زامان جىلجىپ، ۋاقىت وزعان سايىن ءومىر ءسۇرۋدىڭ تالاپتارى دا وزگەرۋدە. بۇگىنگى كۇننىڭ كوزقاراسى – اسا جىلدامدىقپەن قوعامدا بولىپ جاتقان زاماناۋي تەحنولوگيانى مەڭگەرۋگە ۇلگەرۋدى تالاپ ەتەدى. اقپاراتى اعىنداعان اساۋ داۋىردە جان-جاعىنا قاراپ جايباراقات ءجۇرۋ مۇمكىن ەمەس. سوناۋ كونە زاماننان قازىرگى ۋاقىتقا دەيىن قالىپتاسقان ءبىر قاعيدا – العا جىلجۋ، تەك قانا العا ۇمتىلۋ. ادامزاتتىڭ تىرشىلىك تاريحىنداعى «كەشە-بۇگىن-ەرتەڭ» دەيتىن دامۋ ديالەكتيكاسىنا دەن قويساق، كەشەگى جاڭالىق بۇگىن ەسكىرىپ، بۇگىنگى جاڭالىق ەرتەڭ كونەرەتىنىنە كوز جەتكىزۋگە بولادى.

ءدال ءقازىر بارلىق دۇنيە اسىعىستا. الەمدى جاۋلاعان جاھاندانۋ مەن داعدارىس ادامزات بالاسىنا قاتەرلى ءقاۋىپ توندىرۋدە. ەكولوگيالىق اپات، رۋحاني قۇندىلىقتاردىڭ قۇلدىراۋى سەكىلدى ءىرى ماسەلەلەردىڭ سالدارىنان مىڭ ۆولتتىق ميدىڭ قۇدىرەتى مۇمكىن ەمەس نارسەلەردى مۇمكىن ەتۋ تاجىريبەسىن كورسەتتى. عالامدى وزگەرتەتىن – ءبىلىم مەن عىلىم. قارىشتاعان زاماننىڭ تەحنولوگيالىق قادامىمەن كوز جەتپەس جىلدامدىقتا وركەندەۋ – «ورلەۋدىڭ» نەگىزگى ماقساتى. وسى ءبىر ماقساتتى دامىتۋعا كوپ كۇش سالۋ مەن جۇزەگە اسىرۋدىڭ بىلىكتىلىكتى جوعارىلاتۋ كۋرسى وزىنە مىندەت ەتىپ جۇكتەگەن. وسى ورايدا بيىلعى 11 ساۋىردەن 23 ساۋىرگە دەيىنگى قىسقا مەرزىمدە ءوتىپ جاتقان قازاقستاننىڭ ءار وبلىسىنىڭ جوعارى وقۋ ورىندارىنان وقىتۋشىلار قاۋىمىن الماتى قالاسىنداعى «ورلەۋ» بىلىكتىلىكتى ارتتىرۋ ۇلتتىق ورتالىعى اكسيونەرلىك قوعامىنىڭ قازاقستان رەسپۋبليكاسى ءبىلىم بەرۋ جۇيەسىنىڭ باسشىسى جانە عىلىمي-پەداگوگيكالىق قىزمەتكەرلەرىنىڭ  بىلىكتىلىگىن ارتتىراتىن رەسپۋبليكالىق ينستيتۋتى بىرىكتىردى. تاڭداپ شاقىرماعان ءار سالانىڭ ماماندارىنىڭ باستى ماقساتى – ءبىلىم بەرۋدى تەرەڭدەتۋ بولسا، «ورلەۋدىڭ» وقىتۋشىلار قاۋىمى ءادىسناما تاسىلدەرىن جەتىلدىرىپ، بىلىكتىلىكتى ارتتىرۋ، سوڭعى جەتىستىكتەردى يگەرتۋ ماقساتىن جۇزەگە اسىرىپ وتىر. وسى ماقساتتا كەلگەن «ورلەۋىمىز» شىن مانىندە بىزدەردى، كەڭ بايتاق قازاق ەلىنىڭ تۇكپىر-تۇكپىرىنەن جول تارتقان جۇزدەگەن تىڭداۋشىلاردى قۇشاق جايا قارسى الىپ، كەلگەن ماقساتىمىزعا جەتۋدە الەۋمەتتىك تۇرعىدان قامتاماسىز ەتىپ، ءار تىڭداۋشىنىڭ جاعدايىن جاساۋدا. اتىنا زاتى ساي وقۋ ورنىنىڭ وقىتۋشىلار قاۋىمى جاس بولعانىمەن ءوز پاندەرىنىڭ بىلگىر ماماندارى ەكەندىگىنە ءبىر اپتالىق ۋاقىت ارالىعىندا كوڭىلگە قونىمدى جانە كوكەيىمىزدەگى كوپ ۋاقىتتان بەرگى مازالاپ جۇرگەن سۇراقتارىمىزدىڭ جاۋابىن تابۋدىڭ باعىتىن نۇسقاپ، كوزىمىزدى جەتكىزىپ وتىر.

