"ورداباسى" كلۋبى كاسىپكەر شاحمۇرات ءمۇتالىپتىڭ يەلىگىنە رەسمي تۇردە ءوتتى، دەپ حابارلايدى Dalanews.kz.
شىمكەنت اكىمدىگىندە "ورداباسى" كاسىبي فۋتبول كلۋبىن جەكەشەلەندىرۋ تۋرالى مەموراندۋمعا قول قويىلدى. كەلىسىمگە قالا اكىمى عابيت سىزدىقبەكوۆ پەن Integra Construction KZ ج ش س باسشىلىعى قول قويدى. مەموراندۋم مەملەكەت باسشىسى قاسىم-جومارت توقايەۆتىڭ كاسىبي فۋتبول كلۋبتارىن جەكەشەلەندىرۋ جانە كوممەرسيالاندىرۋ جونىندەگى تاپسىرماسى اياسىندا جۇزەگە اسىرىلدى.
قالا اكىمى عابيت سىزدىقبەكوۆ كاسىبي سپورتقا جەكە ينۆەستيسيا تارتۋ فۋتبول ينفراقۇرىلىمىن دامىتۋعا، جاس ويىنشىلاردى دايارلاۋعا جانە قالانىڭ ەلدەگى فۋتبول ورتالىقتارىنىڭ ءبىرى رەتىندەگى پوزيسياسىن نىعايتۋعا جاڭا مۇمكىندىكتەر اشاتىنىن اتاپ ءوتتى.
ءوز كەزەگىندە شاحمۇرات ءمۇتالىپ كومپانيا كلۋبتى دامىتۋدى ۇزاق مەرزىمدى ءارى الەۋمەتتىك ماڭىزى بار جوبا رەتىندە قاراستىراتىنىن ايتتى.
"ورداباسى" – تاريحى باي ءارى جانكۇيەرلەرى مىقتى قولدايتىن كلۋب. ءبىزدىڭ الدىمىزدا ينفراقۇرىلىمعا، جاس ويىنشىلاردى دايارلاۋعا جانە باسەكەگە قابىلەتتى كوماندا قالىپتاستىرۋعا باسا ءمان بەرە وتىرىپ، كلۋبتىڭ تۇراقتى دامۋىن قامتاماسىز ەتۋ مىندەتى تۇر"، – دەدى ول.
