قايىرىمدىلىققا جينالعان قارجىنى جىمقىردى دەگەن كۇدىككە ىلىنگەن پەريزات قايرات پروكۋرورلار ارتقان ايىپتى مويىندامادى، دەپ حابارلايدى Dalanews.kz.

"ايىپتاۋلار نەگىزسىز. تەرگەۋ قيالى ءۇشىن مەن جاۋاپتى ەمەسپىن. مەن وزىمە تاعىلعان ايىپتى مويىندامايمىن. كەيىن بارلىق فاكتى بويىنشا ءوزىمدى قورعايمىن"، دەدى پەريزات قايرات سوتتا.

بۇعان دەيىن پەريزات قايراتتىڭ جوعارى ءبىلىمى بولماعانى انىقتالعانىن حابارلاعان ەدىك. ءوزىن بىرنەشە رەت شەتەلدە جوعارى ءبىلىم الدىم دەپ كورسەتكەن پەريزات قايراتتىڭ شىن مانىندە جوعارى ءبىلىمى جوق ەكەنى انىقتالدى. ايىپتاۋشى تاراپتىڭ مالىمەتىنشە، ونىڭ تەك اياقتالماعان ورتا ءبىلىمى عانا بار.

پروكۋرورلاردىڭ ايتۋىنشا، پەريزات قايرات جۇرتقا ءوزىن تابىستى كاسىپكەر رەتىندە كورسەتۋ ءۇشىن بىرىككەن اراب امىرلىكتەرىندە تۇرعانىن جانە وتباسىمەن ەت جەتكىزۋ ىسىمەن اينالىسقانىن ايتقان، الايدا بۇل اقپاراتتىڭ ءبارى جالعان بولعان.

ايتا كەتەيىك، قازىرگى تاڭدا پەريزات قايراتقا قاتىستى نەگىزگى سوت وتىرىسى باستالدى.

سوت پروسەسىن جۋرناليستەر تەك ارنايى ۇيىمداستىرىلعان باسپا ءسوز ورتالىعىنان باقىلاپ وتىر. ال سوت زالىندا بەينەجازبا جاساۋعا، تىكەلەي ەفير جۇرگىزۋگە جانە ونلاين كورسەتىلىمگە تىيىم سالىنعان. سۋديا سابىرجان كاريموۆ مۇنى سوت بارىسىندا قۇپيا اقپاراتتىڭ جاريالانىپ كەتۋ قاۋپىمەن ءتۇسىندىردى.

ەسكە سالا كەتەيىك، پەريزات قايرات قايىرىمدىلىققا بولىنگەن 3 ميلليارد تەڭگەدەن اسا قارجىنى جىمقىردى دەگەن كۇدىكپەن ۇستالعان بولاتىن.