Ońtústiktiń meditsina qyzmetkerlerine 27 kólik tabystaldy
Ońtústik Qazaqstan oblysynyń ákimi Janseiit Túimebaev aq halattylardy «Meditsina qyzmetkerleriniń kúni» merekesimen quttyqtap, óńirdegi aýrýhanalar men emhanalarǵa 27 jedel-járdem qyzmetine arnalǵan kóliktiń kiltin saltanatty túrde tabys etti.
Aimaq basshysy Elbasynyń densaýlyq salasyna erekshe kóńil bólip otyrǵanyn aita kele, meditsina qyzmetkerleriniń jetistikterine toqtaldy.
– Adam janynyń arashasy bolyp tabylatyn dárigerlerdiń qoǵamdaǵy orny erekshe. Densaýlyq saqtaý salasy – memlekettik saiasattyń basym baǵyttarynyń biri. Sondyqtan bizdiń oblysymyzda bul salaǵa bólinetin qarjy jyldan jylǵa artyp keledi. Sonyń arqasynda bizdiń meditsinalyq mekemelerimiz eń ozyq úlgidegi qural-jabdyqtarmen jabdyqtalyp, emdeýdiń tiimdi tásilderi qoldanylyp keledi. Memlekettik baǵdarlamany iske asyrýdyń arqasynda 2017 jyly negizgi densaýlyq kórsetkishteri ótken jyldyń uqsas kezeńimen salystyrǵanda jaqsardy. Mysaly ómir súrý uzaqtyǵy 72,6-dan 72,9 deiin artty. Jalpy ólim-jitim 5,3-ten 5,1 deiin tómendedi, ana óliminiń kórsetkishi 1,5% -ǵa, náreste ólimi 13%-ǵa, týberkýlezden bolatyn ólim 14,8%-ǵa tómendedi. Osynyń barlyǵy Sizderdiń arqalaryńyz dep bilemiz, – dedi Janseiit Túimebaev.
Jańa avtokólikter naýqasqa alǵashqy kómek kórsetýge arnalǵan qajetti quraldarmen tolyq qamtamasyz etilgen. Jyl sońyna deiin óńirimizdegi meditsinalyq mekemelerge taǵy 20 arnaiy kólik beriletin bolady.
Aita keteiik, oblysymyzdaǵy densaýlyq saqtaý salasynda qazirgi ýaqytta 7 myńnan astam dáriger men 25 myń meiirbike eńbek etedi. Halyq sanynyń ósýine bailanysty aýdan, qalalarda 10 ambýlatoriialyq - emhana salynýda.
