قالامىزدا «كيەلى مەكەن» اكسياسى جالعاسۋدا. بۇگىن اتالعان ەكوناۋقاننىڭ اياسىندا ارداگەرلەر مەن جاستار بىرلەسىپ، قالاداعى جەڭىس پاركىن تازالادى، دەپ حابارلايدى Dalanews.kz وبلىس اكىمدىگىنىڭ باسپا ءسوز قىزمەتىنە سىلتەمە جاساپ.
بۇل پارك بىلتىردان بەرى كۇردەلى جوندەۋدەن ءوتىپ جاتىر. جاسىل جەلەكتەر ەگىلىپ، اعاشتار اكتەلىپ، ورىندىقتار مەن قوقىس جاشىكتەرى اۋىستىرىلىپ، گۇلزارلار جاسالعان بولاتىن. سونداي-اق مۇندا ۇوس-عا قاتىسقان ارداگەرلەردىڭ سۋرەتى بەينەلەنگەن پاننو ورناتىلىپ، شاعىن ساۋلەتتىك نىساندار قويىلدى. ەڭ باستىسى – پاركتىڭ اۋماعىندا اۋعان سوعىسى مەن ۇوس ارنالعان ۇلكەن ەكى ەسكەرتكىش بار.
بۇل كۇنى ساياباققا ارداگەرلەر مەن جاستاردان 100 ادام جينالىپ، پارك اۋماعىن قوقىستان، جەرگە تۇسكەن سارى جاپىراقتاردان، ارامشوپتەردەن تازارتتى. ەسكەرتكىشتەردىڭ توڭىرەگى سىپىرىلىپ، جۇرتشىلىق ءبىر ادامداي ەڭبەك ەتتى. ناتيجەسىندە بۇل جەردەن 35 قاپ قوقىس شىعارىلدى.
«وتكەننەن ساباق الماي، كەلەشەككە قادام باسا المايمىز. وسىنداي تاريحي ەسكەرتكىشتەردىڭ جان-جاعى تازا بولىپ تۇرسا، ۇرپاقتارىمىز اتا-بابالارىنا ۇنەمى تاعزىم جاساپ تۇرسا، كەرەمەت ەمەس پە؟ «كيەلى مەكەن» اكسياسىن بۇقارا تۇگەلدەي قولداۋى كەرەك دەپ ويلايمىن. سەبەبى، بۇل – جاي عانا سەنبىلىك ەمەس، بۇل – بالالارعا تاربيە بەرۋ، حالىقتى تازالىققا شاقىرۋ»، - دەدى اۋعان سوعىسىنىڭ ارداگەرى الداجار سەيىت ۇلى شارانى قورىتىندىلاپ.
