Jambyl oblysy Qordai aýdany Qarakemer aýylynda 14 jastaǵy oqýshy Qali Qýanysh Temirbekuly qaitys boldy. Marqumnyń týystary onyń ólimine mekteptegi jaǵdai sebep bolýy múmkin degen pikirde, dep habarlaidy dalanews.kz.
Ábil Núsipbaev atyndaǵy №14 orta mekteptiń 7-synybynda oqyǵan Qýanysh otbasyndaǵy alty qyzdyń arasyndaǵy jalǵyz ul bolǵan. Otbasynyń málimetinshe, qaiǵyly jaǵdai 25 aqpanda bolǵan. Sol kúni algebra sabaǵynda oqýshy taqtadaǵy jazýdy kóre almai, telefonymen sýretke túsirgen kezde kadrǵa muǵalim de túsip qalǵan. Týystarynyń aitýynsha, muǵalim Qýanyshtan ózin ádeii túsirgen-túsirmegenin surap, bala taqtany ǵana túsirgenin aitqanyna qaramastan, oǵan 200 myń teńge kóleminde aiyppul tóleitinin aityp, túsinikteme jazdyrǵan.
Osydan keiin muǵalim oqýshyǵa ákesin shaqyrýdy tapsyrǵan. Qýanysh ákesin ertip keletinin aityp, qońyraýǵa shamamen bir minýt qalǵanda mektepten shyǵyp ketken. Otbasynyń aitýynsha, odan keiin oqýshyny birden izdestirilmegen.
"Bir saǵattai ýaqyt ótken. Keiin taǵy eki-úsh sabaq bolǵan. Onyń ishinde basqa muǵalimniń jáne direktordyń sabaǵy da bolǵan. Biraq eshkim Qýanyshty izdemegen. Synyptastary alańdap, ata-anasyna habarlasqysy kelgen, alaida onyń telefonyn alyp qoiǵan", - deidi marqumnyń jaqyndary.
Keiin algebra pániniń muǵalimi otbasynyń úlken qyzyna telefon shalyp, Qýanysh mektepten ketip qalǵanyn habarlaǵan. Sol kúni keshke oqýshyny týystarynyń biri úi mańynan óli tapqan.
Qaiǵyly jaǵdaidan keiin mektep direktory, direktordyń orynbasary jáne synyp jetekshisi otbasyǵa kóńil aitýǵa barǵanymen, algebra pániniń muǵalimi kelmegen. Marqumnyń otbasy 500 myń teńgege advokat jaldaǵanymen, istiń alǵa jyljýyna qatysty kútken nátijeni ala almaǵanyn jetkizdi. Olar algebra muǵalimine tiisti shara qoldanýdy, sondai-aq, mektep direktory men muǵalim arasynda týystyq bailanys bar-joǵyn tekserýdi suraidy.
"Maldan aiyrylyp otyrǵan joqpyz, adamnan aiyrylyp otyrmyz. Ol - alty qyzdyń arasyndaǵy jalǵyz baýyrymyz", - deidi otbasy.
Politsiia departamenti bul derek boiynsha qylmystyq is qozǵalǵanyn rastady.
"Qazir oqiǵanyń mán-jaiyn anyqtaý úshin tergeý áreketteri júrgizilip jatyr", - delingen politsiia habarlamasynda.
