«بۇل كۇن – جاڭا وقۋ جىلىنا، جاڭا جەتىستىكتەر مەن تابىستارعا باستاۋ بەرەتىن كۇن. ءبىلىم بەرۋ ءىسى – بۇل تامىرى تەرەڭدە جاتقان، ۇلت پەن دىنگە بولىنبەيتىن، ءبىر كۇن نەمەسە ءبىر جىلدا كورىنبەيتىن عالامات قۇندىلىق. ال، وسى ءبىر ۇلى قۇندىلىقتى بويعا سىڭىرەتىن تۇلعا – ءمۇعالىم. ياعني سىزدەرسىزدەر، قۇرمەتتى ۇستازدار! ەلباسىمىز ءوزىنىڭ «بولاشاققا باعدار: رۋحاني جاڭعىرۋ» اتتى ستراتەگيالىق ماقالاسىندا ءبىلىم مەن عىلىمدى جەتىلدىرۋ، جاس ۇرپاق تاربيەسى ماسەلەلەرىنە باسا كوڭىل بولگەنى بارشاڭىزعا بەلگىلى. سوندىقتان دا سىزدەرگە، جۇكتەلەر مىندەتتىڭ سالماعى دا باسىم»، - دەدى اكىم.
توعىز مىڭ تۇرعىنى بار «ساۋلە» شاعىن اۋدانىندا بوي كوتەرگەن جاڭا مەكتەپ 1200 بالاعا شاقتالعان. ءۇش اۋىسىمدا ءبىلىم بەرىلىپ كەلگەن مەكتەپتە بۇگىندە وقۋشى سانى 1350ء-دى قۇرايدى. زامان تالابىنا ساي جابدىقتالىپ، بالالاردىڭ تولىققاندى ءبىلىم الۋىنا، سالاۋاتتى ءومىر سالتىن قالىپتاستىرۋىنا جاعداي جاسايتىن تيپتىك وقۋ ورنى 3 قاباتتان تۇرادى. «نۇرلى جول» باعدارلاماسى بويىنشا سالىنعان مەكتەپتە حيميا، فيزيكا، بيولوگيا لابوراتوريالارى، مۋلتيمەديالىق-لينگوفوندىق كابينەتتەر مەن كومپيۋتەر سىنىبى، كىتاپحانا، ءماجىلىس جانە وقۋ زالى بار.
مۇنان سوڭ، ءوڭىر باسشىسى «دوستىق»، «قايناربۇلاق» شاعىن اۋداندارىندا وسى كۇنى ەل يگىلىگىنە بەرىلگەن 1200 ورىندىق مەكتەپتەردى ارالاپ كوردى. ءبىلىم ورداسىنىڭ جۇمىسىمەن تانىسقان ايماق باسشىسى وقۋشىلاردىڭ ەڭبەككە باۋلۋ كابينەتتەرىندەگى ەرلەرگە ارنالعان شەبەرحانالار مەن قىزداردىڭ تىگىن سەحىمەن تانىستى. سونداي-اق، ساز بالشىق شەبەرحاناسىندا دا بولدى. ج.قانسەيىت ۇلى ۇزتازدارمەن بولعان اڭگىمەدە شاكىرتتەردى جالپى ءبىلىم الۋدان بولەك، وقۋشىلارعا تەرەڭدەتىپ ءبىلىم بەرىپ، ءتۇرلى كاسىپتىك ءبىلىم بەرۋ ماماندىقتارى – تىگىن تىگۋ، تەمىر ۇستاسى شەبەرحاناسى، قولونەر جاساۋ سىندى ۇيىرمەلەر اياسىندا ارنايى كۋالىكتەر بەرۋ جاعىن ويلاستىرۋ قاجەتتىگىن ەسكە سالدى. بۇل رەتتە، وبلىس باسشىسى ەلباسىنىڭ جاستاردى كاسىپتىك ءبىلىم الۋعا كوپتەپ باعىتتاۋ تاپسىرماسى اياسىندا بەرىلگەن وسىناۋ كۋالىكتەردىڭ ارتىقتىق ەتپەيتىنىن ەسكەرتتى. اسىرەسە، بالالار تاربيەسىنە الاڭداعان اكىم مەكتەپ پەن ءۇيدىڭ اراسىنداعى بايلانىس ۇنەمى ۇشتاسىپ، اتا-انامەن اراداعى قاتىناستى بەكەمدەۋ ارقىلى تاربيە، تازالىققا قاتىستى بىرلەسكەن جۇمىستاردىڭ ۇيىمداستىرىلۋى كەرەكتىگىن ايتتى.
ايتا كەتۋ كەرەك، بۇگىنگى العاشقى ءبىلىم كۇنى – 2017-2018 جاڭا وقۋ جىلى وڭىرىمىزدە 20 مەكتەپتىڭ پايدالانۋعا بەرىلۋىمەن ەرەكشەلەنىپ وتىر. ەل يگىلىگىنە بەرىلگەن ءبىلىم مەكەمەلەرىنىڭ 15ء-ى «نۇرلى جول» باعدارلاماسى بويىنشا سالىنسا، قالعانى جەرگىلىكتى بيۋدجەت ەسەبىنەن جۇرگىزىلگەن.
بۇگىن جۇمىسىن باستاعان مەكتەپتەردىڭ 6-ۋى جاڭادان اشىلىپ وتىر. ناتيجەسىندە وڭىردەگى ورتا مەكتەپتىڭ سانى 1021-دەن 1027-گە جەتتى. اتالعان مەكتەپتەردە وقۋ جىلىندا 640 مىڭعا جۋىق وقۋشى ءبىلىم السا، ولاردىڭ 73 مىڭى ءبىرىنشى سىنىپقا بارادى. ال شاكىرتتەرگە وبلىستا 69 مىڭنان اسا ءمۇعالىم ءبىلىم بەرەدى.
جىل سوڭىنا دەيىن تاعى 9 ءبىلىم بەرۋ نىسانى ەل يگىلىگىنە بەرىلەدى دەپ كۇتىلۋدە. وسىلايشا، وڭىردەگى 8 اپاتتى جانە 12 ءۇش اۋىسىمدى مەكتەپتەردىڭ ماسەلەسى شەشىلەدى دەيدى سالاعا جاۋاپتى جەتەكشىلەر. ال قالعان 23 مەكتەپتىڭ قۇرىلىسى 2018-2019 جىلدارى جۇرگىزىلىپ، اپاتتى جانە ءۇش اۋىسىمدى ءبىلىم نىساندارىنىڭ ماسەلەسى تۇبەگەيلى شەشىمىن تاپپاق.
سونداي-اق، ايماقتاعى 2، 5، 7 سىنىپ وقۋشىلارى جاڭارتىلعان ءبىلىم بەرۋ مازمۇنىنا باعىتتالعان جاڭا وقۋلىقتارمەن قامتاماسىز ەتىلىپ وتىر.
وقو اكىمىنىڭ باسپا ءسوز قىزمەتى
