وزبەكستاندا بەلگىلى ەكس شەنەۋنىككە قاستاندىق جاسالدى. بۇل تۋرالى جەرگىلىكتى Kun.uz باسىلىمى جازدى، - دەپ حابارلايدى Dalanews.kz

26 قازانعا قاراعان ءتۇنى وزبەكستان پرەزيدەنتى اكىمشىلىگىنىڭ اقپاراتتىق ساياسات دەپارتامەنتىنىڭ بۇرىنعى باستىعى كوميل اللامجونوۆقا قارۋلى شابۋىل جاسالعان.

دەرەككوز مالىمەتىنشە، شابۋىل كيبراي اۋدانىنداعى كوميل اللامجونوۆتىڭ ءۇيىنىڭ ماڭىندا تۇنگى ساعات 1:30 شاماسىندا بولعان. بەلگىسىز ەكى ادام كولىككە بىرنەشە رەت وق جاۋدىرىپ، وقيعا ورنىنان قاشىپ كەتكەن. اللامجونوۆ زارداپ شەككەن جوق.

باسىلىم دەرەگىنە سۇيەنسەك، كوميل اللامجونوۆ 30 قىركۇيەكتە وزبەكستان پرەزيدەنتى اكىمشىلىگىنىڭ اقپاراتتىق ساياسات دەپارتامەنتىنىڭ باسشىسى قىزمەتىنەن بوساتىلدى. كەيىنىرەك ول جەكە سەكتوردا جۇمىسىن جالعاستىراتىنىن مالىمدەدى.

كوميل اللامجونوۆ 1984 جىلى 18 قىركۇيەكتە دۇنيەگە كەلگەن. وزبەكستان مەملەكەتتىك ونەر جانە مادەنيەت ينستيتۋتىنىڭ (2006) جانە تاشكەنت مەملەكەتتىك ەكونوميكالىق ۋنيۆەرسيتەتىنىڭ (2010) تۇلەگى.

2020-2022 جىلدارى ۇلتتىق بۇقارالىق اقپارات قۇرالدارىن قولداۋ جانە دامىتۋ قوعامدىق قورىنىڭ قامقورشىلىق كەڭەسىنىڭ ءتوراعاسى بولدى.

بۇعان دەيىن، 2018 جىلعى قاراشادان باستاپ پرەزيدەنت اكىمشىلىگى جانىنداعى اقپارات جانە بۇقارالىق كوممۋنيكاسيالار اگەنتتىگىنىڭ ديرەكتورى بولعان. بۇعان دەيىن وزبەكستان پرەزيدەنتىنىڭ باسپا ءسوز حاتشىسى جانە مەملەكەت باسشىسى اكىمشىلىگى باسشىسىنىڭ ورىنباسارى بولىپ جۇمىس ىستەگەن.

باق-تا ونىڭ وزبەكستان پرەزيدەنتىنىڭ قىزى سايدا ميرزييەۆانىڭ جاقتاسى ەكەنى ايتىلادى.