وتىراردا "التىن كۇز" اۋىلشارۋاشىلىق جارمەڭكەسى ءوتتى.
تۇركىستان وبلىسى وتىرار اۋدانىندا "التىن كۇز" اۋىلشارۋاشىلىق جارمەڭكەسى ءوتتى. ديقاندار مەرەكەسى اياسىندا اۋدانداعى 13 اۋىلدىق وكرۋگتىڭ شارۋالارى مەن تاۋار وندىرۋشىلەرى جازداي ەڭبەك ەتىپ، قول جەتكىزگەن جەمىسى مەن ءتۇرلى ونىمدەرىن ءوڭىر تۇرعىندارىنا 15-20 پايىز تومەن باعامەن ۇسىندى.
جارمەڭكەدە 5 توننا ۇن جانە 10 توننا كارتوپ، 1 جارىم توننا ءسابىز، 5 توننا پياز، 2 توننا ورامجاپىراق سەكىلدى ءتۇرلى باقشا داقىلدارىمەن قاتار، اۋداننىڭ ەرەكشە سۇرانىسقا يە وزىندىك ايرىقشا تاۋارى قاربىز بەن قاۋىننان جاسالعان "قاۋىن قاق"، "قاۋىنقۇرت" جانە "ماياقۇم شۇباتى" جانە "وتىرار شۇباتى" سەكىلدى تۇيە ءسۇتى مەن ەت ونىمدەرى، سونداي-اق تارى، تالقان، قۇرت، ىرىمشىك سىندى 50 تونناعا جۋىق تاۋارلار تۇرعىندار سۇرانىسىنا يە بولدى.
وتىرار اۋدانىنىڭ اكىمى ايتاحانوۆ ەرلان قۋانىش ۇلى مەرەكە قارساڭىندا ۇيىمداستىرىلعان جارمەڭكەگە بارىپ، ساتۋشىلار جانە تۇتىنۋشىلارمەن جۇزدەستى.
- جىل سايىن ءوتىپ وتىراتىن جارمەڭكەنىڭ بيىلعى ەرەكشەلىگى - حالىققا ۇسىنىلعان تاۋارلار كورسەتكىشىنىڭ ارتۋىندا. الداعى ۋاقىتتا مۇنداي جارمەڭكەلەر جالعاسىن تاباتىن بولادى. ءبىز اۋىلشارۋاشىلىعى ونىمدەرىن شىعارىپ قانا قويماي ونى ودان ءارى دامىتىپ، تەرەڭ وڭدەپ، دايىن قاپتالعان ونىمدەردى شىعارۋدى قالىپتاستىرۋ ۇستىندەمىز.
قازىرگى تاڭدا، وتىرار اۋدانىنىڭ برەندى رەتىندە قالىپتاسقان "قاۋىن قاق"، "قاۋىنقۇرت" ونىمدەرى مەن "ماياقۇم شۇباتى" مەن "وتىرار شۇباتى" ەلىمىزدىڭ تۇكپىر-تۇكپىرىنە تارالۋدا.
تۇيە سۇتىنەن وندىرىلگەن ونىمدەردى الىس-جاقىن جەرلەرمەن قاتار، شەتەلدىك تۋريستەرگە دە ۇسىنىپ، پايدالى ەمدىك ءارى سۋسىندىق قاسيەتى جونىنەن دە قىزىعۋشىلىقتى ارتتىرۋعا جۇمىس جاسالۋدا"،-دەدى اۋدان اكىمى ەرلان ايتاحانوۆ.
ايتا كەتسەك، اۋدان شارۋالارى بيىلعى جىلى ۇلكەن جەتىستىكتەرگە قول جەتكىزگەن. اۋىل ەڭبەككەرلەرى جۇگەرى، كوكونىستەر مەن باقشا ونىمدەرىن وندىرۋدە مول تابىستارعا كەنەلىپ، ءتۇسىم كولەمىن ارتتىرسا، مال شارۋاشىلىعىندا دا وتكەن جىلدارمەن سالىستىرعاندا كورسەتكىش جوعارى.
