مامىلەگە كوڭىلى تولماعان ارمياندار الدىمەن ۇكىمەت ءۇيىنىڭ الدىنا جينالىپ، ارتىنشا پارلامەنتكە لاپ قويدى دەپ حابارلايدى Dalanews.kz
جۇرت عيماراتتىڭ ەسىك-تەرەزەسىن تالقانداپ، پاشينيان كەڭسەسىنىڭ قاق ماڭبايىنداعى تاقتايشانى جۇلىپ العان.
"اشىنعان جۇرت وزگە دە كابينەتتىڭ ەسىك-تەرەزەسىن بۇزىپ، ىشكە ەنۋدە" دەپ حابارلايدى تاسس ءتىلشىسى.
ۆۆس اگەنتتىگىنىڭ حابارلاعانىنداي پارلامەنت ۇيىنە باسىپ كىرگەن حالىق ۇكىمەتتىڭ وتستاۆكاعا كەتۋىن تالاپ ەتۋدە.
"حالىق پاشينياننىڭ ىس-ارەكەتىن ساتقىندىققا بالاپ وتىر ءارى كۇيرەي جەڭىلگەنىنىڭ بەلگىسى دەپ ەسەپتەيدى. ولار سوڭىنا دەيىن سوعىسۋعا ءازىر جانە جەڭىسكە جەتەرىنە سەنىمدى. مۇنى ۇرىس الاڭىنداعى احۋالعا وڭ باعا بەرگەن قورعانىس مينيسترىلىگىنىڭ مالىمدەمەسى ۋشىقتىرا ءتۇستى"، – دەيدى اگەنتتىك ءتىلشىسى.
اگەنتتىك ارميان پارلامەنتىنە باسىپ كىرگەن ازاماتتاردىڭ سوزىنەن ءۇزىندى كەلتىرەدى.
"پاشينياندى وسى اراعا الىپ كەلىڭىزدەر! وعان مۇندايعا قول قويۋعا كىم رۇقسات بەردى؟"، – دەيدى ميتينگىگە قاتىسۋشىلاردىڭ ءبىرى.
پوليسيا نارازى جۇرتقا كەدەرگى كەلتىرىپ جاتقان جوق. ينتەرفاكستىڭ جازعانىنداي ەرەۋىلگە شىققان ەلدىڭ ءبىر بولىگى پاشينيان مەن وزگە دە ۇكىمەت مۇشەلەرى تۇراتىن كوتتەدج اۋداندى بەتكە العان.
"كۇزەتشىلەر پاشينياننىڭ ۇيدە جوق ەكەنىن مالىمدەدى. پوليسيا مەن نارازى جۇرت جانجالداسىپ قالۋى ابدەن مۇمكىن"، – دەيدى ينتەرفاكس.
الاڭعا شىققان ەل پارلامەنت سپيكەرى ارارات ميرزوياندى قىزمەتتىك كولىگىنەن سۋىرىپ الىپ، سوققىعا شىققان. ول اۋرۋحاناعا جەتكىزىلگەن.
وسىنىڭ الدىندا ارمەنيا ۇكىمەتىنىڭ باسشىسى نيكول پاشينيان ءازىربايجان پرەزيدەنتى ءىلحام الييەۆپەن بىتىمگە كەلىپ، تاۋلى قاراباقتاعى سوعىستى توقتاتۋ تۋرالى كەلىسىمگە قول قويعانىن مالىمدەگەن.
پاشينيان ءوزىنىڭ بۇدان وزگە امالى قالماعانىن ايتقان.
“بۇل ۇيعارىم سوعىس جاعدايى جانە اسكەري احۋالمەن جەتە تانىس ازاماتتارمەن اقىل-كەڭەسكەننەن كەيىن قابىلداندى. ساربازدارىمىز تەرروريستەرگە، ناتو-داعى سانى جاعىنان ەكىنشى ورىندا تۇرعان مەملەكەت پەن ءازىربايجان اسكەرىنە قارسى قاسىق قانى قالعانشا قارسىلاستى. بۇل ايتۋعا عانا وڭاي شارۋا”، – دەدى ارميان پرەمەرى.
ناتو اسكەرىن تىلگە تيەك ەتكەن پاشينيان وسى ارقىلى ءازىربايجانعا جان-جاقتى قولداۋ كورسەتىپ وتىرعان تۇركيانى مەڭزەگەنى انىق. ءوز كەزەگىندە باكۋ دا، انكارا دا “ۇرىس الاڭىندا وزگە ەلدىڭ اسكەري كۇشى جوق” دەپ مالىمدەگەن.
