Mámilege kóńili tolmaǵan armándar aldymen Úkimet úıiniń aldyna jınalyp, artynsha Parlamentke lap qoıdy dep habarlaıdy Dalanews.kz
Jurt ǵımarattyń esik-terezesin talqandap, Pashınán keńsesiniń qaq mańbaıyndaǵy taqtaıshany julyp alǵan.
"Ashynǵan jurt ózge de kabınettiń esik-terezesin buzyp, ishke enýde" dep habarlaıdy TASS tilshisi.
VVS agenttiginiń habarlaǵanyndaı parlament úıine basyp kirgen halyq Úkimettiń otstavkaǵa ketýin talap etýde.
"Halyq Pashınánnyń is-áreketin satqyndyqqa balap otyr ári kúıreı jeńilgeniniń belgisi dep esepteıdi. Olar sońyna deıin soǵysýǵa ázir jáne jeńiske jeterine senimdi. Muny urys alańyndaǵy ahýalǵa oń baǵa bergen Qorǵanys mınıstriliginiń málimdemesi ýshyqtyra tústi", – deıdi agenttik tilshisi.
Agenttik armán parlamentine basyp kirgen azamattardyń sózinen úzindi keltiredi.
"Pashınándy osy araǵa alyp kelińizder! Oǵan mundaıǵa qol qoıýǵa kim ruqsat berdi?", – deıdi mıtıńige qatysýshylardyń biri.
Polısıa narazy jurtqa kedergi keltirip jatqan joq. Interfakstiń jazǵanyndaı ereýilge shyqqan eldiń bir bóligi Pashınán men ózge de úkimet músheleri turatyn kotej aýdandy betke alǵan.
"Kúzetshiler Pashınánnyń úıde joq ekenin málimdedi. Polısıa men narazy jurt janjaldasyp qalýy ábden múmkin", – deıdi Interfaks.
Alańǵa shyqqan el parlament spıkeri Ararat Mırzoıandy qyzmettik kóliginen sýyryp alyp, soqqyǵa shyqqan. Ol aýrýhanaǵa jetkizilgen.
Osynyń aldynda Armenıa úkimetiniń basshysy Nıkol Pashınán Ázirbaıjan prezıdenti İlhám Álıevpen bitimge kelip, Taýly Qarabaqtaǵy soǵysty toqtatý týraly kelisimge qol qoıǵanyn málimdegen.
Pashınán óziniń budan ózge amaly qalmaǵanyn aıtqan.
“Bul uıǵarym soǵys jaǵdaıy jáne áskerı ahýalmen jete tanys azamattarmen aqyl-keńeskennen keıin qabyldandy. Sarbazdarymyz terrorısterge, NATO-daǵy sany jaǵynan ekinshi orynda turǵan memleket pen Ázirbaıjan áskerine qarsy qasyq qany qalǵansha qarsylasty. Bul aıtýǵa ǵana ońaı sharýa”, – dedi armán premeri.
NATO áskerin tilge tıek etken Pashınán osy arqyly Ázirbaıjanǵa jan-jaqty qoldaý kórsetip otyrǵan Túrkıany meńzegeni anyq. Óz kezeginde Baký da, Ankara da “urys alańynda ózge eldiń áskerı kúshi joq” dep málimdegen.
