ونىڭ ايتۋىنشا، ۆاليۋتا نارىعىنداعى جاعداي تۇراقتى. ۇلتتىق ۆاليۋتانىڭ ورتا مەرزىمدى پەرسپەكتيۆاداعى باعامىن ايقىندايتىن ىرگەلى فاكتورلار وڭتايلى قالىپتاسۋدا. جالپى، 2017 جىلدىڭ ىشىندە تەڭگە اقش دوللارىنا قاتىستى نومينالدىق كورسەتكىشتە 0،3 پايىزعا نىعايىپ، ءبىر اقش دوللارى 332،33 تەڭگەنى قۇراعان.
– وڭتۇستىك قازاقستان بويىنشا 2017 جىلى 2016 جىلمەن سالىستىرعاندا اقش دوللارىن ساتىپ الۋ كولەمى 4،22 پايىزعا، ەۋرو 13،9 پايىزعا ءوستى، ال رەسەي ءرۋبلى 4،24 پايىزعا ازايدى. تاپ وسى ارالىقتا اقش دوللارى 1،2، ەۋرو 1،5، رۋبل ساتىلىمى 1،26 پايىزعا ۇلعايدى، – دەدى انۋار امانگەلدى ۇلى.
جالپى 2017 جىلى قازاقستان ەكونوميكاسىنا بانك كرەديتتەرىنىڭ كولەمى 12،7 ترلن. تەڭگەگە جەتكەن. ال، وبلىس ەكونوميكاسىنا بانكتىك نەسيەلەر كولەمى 2016 جىلعا قاراعاندا 10،3 پايىزعا ءوسىپ، 400،9 ملرد. تەڭگەگە جەتكەن.
سونداي-اق، وتكەن جىلدىڭ قورىتىندىسى بويىنشا وبلىستاعى قارجىلاي ءوسىم دەپوزيتتەر باعىتىندا دا بايقالادى. ماسەلەن جىل سوڭىندا دەپوزيتتەردىڭ كولەمى 4،4 پايىزعا ءوسىپ، 300،0 ملرد. تەڭگەنى قۇراعان. ولاردىڭ ىشىندە تەڭگەدەگى دەپوزيتتەر 23،9 پايىزعا ارتىپ، 204،8 ملرد. تەڭگەگە دەيىن جەتكەن. ال، شەتەل ۆاليۋتاسىنداعى دەپوزيتتەر كورسەتكىشى 22،2 پايىزعا تومەندەپ، 95،2 ملرد. تەڭگەنى قۇراعان.
وقو اكىمىنىڭ باسپا ءسوز قىزمەتى
https://dalanews.kz/33705
