Otanyn sheksiz súigen Ermurat Zeiiphandy eske alý kontserti ótedi
"Eki dúniede jalǵyzym - Qazaqstan" degen tirkes sózdiń tóresi emes pe? Al bul án bolyp órilgendegi qany qazaq tyńdaýshysyna berer áserin sózben jetkizip berýdiń ózi qiyn. Ár qazaq azamatynyń júreginiń soǵysy osy bir maǵynaly tirkesten bastalsa, beiish meken Qazaq Eliniń eńsesi eshqashan iilmesi anyq. Bilgenderińiz bul sózdiń iesiniń kim ekenin esterińizge alyp ketken de bolarsyzdar, bilmegenderińiz kim eken dep eleńdep otyrǵan shyǵarsyzdar.
Eki dúniede jalǵyzymyz – Qazaq Eliniń óz shańyraǵyn ózi kóterip, óz kóshin óz balasy bastaǵanyna 25 jyl tolypty. Eldiń 25 jyldaǵy eń bir úlken jetistiginiń biri jerimen qosa Elinen bólektelip qalǵan qazaqtyń elge qaita saǵynysyp qaýyshqany edi. Syrttaǵy qazaq qazaq Azat El bolady eken degendi esti salysymen óz eline qarai óz kúshimen attandy. Mine, sol "Eki dúniede jalǵyzym - Qazaqstan" degen azamat qazaqtyń shettegi qalǵan jerinde týylsa da, Eldiń azattyǵyn jariialaǵanyna kýá bolýǵa elge azattyqtan buryn jetip edi.
Ol kezde biz bala edik, artymyzdaǵy ini-qaryndastarymyzdy "Sábiler-ai, Bazar ǵoi ózderińmen bar úiler-ai" dep oinatyp, "Adýyngerdiń adýyndy aǵýyn" kórip, Ol júrgen biik jailaýda "Kúnes-ai" dep ándetip júrgenbiz. Sodan elden jetken duǵai sálemderdiń ańsarly saǵynyshy bizge "Gúl qalam, Almaty", "Eki dúniede jalǵyzym - Qazaqstan" degendi jetkizdi. Endi bizdiń arman gúl qala Almaty men eki dúniedegi jalǵyzymyz Qazaqstandy kórý boldy. Arman da oryndalyp, "Jan emes maǵan keregi, kók týdyń jelbiregeni" dep, kók týdyń astyna da jettik.
Biz solai elge jettik, biraq bizdi jetkizgen azamat, bizdiń Uly kóshimizdiń basshysy bolǵan azamat elimizge bizden buryn qansha tez jetse, bul pániden de sonsha tez ketti. 2011 jyldyń kókteminde kók týyn mańgilikke jelbiretip, bul dúniedegi jalǵyzyn bizge qaldyryp, ózi o dúniedegi jalǵyzyna attanyp ketti.
Artynda eli qaldy, jeri qaldy, kók týy qaly, eki dúiedegi jalǵyzy – Qazaqstany qaldy, gúl qala Almatysy qaldy, aǵa-baýyr, dos-jaran, bar qazaǵy qaldy. Bári de qazir eske alady. Aty atalsa kórkem estelikter aitady. Abai atam aitqandai "adamzattyń bárin, qazaqtyń bárin baýyrym dep súigen" degen estelikterdi kóp estimiz.
Ol kisi ketisimen "Kók týy" bar qazaqtyń uranyna ainaldy. Qazaqtyń qanyn tasytyp, rýxyn kóterdi. El azatyǵyn alǵannan beri qazaq kóshi Elimizge ne berdi degende aýyz toltyryp aitar, Qazaq rýxyn kóterýge qosqan úlesin aitqanda búkil el eline asyǵyp kelip, arǵy álemge asyǵys qapiiada attanǵan Mustafa Óztúrik, sporttan Qanatty aitsa, ónerden Erekemdi –Ermurat Zeiipxandy aitady.
Ermurat aǵamyzdyń elge oralǵanyna da 25 jyl bolsa, tiri bolǵanda 30 jeltoqsan kúni erdiń jasy 50-ge de tolar edi. Amal qansha, aǵamyz aramyzdan erte áketti. Tek artyna qaldyrǵan ólsheýsiz ólmes eńbekterimen kóńil jubatamyz. Aǵamyzdyń 50 jyldyq mereitoiyn ózimen birge atap ótý baqytynan aiyrylǵan dos-jarandary men aǵa-inileri, týys- týǵandary ózi bolmasa da rýxy shattansyn, arttaǵy aǵaiyn rýxtansyn dep Ermurat Zeiipxanulyn eske alý sharalaryn ótkizýdi josparlap otyr.
Erekem ánge qosqan myń jasaǵan Almatynyń tórinde, 7 jeltoqsan kúni M.Áýezov atyndaǵy memlekettik akademiialyq drama teatrynda "Eki dúniede jalǵyzym - Qazaqstan" atty aqyn, sazger, ánshi, akter, qalamger – segiz qyrly, bir syrly, "Kók týdyń jelbiregeni", «Kúnes-ai», «Jailaýym – ánim» sekildi kóptegen órimi bólek ánderdiń avtory Ermurat Zeiipxanulyn eske alý kontserti ótedi. Odan da basqa shaǵyn sharalar uiymdastyrylmaq.
Kontsertke kelip Otan men týǵan jerge degen mahabbatyn ánmen órnektep, perzenttik paryzyn tolyǵymen ótep ketken azamatty eske alyp, rýhtanyp qaityńyzdar.
Turdybek QURMETHAN
