تۇركىستان وبلىسى تولە بي اۋدانىندا ەر ادام ءسىبىر جاراسىمەن اۋىرىپ قالدى. ءقازىر ول اۋرۋحانادا ەمدەلىپ جاتىر، دارىگەرلەر ونىمەن بايلانىستا بولعان ادامداردى تەكسەرۋدە، دەپ حابارلايدى Dalanews.kz. “الماتى” تەلەارناسىنا سىلتەمە جاساپ.
ەپيدەميولوگتاردىڭ مالىمەتىنشە، ەر ادام اۋرۋ مالدىڭ ەتىن بولشەكتەۋ جانە جەۋ كەزىندە ءسىبىر جاراسىن جۇقتىرعان. دارىگەرلەردىڭ ايتۋىنشا، ول شامامەن 10 كۇن بۇرىن جۇقتىرۋى مۇمكىن، ال سەبەپ – مالدى سويۋ كەزىندە سانيتارلىق ەرەجەلەردىڭ بۇزىلۋى.
سانيتار دارىگەرلەر ناۋقاسپەن بايلانىستا بولعان تاعى 10 ادامدى تەكسەردى، ءبىراق ولاردان بۇل ءقاۋىپتى اۋرۋ انىقتالعان جوق.
سانيتارلىق قىزمەت قازاقستاندىقتاردى ەرەكشە ساق بولۋعا شاقىرادى: ەتتى تەك رەسمي ساۋدا ورىندارىنان ساتىپ الىپ، مىندەتتى تۇردە ۆەتەريناريالىق ءموردىڭ بولۋىن تەكسەرۋ قاجەت.
«ەر ادام سيىر ەتىن ساتىپ، جەكەمەنشىك قاساپحانادا جۇمىس ىستەگەن. ءقازىر ول جۇقپالى اۋرۋلار بولىمىندە جاتىر. دياگنوز راستالدى، ءسىبىر جاراسىنىڭ قوزدىرعىشى انىقتالدى. اۋرۋ ۆەتەريناردىڭ رۇقساتىنسىز اۋرۋ مالدى سويۋ سالدارىنان پايدا بولعان»، – دەدى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اقەركە ماقۇلبەك قىزى.
