تۇركىستاندا «ونەرلى ولكە» وبلىستىق ونەر فەستيۆالى اياسىندا جەتىساي اۋدانىنىڭ مادەنيەت كۇندەرى ءوتتى. ەكى كۇنگە سوزىلعان شارانى «كەرۋەن ساراي» كەشەنىندە اۋدان ونەرپازدارىنىڭ قاتىسۋىمەن وتكەن گالا-كونسەرت قورىتىندىلادى. سالتاناتتى شارانى جەتىساي اۋدانى اكىمىنىڭ ورىنباسارى سەرىك پىرىمبەكوۆ اشىپ بەرىپ، تۇركىستان جۇرتشىلىعىنا ىزگى تىلەكتەرىن ءبىلدىردى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
مادەني شارادا اۋداننان شىققان تانىمال تۇلعالاردىڭ تۋىندىلارى مەن اسەم ءان دە، كۇمبىرلەگەن كۇي دە، مىڭ بۇرالعان بي دە كورىنىس تاپتى. كەشتىڭ ارنايى قوناعى، قازاق ەستراداسىنىڭ جۇلدىزدارى، جەتىسايلىق اسان پەردەشوۆ پەن جولداسبەك ءابدىحانوۆ قالا تۇرعىندارى مەن قوناقتارىنا مەرەكەلىك كوڭىل-كۇي سىيلادى.
شارانىڭ العاشقى كۇنىندە ەتنواۋىلدا قىلقالام جانە قولونەر شەبەرلەرىنىڭ كورمەسى مەن ۇلتتىق ءسالت-داستۇر مەن ادەپ-عۇرىپتار كورىنىسى، ارقان تارتۋ، قازاقشا كۇرەس، قوشقار كوتەرۋ، اسىق اتۋ، قول كۇرەسى مەن ساداق اتۋ، گىرتاسىن كوتەرۋ سىندى ۇلتتىق سپورتتىق ويىنداردان جارىس ۇيىمداستىرىلدى.
ال ەكىنشى كۇنى اۋداننىڭ شىعارماشىلىق ونەر مەكتەپتەرى بۇلدىرشىندەرىنىڭ كونسەرتتىك باعدارلاماسى مەن «اسىقاتا» حالىق تەاترىنىڭ كورىنىستەرى كوپشىلىك نازارىنا ۇسىندى.
