الماتى وبلىسىندا ءورت ورنىنا ۋاقتىلى جەتپەگەن قۇتقارۋشىلار 12 ملن تەڭگە وتەماقى تولەيدى، دەپ حابارلايدى Dalanews.kz.
سوتتا انىقتالعانداي، 2023 جىلدىڭ مامىرىندا ساعات 17:30 شاماسىندا ەلتاي اۋىلىنىڭ تۇرعىنى ءورت ءسوندىرۋ بولىمىنە تەلەفون سوعىپ، ۇيىنە جاقىن اۋماقتا كەپكەن ءشوپتىڭ ورتەنىپ جاتقانى تۋرالى حابارلاعان. ءورت سوندىرۋشىلەر قوڭىراۋعا ءمان بەرمەگەن. ءورت ورنىنا اكىمدىك وكىلى بارىپ، جەرگىلىكتى تۇرعىندارمەن بىرگە قولدان جاسالعان قۇرالدارمەن ءورتتى سوندىرۋگە ارەكەتتەنگەن.
ءورت ءسوندىرۋ قىزمەتى وقيعا ورنىنا تەك 22:40-تا بارىپ، ءوز جۇمىستارىنا كىرىسكەن. سالدارىنان تۇرعىن ءۇي ورتەنىپ، اۋىل تۇرعىنىنا 11،9 ملن تەڭگە ماتەريالدىق شىعىن كەلتىرىلگەن، – دەلىنگەن ءىس ماتەريالىندا.
وسىعان بايلانىستى ءۇيدىڭ يەسى ەلتاي اۋىلدىق وكرۋگى اكىمى اپپاراتىنىڭ جانە ءورت ءسوندىرۋ قىزمەتىنىڭ ءورت كەزىندەگى ارەكەتسىزدىگىن زاڭسىز دەپ تانۋ جانە كەلتىرىلگەن ماتەريالدىق شىعىندى وتەۋدى تالاپ ەتىپ سوتقا جۇگىنگەن.
ءمااس-ى ءورت ءسوندىرۋ قىزمەتىنىڭ ارەكەتسىزدىگىن زاڭسىز دەپ تانىپ، كەلتىرىلگەن ماتەريالدىق شىعىندى 11،9 ميلليون تەڭگەنى وتەۋگە مىندەتتەدى. ءورت ءسوندىرۋ قىزمەتى بۇل شەشىمگە شاعىم ءتۇسىردى.
الماتى وبلىستىق سوتى ءىس ماتەريالدارىن زەردەلەي كەلە، ءبىرىنشى ساتىداعى سوتتىڭ شەشىمى زاڭدى جانە نەگىزدى دەگەن قورىتىندىعا كەلدى. ءىس بويىنشا ۇكىم وزگەرىسسىز قالدىرىلدى.
