كرەمل وكىلى دميتريي پەسكوۆ رەسەي پرەزيدەنتى ۆلاديمير پۋتين مەن ۋكراينا پرەزيدەنتى ۆلاديمير زەلەنسكييدىڭ كەزدەسۋ ىقتيمالدىلىعىنا قاتىستى مالىمدەمە جاسادى، دەپ حابارلايدى Dalanews.kz.
ريا نوۆوستي اگەنتتىگىنىڭ حابارلاۋىنشا، رەسەي پرەزيدەنتىنىڭ باسپا ءسوز حاتشىسى ۆلاديمير پۋتين مەن ۆلاديمير زەلەنسكييدىڭ كەزدەسۋى ەكى ەل دەلەگاسيالارىنىڭ بەلگىلى ءبىر كەلىسىمدەرگە قول جەتكىزگەن كەزدە مۇمكىن بولاتىنىن ايتقان.
"ەكى ەلدىڭ، ۋكراينا مەن رەسەي پرەزيدەنتتەرىنىڭ، زەلەنسكيي مەن ءپۋتيننىڭ كەزدەسۋ مۇمكىندىگىنە قاتىستى كوپتەگەن سۇراق كەلىپ تۇسۋدە. مۇنداي كەزدەسۋ ەكى تاراپ دەلەگاسيالارىنىڭ جۇمىسىنىڭ ناتيجەسىندە بەلگىلى ءبىر ۋاعدالاستىقتارعا قول جەتكىزىلگەن كەزدە مۇمكىن بولادى. ونداي جاعداي ابدەن مۇمكىن دەپ سانايمىز. ءبىراق بۇل ەكى تاراپتىڭ كەلىسىمدەرى تۇرىندە بەلگىلى ءبىر ناتيجەلەرگە قول جەتكىزگەننەن كەيىن"، - دەدى دميتريي پەسكوۆ.
پەسكوۆتىڭ كەلىسسوزدەرگە قاتىستى وزگە مالىمدەمەلەرءى مىنالاردى قامتىدى:
- ۋكراينا ماسەلەسىن رەتتەۋ بويىنشا جۇمىس ەندى باستالدى، ول جالعاسىن تاباتىن بولادى.
- رەسەي دەلەگاسياسىنىڭ قۇرامىن وزگەرتۋ تۋرالى ءسوز جوق.
- ماسكەۋ مەن كييەۆ اتىستى توقتاتۋ شارتتارىنىڭ تىزىمىدەرىمەن الماسۋعا كەلىستى، جۇمىستار جۇرگىزىلۋدە.
- رەسەي مەن ۋكراينانىڭ كەلىسسوزدەرى ءجۇرىپ جاتىر جانە ول جابىق رەجيمدە ءجۇرۋى كەرەك.
- كەلىسسوزدەردىڭ كەلەسى كەزەڭىنە دەيىن قول جەتكىزىلگەن كەلىسىمدەردى ورىنداۋ قاجەت.
- ىستامبۇلداعى كەلىسسوزدەرەن كەيىن رەسەي مەن اقش باسشىلارى بايلانىسقا شىققان جوق.
- كرەمل پۋتين مەن ترامپ تەلەفون ارقىلى سويلەسۋگە نيەت تانىتىپ جاتسا، بۇل تۋرالى كوپشىلىكتى حاباردار ەتەدى.
ايتا كەتسەك، كۇنى كەشە ىستامبۇلدا رەسەي مەن ۋكراينانىڭ كەلىسسوزدەرى ءوتتى. بۇعان دەيىن ۆلاديمير زەلەنسكيي تۇركياداعى كەلىسسوزدەردە پۋتينمەن جەكە كەزدەسكىسى كەلەتىنىن ايتقان. ناتيجەسىندە قوس دەلەگاسياعا دا مەملەكەت باسشىلارى باسشىلىق ەتپەدى. پۋتين ءوز دەلەگاسيانىڭ باسشىسى رەتىندە ءوزىنىڭ كومەكشىسى ۆلاديمير مەدينسكييدى، ال زەلەنسكيي قورعانىس ءمينيسترى ۋمەروۆتى تاعايىندادى. كەلىسسوزدەردەن كەيىن رەسەي مەن ۋكراينا دەلەگاسيالارىنىڭ باسشىلارى ءوز مالىمدەمەلەرىن جاسادى. ىلە-شالا ەۋروپالىق وداق رەسەي فەدەراسياسىنا قارسى ازىرلەپ جاتقان بۇرىن-سوڭدى بولماعان كەڭ اۋقىمدى سانكسيالارعا قاتىستى مالىمەتتەردى جاريالادى.
