق مەردىگەرلەرگە قويىلعان باستى تالاپ – ساپالى ءارى ۋاقىتىلى اياقتاۋ.
ازاماتتاردى قابىلداۋ كەزىندە تۇسكەن وتىنىشكە سايكەس وبلىس اكىمى «داريا» بازارىنىڭ سانيتارلىق جاعدايىن تەكسەردى. وبلىس اكىمى بازار يەلەرىنە ساتىپ الۋشىلارعا جايلى جاعداي جاساپ، سانيتارلىق نورمالاردى ساقتاۋ جانە اۋماقتى اباتتاندىرۋ قاجەت ەكەنىن اتاپ ءوتتى.
