Oral qalasynda “Taza Qazaqstan” memlekettik tujyrymdamasy aiasynda alǵashqy zamanaýi ekopýnkt ashyldy. Endi qala turǵyndary turmystyq qaldyqtardy qaita óńdeýge tapsyryp, syiaqy ala alady, dep habarlaidy Dalanews.kz.
Oraldyqtar plastik, qaǵaz, batareia, metall jáne paidalanylǵan kúnbaǵys maiyn qaita óńdeýge ótkize alady. Qaladaǵy alǵashqy ekopýnkt “Taza Qazaqstan” memlekettik tujyrymdamasy aiasynda ashyldy. Jobanyń basty maqsaty – ekologiialyq mádenietti qalyptastyrý jáne qorshaǵan ortaǵa uqypty qaraýdy nasihattaý.
Qaldyqtardy suryptaý jáne kóptegen zatty qaita qoldaný BUU-nyń Turaqty damý maqsaty ǵana emes, qazirgi zaman mádenietiniń bir bóligine ainalǵanyn atap ótken jón. Iaǵni, bótelkelerdi, paketterdi, makýlatýrany jáne basqa da turmystyq qaldyqtardy jinap, tapsyrý sánge ainaldy. Sondyqtan ekopýnkttiń ashylýyna aldymen jastar, blogerler men ekoaktivister, sonyń ishinde mektep oqýshylary belsendi qatysty. №7 mekteptiń oqýshylary alǵashqylardyń biri bolyp qaǵaz ben plastik jinap, laiyq syiaqylaryn aldy.
TikTok pen Instagram sekildi áleýmettik jelilerde qaldyqtardy qaita óńdeý mádenietine degen kózqaras ózgerip jatyr. Adamdar qorshaǵan ortanyń lastanýy men klimattyń ózgerýi máselelerine kóbirek qyzyǵýshylyq tanytyp keledi. Endi oraldyqtar da múmkindikke ie boldy. “OralTazaServis” JShS-niń direktorynyń aitýynsha, 2025 jylǵa qarai qalada taǵy eki ekopýnkt ashý josparlanyp jatyr.
Aita keteiik, 2024-2029 jyldarǵa arnalǵan “Taza Qazaqstan” tujyrymdamasy ekologiialyq mádenietti damytýǵa baǵyttalǵan keshendi ádisterdi qamtidy. Onyń ishinde jaýapty minez-qulyqty qalyptastyrý, ekologiialyq oilaý men bilim berýdi damytý bar. Bes jyl ishinde kommýnaldyq qaldyqtardy qaita óńdeý úlesin 25%-dan 38%-ǵa deiin arttyrý josparlanǵan.
