ورال قالاسىندا “تازا قازاقستان” مەملەكەتتىك تۇجىرىمداماسى اياسىندا العاشقى زاماناۋي ەكوپۋنكت اشىلدى. ەندى قالا تۇرعىندارى تۇرمىستىق قالدىقتاردى قايتا وڭدەۋگە تاپسىرىپ، سىياقى الا الادى، دەپ حابارلايدى Dalanews.kz.
ورالدىقتار پلاستيك، قاعاز، باتارەيا، مەتالل جانە پايدالانىلعان كۇنباعىس مايىن قايتا وڭدەۋگە وتكىزە الادى. قالاداعى العاشقى ەكوپۋنكت “تازا قازاقستان” مەملەكەتتىك تۇجىرىمداماسى اياسىندا اشىلدى. جوبانىڭ باستى ماقساتى – ەكولوگيالىق مادەنيەتتى قالىپتاستىرۋ جانە قورشاعان ورتاعا ۇقىپتى قاراۋدى ناسيحاتتاۋ.
قالدىقتاردى سۇرىپتاۋ جانە كوپتەگەن زاتتى قايتا قولدانۋ بۇۇ-نىڭ تۇراقتى دامۋ ماقساتى عانا ەمەس، قازىرگى زامان مادەنيەتىنىڭ ءبىر بولىگىنە اينالعانىن اتاپ وتكەن ءجون. ياعني، بوتەلكەلەردى، پاكەتتەردى، ماكۋلاتۋرانى جانە باسقا دا تۇرمىستىق قالدىقتاردى جيناپ، تاپسىرۋ سانگە اينالدى. سوندىقتان ەكوپۋنكتتىڭ اشىلۋىنا الدىمەن جاستار، بلوگەرلەر مەن ەكواكتيۆيستەر، سونىڭ ىشىندە مەكتەپ وقۋشىلارى بەلسەندى قاتىستى. №7 مەكتەپتىڭ وقۋشىلارى العاشقىلاردىڭ ءبىرى بولىپ قاعاز بەن پلاستيك جيناپ، لايىق سىياقىلارىن الدى.
TikTok پەن Instagram سەكىلدى الەۋمەتتىك جەلىلەردە قالدىقتاردى قايتا وڭدەۋ مادەنيەتىنە دەگەن كوزقاراس وزگەرىپ جاتىر. ادامدار قورشاعان ورتانىڭ لاستانۋى مەن كليماتتىڭ وزگەرۋى ماسەلەلەرىنە كوبىرەك قىزىعۋشىلىق تانىتىپ كەلەدى. ەندى ورالدىقتار دا مۇمكىندىككە يە بولدى. “ورالتازاسەرۆيس” ءجشس-نىڭ ديرەكتورىنىڭ ايتۋىنشا، 2025 جىلعا قاراي قالادا تاعى ەكى ەكوپۋنكت اشۋ جوسپارلانىپ جاتىر.
ايتا كەتەيىك، 2024-2029 جىلدارعا ارنالعان “تازا قازاقستان” تۇجىرىمداماسى ەكولوگيالىق مادەنيەتتى دامىتۋعا باعىتتالعان كەشەندى ادىستەردى قامتيدى. ونىڭ ىشىندە جاۋاپتى مىنەز-قۇلىقتى قالىپتاستىرۋ، ەكولوگيالىق ويلاۋ مەن ءبىلىم بەرۋدى دامىتۋ بار. بەس جىل ىشىندە كوممۋنالدىق قالدىقتاردى قايتا وڭدەۋ ۇلەسىن 25%-دان 38%-عا دەيىن ارتتىرۋ جوسپارلانعان.
