وبلىس اكىمىنىڭ ەسەبى ءوڭىر باسشىسىنىڭ رەسمي اككاۋنتتارى ارقىلى الەۋمەتتىك جەلىلەردە، سونداي-اق «التاي» جانە «سەمەي» تەلەارنالارىندا تىكەلەي ەفيردە كورسەتىلدى.
2020 جىلعى جۇمىس قورىتىندىلارعا نازار اۋدارعان جان شىعىس قازاقستان وبلىسىنىڭ نەگىزگى ستراتەگيالىق ماقساتتاردى تابىستى ىسكە اسىرۋ ءىسى جالعاساتىنىن بايقاۋعا بولادى. ءوز كەزىگىندە ءوڭىر باسشىسى دانيال احمەتوۆ كوروناۆيرۋس پاندەمياسىنا قاراماستان، وتكەن جىلدىڭ الەۋمەتتىك-ەكونوميكالىق كورسەتكىشتەرى وڭ ديناميكاعا يە ەكەنىن اتاپ ءوتتى.
ينۆەستيسيالار كولەمى 112%-عا، قۇرىلىس جۇمىستارى – 127%-عا، ونەركاسىپتىك ءوندىرىس – 101،5%-عا، اۋىل شارۋاشىلىعى – 102،6%-عا وسكەن. تۇرعىن ءۇي سالاسىنداعى كورسەتكىش 118%-عا ارتىپ، 520 مىڭ شارشى مەتردەن استام باسپانا پايدالانۋعا بەرىلدى. ال جۇمىسسىزدىق دەڭگەيى 4،9%-دان اسپاعان (ق ر بويىنشا-5%).
– COVID-19 حالىق دەنساۋلىعىن ساقتاۋ، سىرقاتتانۋشىلىقتىڭ كۇرت وسۋىنە جول بەرمەۋ، ينفەكسيانىڭ تارالۋىن باسەڭدەتۋ ءىسى ءبىرىنشى ورىنعا قويىلدى. قازىرگى ۋاقىتتا ەپيدەميولوگيالىق جاعدايدى تۇراقتى، – دەدى شقو اكىمى ەسەپ بەرۋ كەزدەسۋىن اشىپ.
– وتكەن جىلى وبلىستىڭ مەديسينالىق مەكەمەلەرىنىڭ ماتەريالدىق-تەحنيكالىق بازاسىن نىعايتۋ ءۇشىن قوسىمشا 174 ءوجج اپپاراتى، ونىڭ ىشىندە 2 بالالار (CPAP)، 10 رەنتگەن-اپپاراتى، 3 ەكمو، 3 كومپيۋتەرلىك توموگراف، زاماناۋي تەحنيكامەن جابدىقتالعان 216 جەدەل جاردەم ءاۆتوموبيلى ساتىپ الىندى. جالپى، ءوڭىردىڭ دەنساۋلىق ساقتاۋ سالاسىن دامىتۋعا وتكەن جىلى 37،3 ملرد تەڭگە جۇمسالدى.
سونىمەن قاتار، ناۋقاستى ەمدەيتىن جابدىقتار مەن توسەك ورىندار ەمەس ەكەنىنە كوزىمىز جەتتى. بۇل اق حالاتتى ابزال جانداردىڭ ەڭبەگى. ءبىز وبلىستىڭ مەديسينا قوعامداستىعىنا، وزدەرىنىڭ كاسىبي مىندەتتەرىن ادال ورىندايتىن، پاندەميامەن كۇرەستىڭ الدىڭعى قاتارىندا تۇرعان بارلىق ماماندارعا ريزاشىلىعىمىزدى بىلدىرەمىز، – دەدى دانيال احمەتوۆ.
