تۇركىستان وبلىسى اكىمىنىڭ ورىنباسارى بەيسەن تاجىبايەۆ وتىرار اۋدانىنا جۇمىس ساپارىمەن ارنايى بارىپ، سونداعى الەۋمەتتىك نىسانداردىڭ قۇرىلىسىمەن تانىستى. الدىمەن اۋدان اكىمدىگىندە اۋدان تۇرعىندارىن جەكە ماسەلەلەرى بويىنشا قابىلداپ، تالاپ-تىلەكتەرىن تىڭدادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
قابىلداۋعا كەلگەن ازاماتتىڭ ءبىرى جاستارعا ارنالعان 2،5 پايىزدىق نەسيە الۋعا قولداۋ كورسەتۋدى سۇرادى.
مۋزەي سالاسىندا قىزمەت ەتەتىن جاس مامان ەلىمىزدىڭ وزگە دە وڭىرىنەن، شەتەلدەردەن كەلگەن تۋريستەرگە كەراميكالىق بۇيىمداردى جاساپ، ساتۋدى ماقسات ەتىپ وتىر.
جەڭىلدەتىلگەن نەسيەگە قاجەتتى قۇرىلعىلاردى الىپ، ءوز كاسىبىن باستاعىسى كەلەتىنىن جەتكىزدى. جالپى ەلىمىزدە جاستاردى قولداۋعا ارنالعان باعدارلامانىڭ بەرەرى مول.
2023 جىلى اتالعان باعدارلاما اياسىندا وتىرار اۋدانى بويىنشا 81 ازامات 2،5 پايىزدىق نەسيە الىپ، ءوز كاسىبىن باستاعان.
تۇركىستان وبلىسى اكىمىنىڭ ورىنباسارى بەيسەن داۋلەت ۇلى كيەلى وتىرار اۋدانى ءتۋريزمدى دامىتۋعا قولايلى ايماقتىڭ ءبىرى ەكەنىن ايتىپ، تۋريستەرگە ارنالعان كەراميكالىق بۇيىمداردى دايىنداۋدىڭ ماڭىزدىلىعىنا توقتالدى. وسى ورايدا ايتىلعان ۇسىنىستىڭ ماڭىزى زور ەكەنىن اتاپ ءوتتى.
بۇدان بولەك قابىلداۋ بارىسىندا ازاماتتار تاراپىنان جۇمىسقا ورنالاسۋ، الەۋمەتتىك كومەك الۋ سەكىلدى ءبىرقاتار وتىنىشتەر ايتىلىپ، ءتيىستى سالا باسشىلارىنا ناقتى تاپسىرمالار جۇكتەدى.
قابىلداۋدان سوڭ اۋدان اكىمى ساكەن سۇلتانحانوۆپەن بىرگە ايماقتاعى ءبىرقاتار الەۋمەتتىك نىسانداردى ارالاپ، جاي-كۇيىمەن تانىستى. الدىمەن «شاۋىلدىر-كوكساراي» باعىتىنداعى وبلىستىق ماڭىزى بار جول قۇرىلىسى جۇمىستارىن كوردى.
جۇمىس ساپارى اۋدانداعى ت.يبراگيموۆ اتىنداعى جالپى ءبىلىم بەرەتىن مەكتەبى مەن م.شويمانوۆ اۋىلىنداعى 150 ورىندىق مادەنيەت ءۇيىنىڭ قۇرىلىسىن ارالاۋمەن جالعاستى.
ت.يبراگيموۆ اتىنداعى جالپى ءبىلىم بەرەتىن مەكتەبى 2007 جىلى سالىنعان. وقۋ ورداسىندا 92 ءمۇعالىم، 42 كىشى قىزمەتكەر جۇمىس ىستەيدى. قازىرگى تاڭدا مەكتەپتە 567 وقۋشى ءبىلىم الادى. مەكتەپتىڭ ماتەريالدىق جاعدايى ورتاشا، ەدەندەرى توزعان، ەسىك-تەرەزەلەرى ەسكىرگەن، ىشكى جانە سىرتقى قابىرعالارىنا تولىق جوندەۋ جۇمىستارىن جۇرگىزۋدى قاجەت ەتەدى.
م.شويمانوۆ اۋىلىنداعى 150 ورىندىق مادەنيەت ءۇيىنىڭ قۇرىلىسى 2023 جىلى باستالعان بولاتىن. 2024 جىلعا وتپەلى. تاپسىرىس بەرۋشى مەكەمە اۋداندىق ساۋلەت، قۇرىلىس جانە قالا قۇرىلىسى ءبولىمى. اتالعان نىسانعا وبلىستىق بيۋدجەتتەن ءتيىستى قارجى قارالعان. جەڭىمپاز مەردىگەر «IT Invest company» ءجشس-نىڭ وكىلى قۇرىلىس جۇمىستارى اعىمداعى جىلى تولىق اياقتالاتىنىن جەتكىزدى.
ارالاۋ بارىسىندا ش.قالداياقوۆ اتىنداعى جالپى ءبىلىم بەرەتىن مەكتەپ-گيمنازياسىنىڭ سىرتقى قابىرعالارىن قاپتاۋ، سونداي-اق ورتالىقتاندىرىلعان كارىز جۇيەسىنە قوسۋ ماسەلەسى كوتەرىلدى. اتالعان مەكتەپ 1969 جىلى سالىنىپ، 1970 جىلى پايدالانۋعا بەرىلگەن. بەيسەنباي داۋلەت ۇلى وقۋشىلاردىڭ ساپالى ءبىلىم الۋى ءۇشىن ولارعا قولايلى جاعداي جاساۋدىڭ ماڭىزدىلىعىن ايتىپ، كوتەرىلگەن ماسەلەنى ءوز باقىلاۋىنا الاتىنىن ايتتى.
اۋدانداعى الەۋمەتتىك ماڭىزى ۇلكەن نىساننىڭ ءبىرى – ءشاۋىلدىر اۋىلىندا سالىنىپ جاتقان 600 ورىندىق مەكتەپ جايى. «جايلى مەكتەپ» ۇلتتىق جوباسى اياسىندا سالىنىپ جاتقان ءبىلىم وشاعىن «مەليوسەرۆيس ك» ءجشس-ى 2023 جىلى ءوز قارجىسى ەسەبىنەن باستاعان. قازىرگى تاڭدا مەكتەپتىڭ ىرگەتاسى قۇيىلىپ، قابىرعالارى كوتەرىلۋدە. جاڭا مەكتەپ جايى 2024 جىلى اياقتالىپ، پايدالانۋعا بەرىلەدى دەپ كۇتىلۋدە.
ءىسساپار بارىسىندا تۇركىستان وبلىسى اكىمىنىڭ ورىنباسارى اۋدانداعى قۇرىلىس نىساندارىن مەرزىمىنەن كەشىكتىرمەي، ساپالى جۇرگىزۋدى جاۋاپتى مەكەمە باسشىلارىنا جۇكتەدى.
