ايماق باسشىسى ەلباسىنىڭ دەنساۋلىق سالاسىنا ەرەكشە كوڭىل ءبولىپ وتىرعانىن ايتا كەلە، مەديسينا قىزمەتكەرلەرىنىڭ جەتىستىكتەرىنە توقتالدى.
– ادام جانىنىڭ اراشاسى بولىپ تابىلاتىن دارىگەرلەردىڭ قوعامداعى ورنى ەرەكشە. دەنساۋلىق ساقتاۋ سالاسى – مەملەكەتتىك ساياساتتىڭ باسىم باعىتتارىنىڭ ءبىرى. سوندىقتان ءبىزدىڭ وبلىسىمىزدا بۇل سالاعا بولىنەتىن قارجى جىلدان جىلعا ارتىپ كەلەدى. سونىڭ ارقاسىندا ءبىزدىڭ مەديسينالىق مەكەمەلەرىمىز ەڭ وزىق ۇلگىدەگى قۇرال-جابدىقتارمەن جابدىقتالىپ، ەمدەۋدىڭ ءتيىمدى تاسىلدەرى قولدانىلىپ كەلەدى. مەملەكەتتىك باعدارلامانى ىسكە اسىرۋدىڭ ارقاسىندا 2017 جىلى نەگىزگى دەنساۋلىق كورسەتكىشتەرى وتكەن جىلدىڭ ۇقساس كەزەڭىمەن سالىستىرعاندا جاقساردى. مىسالى ءومىر ءسۇرۋ ۇزاقتىعى 72،6-دان 72،9 دەيىن ارتتى. جالپى ءولىم-جىتىم 5،3-تەن 5،1 دەيىن تومەندەدى، انا ءولىمىنىڭ كورسەتكىشى 1،5% -عا، نارەستە ءولىمى 13%-عا، تۋبەركۋلەزدەن بولاتىن ءولىم 14،8%-عا تومەندەدى. وسىنىڭ بارلىعى سىزدەردىڭ ارقالارىڭىز دەپ بىلەمىز، – دەدى جانسەيىت تۇيمەبايەۆ.
جاڭا اۆتوكولىكتەر ناۋقاسقا العاشقى كومەك كورسەتۋگە ارنالعان قاجەتتى قۇرالدارمەن تولىق قامتاماسىز ەتىلگەن. جىل سوڭىنا دەيىن وڭىرىمىزدەگى مەديسينالىق مەكەمەلەرگە تاعى 20 ارنايى كولىك بەرىلەتىن بولادى.
ايتا كەتەيىك، وبلىسىمىزداعى دەنساۋلىق ساقتاۋ سالاسىندا قازىرگى ۋاقىتتا 7 مىڭنان استام دارىگەر مەن 25 مىڭ مەيىربيكە ەڭبەك ەتەدى. حالىق سانىنىڭ وسۋىنە بايلانىستى اۋدان، قالالاردا 10 امبۋلاتوريالىق - ەمحانا سالىنۋدا.
