ەلباسى نۇرسۇلتان ءابىش ۇلى نازاربايەۆتىڭ "بولاشاققا باعدار: رۋحاني جاڭعىرۋ" ستراتەگيالىق ماقالاسىندا لاتىن الىپبيىنە ءوتۋدىڭ ەلىمىز ءۇشىن ماڭىزدىلىعى اتاپ وتىلگەن-دى. وسىعان وراي بۇگىن وڭتۇستىك وڭىرىنە بەلگىلى قالامگەرلەر سەرىك ءجانابىل، مۇحتار مۇحامبەتجان، باقتيار تايجان، ەرسۇلتان امىربەك، عالىمجان زيابەك باستاعان ازاماتتار ورداباسى تاۋىندا باس قوسىپ، بۇل باستاماعا قولداۋ ءبىلدىردى.
جيىندا اۋدان اكىمىنىڭ ورىنباسارى عالىمجان ۇسەنبايەۆ، جازۋشى سەرىك ءجانابىل، "ەگەمەن قازاقستان" گازەتىنىڭ مەنشىكتى ءتىلشىسى باحتيار تايجان ءسوز الىپ، لاتىن الىپبيىنە ءوتۋدىڭ تاۋەلسىز مەملەكەت ءۇشىن ماڭىزىن اتاپ ءوتتى. اۋدان قوناقتارى تۋتوبە باسىنا كوتەرىلىپ، قاسيەتتى ورداباسى بيىگىندەگى بۇل باستامانىڭ دا باياندى بولۋىنا تىلەكتەستىگىن ءبىلدىردى. سونىمەن قاتار، ورتاق ءباتۋاعا كەلىپ، ۇندەۋ قابىلدادى.
قالامگەرلەرمەن سونداي-اق، ورداباسى اۋدانىنىڭ اكىمى راشيد قايىپجانوۆ كەزدەسىپ، ءبىرقاتار ماسەلەلەرگە قاتىستى وي ءبولىستى. باسقوسۋ رياسىز قالىپتا، ەركىن پىكىر الماسۋ رەتىندە ءوربىدى. راشيد قايىپجان ۇلى:
– كيەلى وڭىرگە جاساعان قادامدارىڭىز قۇتتى بولارىنا سەنىمدىمىن. ءبىز مەملەكەت باسشىسى نۇرسۇلتان ءابىش ۇلى نازاربايەۆتىڭ باستامالارىنا قولداۋ ءبىلدىرىپ، ەل بولىپ، ءبىر جاعادان باس، ءبىر جەڭنەن قول شىعاراتىن بولساق، الار اسۋىمىز الدا. سىزدەرگە ورداباسى وڭىرىنە ات باسىن بۇرىپ، يگى شارانى وسى جەردەن باستاعاندارىڭىز ءۇشىن شىنايى العىسىمدى بىلدىرەمىن، – دەپ، باسقوسۋدى قورتىندىلادى.
