پەتروپاۆلدا بىرنەشە لوكاسيادا اباتتاندىرۋ بويىنشا ماڭىزدى جوبالار جۇزەگە اسىپ جاتىر، دەپ حابارلايدى Dalanews.kz
وتكەن جىلعى سۋ تاسقىنىنان زارداپ شەككەن ويقالا شاعىن اۋدانى مەن بىلعارى كەنتىندە 74 سكۆەردى سالۋ بويىنشا اۋقىمدى جۇمىستار باستالدى.
"جوباعا بارلىق اۋداندار مەن قالالىق ۇيىمدار قاتىسۋدا. بىرلەسكەن كۇش-جىگەرمەن 2000 اعاش وتىرعىزىلىپ، شاعىن ارحيتەكتۋرالىق فورمالار، ورىندىقتار، جارىقتاندىرۋ، سەرۋەندەۋ ايماعى ورناتىلادى. فۋتزالعا ارنالعان ەكى مودۋلدىق سپورتزال سالىنىپ، بالالار مەن سپورت الاڭدارى، ۆولەيبول جانە فۋتبول الاڭدارى پايدا بولادى"، - دەپ جازدى ءوڭىر باسشىسى عاۋەز نۇرمۇحامبەتوۆ.
الەمدەگى ەڭ ۇزىن جاياۋ جۇرگىنشىلەر ايماعى - قازاقستان كونستيتۋسياسى كوشەسىن قايتا جاڭعىرتۋ باستالدى. جوبا ءۇش كەزەڭدە جۇزەگە اسادى. قازىرگى ۋاقىتتا استانا كوشەسىنەن پاركوۆايا كوشەسىنە دەيىنگى بولىكتە ينجەنەرلىك جەلىلەر مەن تاس توسەنىشتەردى اۋىستىرۋ، كوگالداندىرۋ جانە عيماراتتاردىڭ قاسبەتىن ءبىرىڭعاي ساۋلەتتىك ستيلدە ارلەۋ جۇمىستارى جۇرگىزىلۋدە. ءبىزدىڭ ورتالىق كوشەمىز بارلىق جاستاعى ادامدار ءۇشىن تارتىمدى ءارى زاماناۋي ورىنعا اينالادى.
تاعى ءبىر ماڭىزدى جوبا — مادەني-اعارتۋشىلىق باعىتتاعى «ماعجان ورتالىعىنىڭ» قۇرىلۋى بولماق. ورتالىقتىڭ جانىندا جاڭا جايلى سكۆەر سالىنادى، ول ءسوزسىز قالا تۇرعىندارىنىڭ سۇيىكتى دەمالىس ورنىنا اينالادى.
