ونىڭ ايتۋىنشا، ەلدى بىرلىككە ۇندەيتىن مەرەكەنىڭ تۇپكى ءمانى – كەزىندە ءتۇرلى سەبەپتەرمەن قازاق جەرىنە قونىس اۋدارعان ەتنوس وكىلدەرىنىڭ مەملەكەت قۇراۋشى ۇلتقا العىس ايتۋىن كوزدەيدى. ون كۇندىك مەرەكەنى جەر-جەرلەردە ۇيىمداستىرۋ مەن وتكىزۋدىڭ تۇجىرىمداماسى ازىرلەنىپ، ءار كۇنگە ارنايى اتاۋلار بەرىلگەن.
–20 اقپان – تاريحقا تاعزىم كۇنى دەپ بەلگىلەندى. بۇل كۇنى وبلىستا، اۋدان، قالا ورتالىقتارىندا قۋعىن-سۇرگىن جىلدارى قازاقستانعا تاعدىر تالكەگىمەن قونىس اۋدارعان ەتنوستاردىڭ وتكەنى مەن بۇگىنى تۋرالى ارنايى كورمە وتكىزىلەدى. سونداي-اق، شىمكەنتتەگى «قازاق ەلىنە مىڭ العىس» مونۋمەنتى الدىندا ارنايى ءىس-شارا ۇيىمداستىرىلىپ، تاريحقا تاعزىم جاسالادى، – دەدى ءمۇراتالى ورازالى ۇلى.
سونىمەن قاتار، 21 اقپان – قايىرىمدىلىق كۇنىندە وبلىس اۋماعىندا «جان جىلۋى» تاقىرىبىندا اكسيا ۇيىمداستىرىلىپ، جالعىزباستى جانە الەۋمەتتىك تۇرعىدا از قامتىلعان وتباسىلارعا كومەك بەرىلەدى. 22 اقپان – شابىت كۇنىندە «ىنتىماعى جاراسقان قازاقستان» تاقىرىبىندا وڭىردەگى قولونەر بۇيىمدارى مەن شىعارماشىلىق ونەر تۋىندىلارى كورمەسى ۇيىمداستىرىلماق.
بۇدان بولەك، 23 اقپان – كورشىگە ىزەت، 25 اقپان – قۇرمەت، 26 اقپان – ولكەتانۋ، 27 اقپان – كەلىسىم، 28 اقپان – ىقىلاس، 1 ناۋرىز – العىس ايتۋ كۇنى دەپ بەلگىلەنىپ، ءار كۇندەرى اتاۋىنا ساي شارالار وتەتىن بولادى.
ايتا كەتەرلىگى، وبلىستىق قازاقستان حالقى اسسامبلەياسى وڭىردە قوعامدىق كەلىسىم مەن جالپىۇلتتىق بىرلىك سالاسىنداعى مەملەكەتتىك ساياساتتى جۇزەگە اسىرىپ كەلەدى. ءوڭىر تۇرعىندارىنىڭ ۇلتتىق قۇرامى بويىنشا 72،9 پايىزىن – قازاقتار، 16،8 پايىزىن – وزبەكتەر، 4،5 پايىزىن – ورىستار، ال 5،7 پايىزىن – وزگە ەتنوستار قۇرايدى. وبلىستا قالىپتاسقان ەتنوسارالىق احۋالدى سارالاۋ ماقساتىندا سوسيولوگيالىق زەرتتەۋلەر جۇرگىزىلىپ كەلەدى.
سونىمەن قاتار، مەدياسيا ينستيتۋتىن نىعايتۋدا وڭىردەگى 57 كاسىبي جانە 485 كاسىبي ەمەس مەدياتورمەن بايلانىس ورناتىلعان. وتكەن جىلى وبلىس بويىنشا مەدياسيا راسىمىمەن شەشىلگەن 8 مىڭنان استام داۋدىڭ 84 پايىزى مەدياتورلاردىڭ ارالاسۋىمەن رەتتەلىپ، 2016 جىلمەن سالىستىرعاندا كورسەتكىش 2 ەسە ارتىپ وتىر.
الداعى ۋاقىتتا وڭتۇستىك قازاقستان وبلىسىنىڭ تولىققاندى جاڭارعان ەتنوكارتاسى دايىندالىپ، وڭىردەگى اسسامبلەيا قىزمەتى تۋرالى كىتاپ ازىرلەنەتىن بولادى. سونداي-اق، بيىل 5 اۋدان، قالا اۋماعىندا «دوستىق» ۇيلەرى اشىلادى. وبلىس باسشىسىنىڭ تاپسىرماسىنا سايكەس، «ءار ەتنوستىڭ برەندى» جوباسى اياسىندا اسسامبلەيا الاڭىندا تۇراقتى شەبەرلىك دارىستەرى مەن اشىق كورمەلەر ۇيىمداستىرىلماق.
وقو اكىمىنىڭ باسپا ءسوز قىزمەتى
https://dalanews.kz/34183
