بىر-بىرىنە مىڭگەستىرىپ سالعان ۇيلەردىڭ اراسىمەن ءورت سوندىرۋشىلەردىڭ ۇلكەن تەحنيكالارىن ايتپاعان كۇننىڭ وزىندە جەدەل جاردەمنىڭ شاعىن كولىكتەرى كىرە الماي، ابدەن قينالاتىنىن كۇندەلىكتى ومىردەن كورىپ ءجۇرمىز. وسىنداي سالعىرتتىق سالدارىنان ادام شىعىنى بولىپ جاتاتىنى دا جاسىرىن ەمەس.
ايتالىق، بيىل جازدا الماتى قالاسى اقكەنت مولتەك اۋدانىنداعى كوپقاباتتى تۇرعىن ۇيلەردىڭ بىرىندە ءورت شىعىپ، الگى جەرگە ءورت سوندىرۋشىلەر دەر كەزىندە جەتە الماي، ۋاقىتتارىن جوعالتقان ساتتە تۇرعىندار قىزىل جالىنعا ورانعان كوپقاباتتى ءۇيدىڭ جوعارعى قاباتىنان سەكىرۋگە ءماجىبۇر بولدى. وكىنىشكە وراي، سول كەزدە ءبىر تۇرعىن مەرت بولعانىن دا بىلەمىز.
كوپقاباتتى تۇرعىن ءۇي سالعاندا قۇرىلىس كومپانيالارى ءورت قاۋىپسىزدىگىن قاتاڭ ساقتاپ، كەز كەلگەن ءۇيدىڭ ىرگەسىنە ءورت سوندىرۋشىلەردىڭ تەحنيكالارىنىڭ ەركىن كىرىپ، شىعاتىن الاڭداردى ويلاستىرۋى كەرەك.
بۇدان باسقا قۇرىلىس بارىسىندا كوپقاباتتى تۇرعىن ءۇيدىڭ بالكونىندا ساتىلار ورتانىپ، ءورت ورىن العان جاعدايدا تۇرعىنداردىڭ ءومىرىن ساقتاپ قالۋعا مۇمكىندىك تىعىزۋى شارت. وكىنىشكە وراي، ءقازىر بۇل تالاپقا قۇرىلىس كومپانيالارى ءجۇردىم-باردىم قارايدى.
جاڭادان سالىنىپ، يەلەرىنە تاپسىرىلعان تۇرعىن ۇيلەردىڭ بالكونىنا شىعىپ، ءورت قاۋىپسىزدىگىنە ارنالعان ساتى مەن شاعىن ليۋكتى ىزدەسەڭىز تاپپايسىز. كەرەك دەسەڭىز، ءقازىر كەيبىر ۇيلەردە ساتىنى بىلاي قويىپ، بالكوندى دا تاپپاي قينالاسىز. وسىنداي ولقىلىقتار ءورت سوندىرۋشىلەردىڭ جۇمىسىن كۇردەلەندىرە تۇسەتىنىن ءبىز ايتپاساقتا ءتۇسىن وتىرعان شىعارسىزدار.
ق ر توتەنشە جاعداي مينيسترلىگى بيىل ەلىمىز بويىنشا 37 كوپقاباتتى ۇيدە ءورت ورىن العانىن العا تارتتى. ءوز كەزەگىندە ءورت سوندىرۋشىلەر وقيعا ورنىنا ءدال ۋاقىتىندا جەتىپ، قىزىل جالىندى اۋىزدىقتاۋعا بارىن سالعان. بۇل ءۇشىن ءورت سوندىرۋشىلەرگە العىستان باسقا ايتارىمىز جوق.
ءومىر بولعاننان كەيىن ءتۇرلى وقيعالار ورىن الىپ تۇراتىنى بەلگىلى. ءبىراق قوعامدىق ورتادا قاۋىپسىزدىك شارالارىن قاتاڭ ساقتاساق، قايعىلى جاعدايلاردىڭ ورىن الۋى ايتارلىقتاي تومەندەتۋگە بولادى.
ءبىراق ءقازىر ەلىمىزدەگى قۇرىلىس كومپانيالارىنىڭ ءورت قاۋىپسىزدىگىنە ءجۇردىم-باردىم قاراپ، ادام ومىرىمەن ويناۋىن قويار ەمەس.
كەزىندە جاڭادان سالىنعان كوپقاباتتى تۇرعىن ۇيلەردى قابىلداپ الاتىن ارنايى كوميسسيانىڭ قۇرامىندا ءورت سوندىرۋشىلەر دە بولۋشى ەدى. وكىنىشكە وراي، 2016 جىلدان باستاپ الگى كوميسسيانىڭ قۇرامىنان ءورت سوندىرۋشىلەر شەتەتىلگەن-دى. مىنە، سودان بەرى قۇرىلىس كومپانيالارى كوپ قاباتتى تۇرعىن ۇيلەردى سالۋدا ءورت قاۋىپسىزدىگىن ساقتاماي سالۋدى ادەتكە اينالدىرعانى اششى دا بولسا شىندىق.
و باستا ۇكىمەت قۇرىلىس كومپانيالارىن قاداعالاۋشى ورگاندار ءجونسىز تەكسەرە بەرمەسىن دەگەن ماقساتپەن ءورت سوندىرۋشىلەردىڭ جاڭا نىسانداردى سالۋ كەزىندە تەكسەرۋىن توقتاتقان بولاتىن. اتاقرۋشى بيلىكتىڭ وسى ءبىر يگى ويىن كەيبىر پىسىقاي كومپانيالار ءوز ماقساتتارىنا پايدالانىپ، ءۇي سالعاندا ءورت قاۋىپسىزدىگىن قامتاماسىز ەتپەيتىن بولعنا.
ءيا، و باستا كاسىپكەرلەردى ءجونسىز تەكسەرۋدىڭ بولعانىن بىلەمىز. ال ءقازىر قاداعالۋشى ورگاندار دا كاسىپكەرلىك نىسانداردى ءجوندى-جونسىز تەكسەرۋگە بولمايتىنىن جاقسى تۇسىنەدى.
كوپقاباتتى تۇرعىن ۇيلەردە ءورت ورىن الىپ، قۇتقارۋشىلاردىڭ 100 قادام جەرگە تەحنيكالىرن جەتكىزە الماي يت اۋىرەگە تۇسكەنىن كورگەندە قۇرىلىس كومپانيالارىنا كىمنىڭ دە بولسا زىعىردانى قاينايدى.
بۇگىندە دەپۋتاتتاردىڭ وزدەرى دە جاڭادان سالىنعان قۇرىلىس نىسانىن قابىلداپ الاتىن كوميسسيانىڭ قۇرامىنا توتەنشە جاعداي قىزمەتىنىڭ وكىلدەرىن قايتادان ەنگىزۋ ماسەلەسىن كوتەرە باستادى.
بىزدىڭشە، بۇل ماسەلەنى ساعىزشا سوزباي تەزدەتىپ شەشكەن ءجون. ەگەر كوميسسيا قۇرامىندا ءورت سوندىرۋشىلەر بولاتىن بولسا، تۇرعىن ءۇي قۇرىلىسى سالاسىندا جوعارىدا اتاپ كورسەتكەن كەمشىلىكتەر ورىن المايتىنى انىق.
نۇرلان اۋباكىر
