وقۋ-اعارتۋ ءمينيسترى جۇلدىز سۇلەيمەنوۆا وڭىرلەردىڭ ءبىلىم باسقارمالارىنا شۇيلىكتى، دەپ حابارلايدى Dalanews.kz.
مينيستر وڭىرلەر اراسىنداعى ءبىلىم ساپاسىنىڭ الشاقتىعى تۋرالى ايتىپ، كەيبىر وبلىستار ارتتا قالۋىنا قاتىستى سىني پىكىر ءبىلدىردى.
"وكىنىشكە قاراي، ارامىزدا ءبىلىم ساپاسىن وقۋشىنىڭ تەرەڭ بىلىمىمەن ەمەس، اتقارىلعان جوبالار سانىمەن ولشەيتىن مەنەدجەرلەر ءالى دە بار. بىزگە قاعاز جۇزىندەگى ەسەپ ەمەس، شاكىرتتىڭ شىنايى جەتىستىگى مەن ءبىلىم دەڭگەيى وسكەنى قاجەت. سول سەبەپتى وڭىرلەردە قالىپتاسقان جاعدايدى بۇكپەسىز ايتىپ، ونى شەشۋدىڭ جولدارىن بىرگە ىزدەستىرگەندە عانا ناتيجە بولادى"، - دەدى جۇلدىز سۇلەيمەنوۆا.
مينيسترلىك مالىمەتىنشە، مەكتەپ ديرەكتورلارىنىڭ باسقارۋشىلىق داعدىسى تومەن بولۋى ءبىلىم جۇيەسىنىڭ ساپاسىنا تىكەلەي اسەر ەتىپ وتىر.
"وعان قوسا مەكتەپ ىشىندەگى كورپوراتيۆ مادەنيەت تومەندەۋىنە اكەپ سوعىپ جاتىر، مۇنداي مەكتەپتەردە مۇعالىمدەردىڭ مازاسى قاشىپ، ورتالىققا حات جازۋى جيىلەپ كەتكەن. ءقازىر ەل اۋماعىنداعى مەكتەپتەردە 490 مەكتەپ ديرەكتورى لاۋازىمى بوس تۇر"، - دەپ جازىلعان حابارلامادا.
مەكتەپ باسشىلارى سولتۇستىك قازاقستان، اقمولا، شىعىس قازاقستان، قاراعاندى وبىستارىندا جەتىسپەي جاتىر. 2025 جىلى ديرەكتورلىققا ۇمىتكەرلەردىڭ 21 پايىزى عانا تەستىلەۋدەن وتكەن. جيىندا ديرەكتورلار جەتىسپەيتىن وڭىرلەرگە بىلىكتى مامانداردى باسقا ايماقتاردان تارتۋ مۇمكىندىگىن قاراستىرۋ جايى دا ايتىلدى.
