2025 جىلعى 11 ساۋىردە باتىس قازاقستان وبلىسى، ورال قالاسىندا ەلىمىزدەگى كرەاتيۆ يندۋستريانى دامىتۋداعى ماڭىزدى قادام – ÓzgeEpic كرەاتيۆ حابىنىڭ رەسمي اشىلۋى ءوتتى، دەپ حابارلايدى Dalanews.kz
كرەاتيۆ حاب – زاماناۋي ونەر مەن مادەني تەندەنسيالاردى، سيفرلىق ونەر مەن جاڭا تەحنولوگيالاردى توعىستىراتىن الاڭ. ÓzgeEpic حابى وسى باعىتتا يننوۆاسيالىق جوبالاردى جۇزەگە اسىرىپ، جاستاردىڭ شىعارماشىلىق باستامالارىن دامىتۋعا ۇلەس قوسىپ كەلەدى. 2019 جىلى الماتى قالاسىندا باستاۋ العان جوبا، تۇركىستان جانە استانا قالالارىندا جالعاسىن تاۋىپ، تابىستى تاجىريبەدەن كەيىن بيىل ورال قالاسىندا اشىلىپ وتىر.
مەملەكەت باسشىسى قاسىم-جومارت توقايەۆ «دارىندى ازاماتتاردى وزىنە تارتاتىن ورىندار، ياعني كرەاتيۆتى يندۋستريا ورتالىقتارى بارلىق وبلىس ورتالىعىندا بولۋعا ءتيىس» دەپ ناقتى مىندەتتەر قويعانى بەلگىلى. وسى باعىتتا مادەنيەت جانە اقپارات مينيسترلىگى جانە باتىس قازاقستان وبلىسىنىڭ اكىمدىگى باستاماسىمەن، «سامۇرىق-قازىنا» قولداۋىمەن جانە «قاراشىعاناق پەترولەۋم وپەرەيتينگ ب.ۆ.» كومپانيالارىنىڭ الەۋمەتتىك ينۆەستيسيالارى نەگىزىندە ÓzgeEpic Oral كرەاتيۆ حابى اشىلدى.
«كرەاتيۆتى يندۋستريانى دامىتۋ – مەملەكەت ساياساتىنىڭ باسىم باعىتتارىنىڭ ءبىرى، بۇل سالا مەملەكەت باسشىسىنىڭ نازارىندا. ÓzgeEpic Oral ورتالىعى جاس تالانتتار ءۇشىن جاڭا مۇمكىندىكتەر الاڭىنا، شابىت ۇياسىنا اينالادى دەپ سەنەمىز»، - دەدى باتىس قازاقستان وبلىسىنىڭ اكىمى ناريمان تورەعالييەۆ.
ÓzgeEpic Oral كرەاتيۆ حابىنىڭ اشىلۋى وڭىردەگى مادەني جانە ينتەللەكتۋالدىق الەۋەتتى ارتتىرۋعا زور ۇلەس قوسپاق. جاڭا كەڭىستىكتە مادەنيەت پەن تەحنولوگيا سالاسىنداعى ءارتۇرلى قىزمەت باعىتتارى ءبىر الاڭدا توعىسادى.
