Stefano Djıdaro sońǵy úlgidegi robottandyrylǵan ota jasaý júıesin ázirlep, ony Italıanyń aýrýhanalarynda engizý úshin segiz jyl boıyna eńbektenipti. Sońǵy eki jylda ol Eýropa men Azıadan kelgen mamandarǵa aıryqsha tehnıkamen jumys isteýdiń tásilin úıretýmen bolypty.
Qazirgi ýaqytta Stefano Djıdaro Óskemendegi №1 qalalyq aýrýhananyń mamandaryn daıyndaýda. Dálirek aıtsaq, atalǵan mekemeniń 4 mamany 2017 jyly Mılan qalasynda eki aptalyq oqytýdan ótken bolatyn. Búgin Óskemendegi №1 qalalyq aýrýhanada robottandyrylǵan tehnologıanyń kómegi arqyly ıtalıandyq maman Stefano Djıdaronyń basshylyǵymen ót jolyna jasalǵan elimizdegi tuńǵysh operasıa sátti ótti.
Robottandyrylǵan tehnıkany qoldaný, zaqymdanýdy yqshamdap, operasıany sapaly jasaýǵa jáne operasıadan keıingi kezeńdi jeńildýge múmkindik beredi.
Sondyqtan, búgin ota jasalǵan azamatsha 3-4 kún ishinde aýrýhanadan shyǵyp, úıine qaıtaraylady dep kútilýde.
Sonymen qatar, ıtalıandyq dárigerdiń basshylyǵymen arnaıy oqýdan ótken №1 qalalyq aýrýhananyń hırýrg mamandary bir apta kóleminde ártúrli operasıalar jasap, biliktilikterin shyńdaıtyn bolady. Aıtalyq, dáriger Stefano, aldaǵy ýaqytta hırýrg mamandarmen birge gınekologıa salasynda birqatar operasıalardy júrgizbekshi. Osy rette ıtalıandyq maman Óskemendegi №1 qalalyq aýrýhananyń mamandary men operasıa jasaıtyn oryndarynyń daıyndyǵyn óte joǵary baǵalaǵanyn aıta ketken jón.
– Mundaı operasıany jasaýǵa kómektesken qazaqstandyq áriptesterime, medbıkeler men hırýrgtarǵa aıryqsha alǵys aıtamyn. Operasıalyq zaldardyń daıyndyq sapasy meni tańqaldyrdy. Osyndaı bilikti mamandar shoǵyrlanǵan jáne ınfraqurylymy damyǵan emdeý mekemeleri bizdiń sátti jumys isteýge jáne bolashaqqa josparlar qurýǵa múmkindik beredi, – dedi Stefano Djıdaro.
Óz kezeginde oblys ákimi Danıal Ahmetov sheteldik mamandardy tartý medısına salasyndaǵy qyzmet kórsetý sapasyn arttyratynyn atap ótti.
– Jurtty durys emdeýdiń qajettigi týraly toqtaýsyz aıtyp, kúni boıy talqylaı berýge bolady... Alaıda, biz dál osylaı birlesip jumys isteý arqyly ǵana zor jetistikke qol jetkize alamyz. Jýyq arada biz budan da kóp mamandardy oqytatyn bolamyz. Oblys turǵyndarynyń osyndaı joǵary medısınalyq tehnologıalarǵa qol jetkizip jatqany árıne meni aıryqsha qýantady, – dep túıindedi sózin Danıal Ahmetov.
