"ەكى دۇنيەدە جالعىزىم - قازاقستان" دەگەن تىركەس ءسوزدىڭ تورەسى ەمەس پە؟ ال بۇل ءان بولىپ ورىلگەندەگى قانى قازاق تىڭداۋشىسىنا بەرەر اسەرىن سوزبەن جەتكىزىپ بەرۋدىڭ ءوزى قيىن. ءار قازاق ازاماتىنىڭ جۇرەگىنىڭ سوعىسى وسى ءبىر ماعىنالى تىركەستەن باستالسا، بەيىش مەكەن قازاق ەلىنىڭ ەڭسەسى ەشقاشان يىلمەسى انىق. بىلگەندەرىڭىز بۇل ءسوزدىڭ يەسىنىڭ كىم ەكەنىن ەستەرىڭىزگە الىپ كەتكەن دە بولارسىزدار، بىلمەگەندەرىڭىز كىم ەكەن دەپ ەلەڭدەپ وتىرعان شىعارسىزدار.

ەكى دۇنيەدە جالعىزىمىز – قازاق ەلىنىڭ ءوز شاڭىراعىن ءوزى كوتەرىپ، ءوز كوشىن ءوز بالاسى باستاعانىنا 25 جىل تولىپتى. ەلدىڭ 25 جىلداعى ەڭ ءبىر ۇلكەن جەتىستىگىنىڭ ءبىرى جەرىمەن قوسا ەلىنەن بولەكتەلىپ قالعان قازاقتىڭ ەلگە قايتا ساعىنىسىپ قاۋىشقانى ەدى. سىرتتاعى قازاق قازاق ازات ەل بولادى ەكەن دەگەندى ەستي سالىسىمەن ءوز ەلىنە قاراي ءوز كۇشىمەن اتتاندى. مىنە، سول "ەكى دۇنيەدە جالعىزىم - قازاقستان" دەگەن ازامات قازاقتىڭ شەتتەگى قالعان جەرىندە تۋىلسا دا، ەلدىڭ ازاتتىعىن جاريالاعانىنا كۋا بولۋعا ەلگە ازاتتىقتان بۇرىن جەتىپ ەدى.

ول كەزدە ءبىز بالا ەدىك، ارتىمىزداعى ءىنى-قارىنداستارىمىزدى "سابيلەر-اي، بازار عوي وزدەرىڭمەن بار ۇيلەر-اي" دەپ ويناتىپ، "ادۋىنگەردىڭ ادۋىندى اعۋىن" كورىپ، ول جۇرگەن بيىك جايلاۋدا "كۇنەس-اي" دەپ اندەتىپ جۇرگەنبىز. سودان ەلدەن جەتكەن دۇعاي سالەمدەردىڭ اڭسارلى ساعىنىشى بىزگە "گۇل قالام، الماتى"، "ەكى دۇنيەدە جالعىزىم - قازاقستان" دەگەندى جەتكىزدى. ەندى ءبىزدىڭ ارمان گۇل قالا الماتى مەن ەكى دۇنيەدەگى جالعىزىمىز قازاقستاندى كورۋ بولدى. ارمان دا ورىندالىپ، "جان ەمەس ماعان كەرەگى، كوك تۋدىڭ جەلبىرەگەنى" دەپ، كوك تۋدىڭ استىنا دا جەتتىك.

ءبىز سولاي ەلگە جەتتىك، ءبىراق ءبىزدى جەتكىزگەن ازامات، ءبىزدىڭ ۇلى كوشىمىزدىڭ باسشىسى بولعان ازامات ەلىمىزگە بىزدەن بۇرىن قانشا تەز جەتسە، بۇل پانيدەن دە سونشا تەز كەتتى. 2011 جىلدىڭ كوكتەمىندە كوك تۋىن ماڭگىلىككە جەلبىرەتىپ، بۇل دۇنيەدەگى جالعىزىن بىزگە قالدىرىپ، ءوزى و دۇنيەدەگى جالعىزىنا اتتانىپ كەتتى.