«بۇگىن دارىندى جاستار مەن شىعارماشىلىق سالانىڭ ازاماتتارى ءۇشىن ماڭىزدى كۇن. سەبەبى، حالىققا قاجەتتى، سۇرانىستاعى ءتۇرلى كونتەنت دايىندايتىن، ءارى كرەاتيۆتى مامانداردىڭ كاسىبي ورتاسىن قالىپتاستىراتىن ورتا پايدا بولدى. ورالداعى ورتالىق - «سامۇرىق-قازىنا» قورىنىڭ ەلىمىز بويىنشا اشقان ءۇشىنشى كرەاتيۆتى حابى. وسىعان دەيىن اقتوبە جانە پەتروپاۆلدا پايدالانۋعا بەرىلدى. جالپى باتىس قازاقستاندا سوڭعى ءتورت جىلدا 1،5 ملرد تەڭگە بولاتىن 16 الەۋمەتتىك جوبا جاسادىق. سولاردىڭ ءبىرى جىل سايىن 700 ەرەكشە بالا كومەك الاتىن «قامقورلىق» وڭالتۋ ورتالىقتارى. قازىرگى تاڭدا تاسقىن سالدارىنان زارداپ شەككەن ءجاڭاومىر اۋىلىندا كوپفۋنكسيونالدى سپورت كەشەنىن سالۋ جوسپارلانعان. بۇل دا قور كومپانيالار توبىنىڭ وڭىرلەردىڭ ينفراقۇرىلىمىن دامىتۋعا، حالىقتى الەۋمەتتىك قولداۋعا جاساپ جاتقان قادامىنىڭ ءبىرى»، - دەدى «سامۇرىق-قازىنا» اق كورپوراتيۆتىك باسقارۋ، الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتور عيبرات اۋعانوۆ.
كرەاتيۆ حابتىڭ ەكوجۇيەسىندە كونسەرت الاڭى، تەاتر، كينوزال، كىتاپحانا جانە اسحانا ورنالاسىپ، ونەر مەن ءبىلىمنىڭ جاڭا مۇمكىندىكتەرىن ۇسىنادى. سونىمەن قاتار، گالەرەيا، ءدارىسحانا، كوۆوركينگ كەڭىستىگى، وندىرىستىك جانە مەديا سەحتار – فوتو، پودكاست جانە دىبىس جازۋ ستۋديالارى، ءتۇسىرىلىم الاڭدارى جۇمىس ىستەيدى. ايتا كەتەرلىگى، كرەاتيۆ حابتا وڭىرلىك انيماسيالىق ستۋديا جۇمىسىن باستاپ، مۋلتيپليكاسيا ماماندارى دايارلانادى. بۇل ايماقتاعى انيماسيا باعىتىنداعى العاشقى كاسىبي ستۋديا بولماق.
«ءار وڭىردە كرەاتيۆ سالانىڭ دامۋىنا ىقپال ەتەتىن كەڭىستىكتەردى قۇرعاندا ول جەرگىلىكتى جەردىڭ، سول ايماقتىڭ مادەني-الەۋمەتتىك ەرەكشەلىگىنە نەگىزدەلۋى ءتيىس. وسىنى ەسكەرە وتىرىپ، ءتيىستى زەرتتەۋلەردەن كەيىن حابتارىمىزدى اشتىق. ورال قالاسىنداعى اشىلعان كرەاتيۆ كەڭىستىك وڭىرلەردىڭ زياتكەرلىك الەۋەتىن ءوز دەڭگەيىندە كورسەتەتىن، ايماقتاردىڭ مۇمكىندىگىن ورتالىقپەن تەڭەستىرەتىن، كرەاتيۆ يندۋستريانى دامىتۋداعى وڭىرلەردىڭ ءرولىن ايقىندايتىن بىرەگەي الاڭ بولادى دەگەن ويىمىز بار.» - دەدى ÓzgeEpic نەگىزىن قالاۋشىلار ماقپال جۇماباي جانە توعجان قۇرمانجان قىزى.
كادرلاردى جۇيەلى دايارلاۋ جانە كرەاتيۆتى يندۋستريالاردا ءبىلىم بەرۋ باعدارلامالارىن دامىتۋ – قازاقستان ءۇشىن ستراتەگيالىق قاجەتتىلىك. وسى ورايدا حابتا سۇرانىسقا يە ماماندىقتار بويىنشا وقۋ باعدارلاماسى ءتۇزىلىپ، 200 كرەاتيۆ مامان دايىندالادى. بۇل ايماقتا جاڭا جۇمىس ورىندارىن قۇرىپ قانا قويماي، ايماقتىق شىعارماشىلىق ەكونوميكانىڭ باسەكەگە قابىلەتتىگىنىڭ ارتۋىنا ىقپال ەتەدى.
