Elbasy Nursultan Ábishuly Nazarbaevtyń "Bolashaqqa baǵdar: rýhanı jańǵyrý" strategıalyq maqalasynda latyn álipbıine ótýdiń elimiz úshin mańyzdylyǵy atap ótilgen-di. Osyǵan oraı búgin Ońtústik óńirine belgili qalamgerler Serik Janábil, Muhtar Muhambetjan, Baqtıar Taıjan, Ersultan Ámirbek, Ǵalymjan Zıabek bastaǵan azamattar Ordabasy taýynda bas qosyp, bul bastamaǵa qoldaý bildirdi.
Jıynda aýdan ákiminiń orynbasary Ǵalymjan Úsenbaev, jazýshy Serik Janábil, "Egemen Qazaqstan" gazetiniń menshikti tilshisi Bahtıar Taıjan sóz alyp, latyn álipbıine ótýdiń táýelsiz memleket úshin mańyzyn atap ótti. Aýdan qonaqtary Týtóbe basyna kóterilip, qasıetti Ordabasy bıigindegi bul bastamanyń da baıandy bolýyna tilektestigin bildirdi. Sonymen qatar, ortaq bátýaǵa kelip, úndeý qabyldady.
Qalamgerlermen sondaı-aq, Ordabasy aýdanynyń ákimi Rashıd Qaıypjanov kezdesip, birqatar máselelerge qatysty oı bólisti. Basqosý rıasyz qalypta, erkin pikir almasý retinde órbidi. Rashıd Qaıypjanuly:
– Kıeli óńirge jasaǵan qadamdaryńyz qutty bolaryna senimdimin. Biz memleket basshysy Nursultan Ábishuly Nazarbaevtyń bastamalaryna qoldaý bildirip, el bolyp, bir jaǵadan bas, bir jeńnen qol shyǵaratyn bolsaq, alar asýymyz alda. Sizderge Ordabasy óńirine at basyn buryp, ıgi sharany osy jerden bastaǵandaryńyz úshin shynaıy alǵysymdy bildiremin, – dep, basqosýdy qortyndylady.