ارتىندا ەلى قالدى، جەرى قالدى، كوك تۋى قالى، ەكى دۇيەدەگى جالعىزى – قازاقستانى قالدى، گۇل قالا الماتىسى قالدى، اعا-باۋىر، دوس-جاران، بار قازاعى قالدى. ءبارى دە ءقازىر ەسكە الادى. اتى اتالسا كوركەم ەستەلىكتەر ايتادى. اباي اتام ايتقانداي "ادامزاتتىڭ ءبارىن، قازاقتىڭ ءبارىن باۋىرىم دەپ سۇيگەن" دەگەن ەستەلىكتەردى كوپ ەستيمىز.

ول كىسى كەتىسىمەن "كوك تۋى" بار قازاقتىڭ ۇرانىنا اينالدى. قازاقتىڭ قانىن تاسىتىپ، رۋxىن كوتەردى. ەل ازاتىعىن العاننان بەرى قازاق كوشى ەلىمىزگە نە بەردى دەگەندە اۋىز تولتىرىپ ايتار، قازاق رۋxىن كوتەرۋگە قوسقان ۇلەسىن ايتقاندا بۇكىل ەل ەلىنە اسىعىپ كەلىپ، ارعى الەمگە اسىعىس قاپيادا اتتانعان مۇستافا وزتۇرىك، سپورتتان قاناتتى ايتسا، ونەردەن ەرەكەمدى –ەرمۇرات زەيىپxاندى ايتادى.

ەرمۇرات اعامىزدىڭ ەلگە ورالعانىنا دا 25 جىل بولسا، ءتىرى بولعاندا 30 جەلتوقسان كۇنى ەردىڭ جاسى 50-گە دە تولار ەدى. امال قانشا، اعامىز ارامىزدان ەرتە اكەتتى. تەك ارتىنا قالدىرعان ولشەۋسىز ولمەس ەڭبەكتەرىمەن كوڭىل جۇباتامىز. اعامىزدىڭ 50 جىلدىق مەرەيتويىن وزىمەن بىرگە اتاپ ءوتۋ باقىتىنان ايىرىلعان دوس-جاراندارى مەن اعا-ىنىلەرى، تۋىس- تۋعاندارى ءوزى بولماسا دا رۋxى شاتتانسىن، ارتتاعى اعايىن رۋxتانسىن دەپ ەرمۇرات زەيىپxانۇلىن ەسكە الۋ شارالارىن وتكىزۋدى جوسپارلاپ وتىر.

ەرەكەم انگە قوسقان مىڭ جاساعان الماتىنىڭ تورىندە، 7 جەلتوقسان كۇنى م.اۋەزوۆ اتىنداعى مەملەكەتتىك اكادەميالىق دراما تەاترىندا "ەكى دۇنيەدە جالعىزىم - قازاقستان" اتتى اقىن، سازگەر، ءانشى، اكتەر، قالامگەر – سەگىز قىرلى، ءبىر سىرلى، "كوك تۋدىڭ جەلبىرەگەنى"، «كۇنەس-اي»، «جايلاۋىم – ءانىم» سەكىلدى كوپتەگەن ءورىمى بولەك اندەردىڭ اۆتورى ەرمۇرات زەيىپxانۇلىن ەسكە الۋ كونسەرتى وتەدى. ودان دا باسقا شاعىن شارالار ۇيىمداستىرىلماق.

كونسەرتكە كەلىپ وتان مەن تۋعان جەرگە دەگەن ماحابباتىن انمەن ورنەكتەپ، پەرزەنتتىك پارىزىن تولىعىمەن وتەپ كەتكەن ازاماتتى ەسكە الىپ، رۋحتانىپ قايتىڭىزدار.

تۇردىبەك قۇرمەتحان