ءبىلىم مەن عىلىمداعى جاڭالىقتار، جەتكەن جەتىستىكتەر تولعاندىرار تۇستاردى تىڭداۋشىلارعا از ۋاقىتتىڭ ىشىندە كوپ قاجەتتىلىكتەرمەن ۇعىندىرۋعا تىرىسقان وقىتۋشىلار قاۋىمى «ءبىلىم جۇيەسى»، «SMART  ماقسات»، «كەيس»، «تۇلعا»، «قۇزىرەتتىلىك» ءتارىزدى جۇيەلەپ وقىتۋدى جان-جاقتى تالداي وتىرىپ، قازىرگى كەزەڭدەگى كرەديتتىك تەحنولوگيامەن وقىتۋدىڭ جاڭا، تىڭ ادىستەرىن ۇسىندى. بۇرىنعى ءداستۇرلى جۇيەنىڭ ورنىن باسقان بۇل دەموكراتيالىق باعىت ستۋدەنتتەردىڭ سىني تۇرعىدان ويلاي الاتىن زاماناۋي جەكە تۇلعا بولىپ قالىپتاسۋىنا جول اشاتىن قادامدار ەكەنىن دالەلدەپ بەردى. رەسپۋبليكامىزدىڭ ءار ايماعىنان كەلگەن ءارتۇرلى جاستاعى ءار سالانىڭ ماماندارىن توپتاۋ ادىسىمەن ءبىر جەرگە شوعىرلاندىرىپ، تاڭنان كەشكە دەيىنگى تىنىمسىز ەڭبەكپەن تۇسىندىرۋگە تىرىسقان «ورلەۋدىڭ» وقىتۋشىلار قاۋىمىنا دا تىڭداۋشىلار تاراپىنان مىڭ ءتۇرلى سۇراق جاۋىپ، پىكىرتالاستار ءوربىپ جاتقان ۋاقىت – ەكى جاقتىڭ دا قىزىعۋشىلىعىن تۋدىرىپ، زاماننىڭ تالابىن شەشۋدە ناقتى قادامداردى ويلى، ماقساتتى، جۇيەلى تۇردە جۇزەگە اسىرۋعا مۇمكىندىك بەردى. العاشقى ءبىر اپتا قانىقتى بوياۋىمەن تىڭداۋشىلاردان ولشەمدى ەڭبەكتەنۋدەن دە ارتىق كۇش جۇمساۋعا الىپ كەلدى. وسىنداي تار ۋاقىت ىشىندە مەڭگەرۋگە ءتيىستى تاپسىرمادان اسىرا مىندەتتەردى يگەرۋ ءۇشىن تىڭداۋشىلاردىڭ بويىنا كۇش پەن جىگەر بەرەتىن تابيعاتتىڭ تىلسىم كۇشىن سەزىنۋدە ەل تاريحىمىزدىڭ وتكەن كيەلى جەرلەرىمەن تانىسۋعا، بىلۋگە، ياعني كوپ ەستىگەننەن ءبىر كورگەننىڭ ارتىقشىلىعىن ەسكەرتىپ، تابيعات اياسىندا دەمالىس ۇيىمداستىرىلدى.

الاتاۋدىڭ ەتەگىندەگى «ەسىك قورعانى» – ەجەلدەن كەلە جاتقان ەلدىك بەلگى. التىن ادامدار تابىلعان وسىناۋ قاسيەتتى مەكەن، تاڭعاجايىپ تابيعاتى بار تۇرگەن جايلاۋى، تۇرگەن وزەنىنىڭ ءبىر سالاسىن قۇرايتىن الاتاۋدىڭ قويناۋىنداعى بىرنەشە مەترلىك بيىكتىكتەن قۇلايتىن «اقبۇلاق سارقىراماسىندا» بولۋىمىزدىڭ ءوزى ءبىز الىپ جاتقان ءبىلىم مەن جاڭا تەحنولوگيانىڭ قۇرامداس بولىگى ىسپەتتى.

 

«ەسىك» مەملەكەتتىك تاريحي-مادەني قورىق-مۇراجايىندا بولعانىمىز تىڭداۋشىلار ءۇشىن ۇلكەن رۋحاني سەرپىلىس بەردى. بۇل مادەني شارا – اپتا بويى العان تەوريالىق ءبىلىمىمىزدى تاجىريبەدە بايلانىستىرۋدىڭ تاماشا ءادىسىنىڭ ءبىرى دەسەك، قاتەلەسپەيمىز. وقۋ اعىمىنداعى ەكىنشى اپتا ەندى باستالدى. تابيعات اياسىندا بولعان وسىنداي ءساتتى سەرۋەن بىزگە تىڭ كۇش، سەنىمدى سەرپىن بەردى. سول سەبەپتى وقىپ جاتقان اتالمىش مەكەمە باسشىلارى مەن وقىتۋشىلار قاۋىمىنا، اسىرەسە توپ ەدۆايزەرى بايقونىس ءانۋار جارىلقاسىنۇلىنا 30-لەكتىڭ №1 توبى اتىنان ۇلكەن العىسىمىزدى بىلدىرەمىز. «ورلەۋدەگى» ومىرشەڭ ءادىس شارىقتاي بەرسىن، تىڭداۋشىلارعا بەرەرى مول تىرشىلىك اعىنىنىڭ تولقىنى تولقىن قۋسىن!

ءالىمجان جاقان،

 ساۋلە سەرىكبايەۆا،

توپ تىڭداۋشىلارى اتىنان

ە.ا.بوكەتوۆ اتىنداعى ءقارمۋ-دىڭ اعا وقىتۋشىلارى