ستەفانو دجيدارو سوڭعى ۇلگىدەگى روبوتتاندىرىلعان وتا جاساۋ جۇيەسىن ازىرلەپ، ونى يتاليانىڭ اۋرۋحانالارىندا ەنگىزۋ ءۇشىن سەگىز جىل بويىنا ەڭبەكتەنىپتى. سوڭعى ەكى جىلدا ول ەۋروپا مەن ازيادان كەلگەن ماماندارعا ايرىقشا تەحنيكامەن جۇمىس ىستەۋدىڭ ءتاسىلىن ۇيرەتۋمەن بولىپتى.
قازىرگى ۋاقىتتا ستەفانو دجيدارو وسكەمەندەگى №1 قالالىق اۋرۋحانانىڭ ماماندارىن دايىنداۋدا. دالىرەك ايتساق، اتالعان مەكەمەنىڭ 4 مامانى 2017 جىلى ميلان قالاسىندا ەكى اپتالىق وقىتۋدان وتكەن بولاتىن. بۇگىن وسكەمەندەگى №1 قالالىق اۋرۋحانادا روبوتتاندىرىلعان تەحنولوگيانىڭ كومەگى ارقىلى يتالياندىق مامان ستەفانو دجيدارونىڭ باسشىلىعىمەن ءوت جولىنا جاسالعان ەلىمىزدەگى تۇڭعىش وپەراسيا ءساتتى ءوتتى.
روبوتتاندىرىلعان تەحنيكانى قولدانۋ، زاقىمدانۋدى ىقشامداپ، وپەراسيانى ساپالى جاساۋعا جانە وپەراسيادان كەيىنگى كەزەڭدى جەڭىلدۋگە مۇمكىندىك بەرەدى.
سوندىقتان، بۇگىن وتا جاسالعان ازاماتشا 3-4 كۇن ىشىندە اۋرۋحانادان شىعىپ، ۇيىنە قايتاراىلادى دەپ كۇتىلۋدە.
سونىمەن قاتار، يتالياندىق دارىگەردىڭ باسشىلىعىمەن ارنايى وقۋدان وتكەن №1 قالالىق اۋرۋحانانىڭ حيرۋرگ ماماندارى ءبىر اپتا كولەمىندە ءارتۇرلى وپەراسيالار جاساپ، بىلىكتىلىكتەرىن شىڭدايتىن بولادى. ايتالىق، دارىگەر ستەفانو، الداعى ۋاقىتتا حيرۋرگ ماماندارمەن بىرگە گينەكولوگيا سالاسىندا ءبىرقاتار وپەراسيالاردى جۇرگىزبەكشى. وسى رەتتە يتالياندىق مامان وسكەمەندەگى №1 قالالىق اۋرۋحانانىڭ ماماندارى مەن وپەراسيا جاسايتىن ورىندارىنىڭ دايىندىعىن وتە جوعارى باعالاعانىن ايتا كەتكەن ءجون.
– مۇنداي وپەراسيانى جاساۋعا كومەكتەسكەن قازاقستاندىق ارىپتەستەرىمە، مەدبيكەلەر مەن حيرۋرگتارعا ايرىقشا العىس ايتامىن. وپەراسيالىق زالداردىڭ دايىندىق ساپاسى مەنى تاڭقالدىردى. وسىنداي بىلىكتى ماماندار شوعىرلانعان جانە ينفراقۇرىلىمى دامىعان ەمدەۋ مەكەمەلەرى ءبىزدىڭ ءساتتى جۇمىس ىستەۋگە جانە بولاشاققا جوسپارلار قۇرۋعا مۇمكىندىك بەرەدى، – دەدى ستەفانو دجيدارو.
ءوز كەزەگىندە وبلىس اكىمى دانيال احمەتوۆ شەتەلدىك مامانداردى تارتۋ مەديسينا سالاسىنداعى قىزمەت كورسەتۋ ساپاسىن ارتتىراتىنىن اتاپ ءوتتى.
– جۇرتتى دۇرىس ەمدەۋدىڭ قاجەتتىگى تۋرالى توقتاۋسىز ايتىپ، كۇنى بويى تالقىلاي بەرۋگە بولادى... الايدا، ءبىز ءدال وسىلاي بىرلەسىپ جۇمىس ىستەۋ ارقىلى عانا زور جەتىستىككە قول جەتكىزە الامىز. جۋىق ارادا ءبىز بۇدان دا كوپ مامانداردى وقىتاتىن بولامىز. وبلىس تۇرعىندارىنىڭ وسىنداي جوعارى مەديسينالىق تەحنولوگيالارعا قول جەتكىزىپ جاتقانى ارينە مەنى ايرىقشا قۋانتادى، – دەپ تۇيىندەدى ءسوزىن دانيال احمەتوۆ.
