Ózbekstanda belgili eks sheneýnikke qastandyq jasaldy. Bul týraly jergilikti Kun.uz basylymy jazdy, - dep habarlaidy Dalanews.kz
26 qazanǵa qaraǵan túni Ózbekstan prezidenti ákimshiliginiń aqparattyq saiasat departamentiniń burynǵy bastyǵy Komil Allamjonovqa qarýly shabýyl jasalǵan.
Derekkóz málimetinshe, shabýyl Kibrai aýdanyndaǵy Komil Allamjonovtyń úiiniń mańynda túngi saǵat 1:30 shamasynda bolǵan. Belgisiz eki adam kólikke birneshe ret oq jaýdyryp, oqiǵa ornynan qashyp ketken. Allamjonov zardap shekken joq.
Basylym deregine súiensek, Komil Allamjonov 30 qyrkúiekte Ózbekstan prezidenti ákimshiliginiń aqparattyq saiasat departamentiniń basshysy qyzmetinen bosatyldy. Keiinirek ol jeke sektorda jumysyn jalǵastyratynyn málimdedi.
Komil Allamjonov 1984 jyly 18 qyrkúiekte dúniege kelgen. Ózbekstan memlekettik óner jáne mádeniet institýtynyń (2006) jáne Tashkent memlekettik ekonomikalyq ýniversitetiniń (2010) túlegi.
2020-2022 jyldary ulttyq buqaralyq aqparat quraldaryn qoldaý jáne damytý qoǵamdyq qorynyń qamqorshylyq keńesiniń tóraǵasy boldy.
Buǵan deiin, 2018 jylǵy qarashadan bastap prezident ákimshiligi janyndaǵy Aqparat jáne buqaralyq kommýnikatsiialar agenttiginiń direktory bolǵan. Buǵan deiin Ózbekstan prezidentiniń baspasóz hatshysy jáne memleket basshysy ákimshiligi basshysynyń orynbasary bolyp jumys istegen.
BAQ-ta onyń Ózbekstan prezidentiniń qyzy Saida Mirzievanyń jaqtasy ekeni aitylady.
