ءقازىر زارداپ شەككەندەردىڭ ىشىنەن 94 ادام اۋرۋحانادا جاتىر، اۋىر جارالانعاندار دا بار. 149 ادام العاشقى كومەك الىپ، ۇيلەرىنە جىبەرىلگەن.
بۇل دەرەكتەردى 4 شىلدەدە ۇلتتىق گۆارديا مەن وزبەكستان باس پروكۋراتۋراسى بريفينگتە مالىمدەدى.
بۇعان قوسا، پوليسيا 516 ادامدى ۇستاعانى دا ايتىلدى. ۇستالعاندارعا قاتىستى تەرگەۋ ءجۇرىپ جاتىر، كەيبىرىنە اكىمشىلىك جازا بەرىلىپ، قاماۋدان بوساتىلدى دەدى بريفينگتە.
ۇلتتىق گۆارديانىڭ باسپا ءسوز حاتشىسى داۆرون جۇمانازاروۆ جارالانعان 243 ادامنىڭ 38ء-ى – ورگان قىزمەتكەرى ەكەنىن ايتتى. ونىڭ ايتۋىنشا، ورگان وكىلدەرى اراسىندا اۋىر جارالانعاندار بار.
ۇلتتىق گۆارديا وكىلى دۇيسەنبىدەن باستاپ قاراقالپاقستاندا بارلىق دۇكەن، بازار، بيرجا، بانك، اۋرۋحانالار مەن الەۋمەتتىك نىسانالار جۇمىسىن باستاعانىن؛ سۋ، جارىق، گاز دا تۇرعىندارعا قالىپتى رەجيمدە بەرىلىپ جاتقانىن جەتكىزدى.
1 شىلدەدە قاراقالپاقستاندا جۇرت وزبەكستان كونستيتۋسياسىنداعى وزگەرىستەرگە قارسى جاپپاي نارازىلىققا شىققان. تاشكەنت كونستيتۋسيانى وزگەرتىپ، قاراقالپاقستاندى "ەگەمەن" ستاتۋسىنان جانە وزبەكستاننان ءبولىنۋ قۇقىعىنان ايىرماق بولعان.
2 شىلدەدە وزبەكستان پرەزيدەنتى شاۆكات ميرزيايەۆ نۇكىسكە بارىپ، كونستيتۋسياداعى قاراقالپاقستانعا قاتىستى باپتار وزگەرمەيتىنىن ايتىپ، قاراقالپاقستاندا توتەنشە جاعداي جاريالادى. ايماققا ۇلتتىق گۆارديا كۇشتەرى ەنگىزىلىپ، ۇيالى تەلەفون مەن ينتەرنەت جۇمىسى ناشارلادى. 3 شىلدەدە ميرزيايەۆ قاراقالپاقستانداعى نارازىلىق كەزىندە ادام شىعىنى بولعانىن مويىندادى.
قاراقالپاقستان - وزبەكستان اۋماعىنىڭ 40 پايىزىن الىپ جاتقان رەسپۋبليكا. مۇندا ەكى ميلليونعا جۋىق ادام تۇرادى، ولاردىڭ اراسىندا قاراقالپاقتار، وزبەكتەر جانە قازاقتار بار. قاراقالپاقستان رەسپۋبليكاسى 1925 جىلى قۇرىلىپ، 1930 جىلعا دەيىن قازاق CCر قۇرامىندا بولادى. 1936 جىلى وزبەك سسر قۇرامىنا قوسىلعان.
1990 جىلى 14 جەلتوقساندا وزبەك سسر قۇرامىنداعى قاراقالپاق اۆتونومدى رەسپۋبليكاسىنىڭ پارلامەنتى تولىق تاۋەلسىزدىك الۋ جونىندە دەكلاراسيا قابىلداعان. الايدا 1993 جىلى وزبەكستان مەن قاراقالپاقستان كەلىسىمگە قول قويىپ، قاراقالپاقستان 20 جىل وزبەكستان قۇرامىندا بولادى دەپ كەلىسكەن.
كەلىسىمدە قاراقالپاقستان وزبەكستان قۇرامىنان رەفەرەندۋم ارقىلى شىعۋ قۇقىعى قاراستىرىلعان ەدى. 2013 جىلى بۇل كەلىسىمنىڭ ۋاقىتى بىتكەن، ال ۋادە قاعاز كۇيىندە قالدى. ءقازىر قاراقالپاقستاننىڭ تاۋەلسىزدىگى جايلى ايتىپ جۇرگەن "العا، قارقالپاقستان" قوزعالىسىنىڭ مۇشەلەرى وزبەكستانداعى قىسىمنان سوڭ شەتەلگە كەتكەن.
دەرەككوز: azattyq.org
